20. marsi 2020
Inatsisartunut qinersinermi taasisut agguataarneqarput, taamaasilluni ullumikkut partiit arfineq marluk Inatsisartuni issiallutik.
Partii minnerpaaq ataatsimik Naalakkersuisoqarsinnaatitaalerpoq, taamaasilluni paasissutissat ingerlaavartumik tunniunneqarsinnaanissaat qulakkeerneqarluni.
Partiini siuttuusut tamarmik Naalakkersuisut Siulittaasuannit aggersarneqarnikkut ataatsimiipput, pisuni assigiinngitsuni sap. ak. Kingullermi aallarnerneqarlutik. Tamanna pivoq Coronamut atatillugu ulorianartorsiornerup nalaani partiinit tamani ilanngussassaqartoqarnerani anngussisinnaanissaq qulakkeerniarlugu, kiisalu ataatsimut pisunut aalajangersakkat aalajangiiffiginiarlugit. Taamaakkaluartorli Aningaasaqarnikkut Ataatsimiititaliap aningaasaqarnikkut ikiorsiissutinut tunngatillugu ungasinngitsukkut saqqummiunneqartumut Atassut imaluunniit Suleqatigiisitsisut aalajangeeqataanissamut, imaluunniit ilassuteqarsinnaanissamut periarfissinneqarsimanngillat.
Tassungalu atatillugu kukkuluttornerinnaq pillugu taamak pisoqarsimanera neriuutiginarpoq.
Assigiinngitsutigut inatsisitigut suliaqarnermi pingaaruteqartunik saqqummiussiniarnermi ileqquuvoq partiit tamarmik inissaqartinneqartarnerat, taamaattumillu aamma pissusissamisuuginnarluni Coronamut atatillugu aarlerinartorsiornermi taamatuttaaq ingerlasoqarnissaa. Suliani allani annertuuni oqaaseqaatit ilassuteqaatillu tunniunneqartut pingaaruteqarluinnartuusarneri ersereernikuuvoq, taamaattumillu matumani Coronamut aarlerinartorsiornermi isummat tamarluinnarmik saqqummiunneqarsinnaanissaat pingaaruteqarluinnarluni, ikinnerussuteqartuuppata amerlanerussuteqartuugaluarpataluunniit, taamatuttaarlu aamma naalakkersuisooqatigiit illuatungiliuttullu akornanni killigititaq peerlugu ataatsimooruffigisinnaasariaqarlutigu. Taamaattumik oqalliseqatigiissinnaanermut oqalliffittut soorlu Siulittaasoqarfimmit oqallitsitsinerit nuannaarutigaagut ataavartiinnarnisaallu pingaaruteqartutut isigalutigu.
Tamat oqartussaaqataanerannik isumaqartinneqartoq tassaavoq Inatsisartut pituttorsimanngitsumik inissisimatitaanissaat, tassanngaanniillu pissaaneqartut aalajangiiffigisartagaannut nakkutiginnittussaatitaallutik pisariaqartillugu upalungaarsimasussatullusooq inissisimasussaatitaallutik.
Aammattaarli inuiaqatigiinni ikinnerussuteqartut aamma aalajangeeqataasinnaaqqullugit. Taamatuttaarlu ilisimavarput nunatsinni politikkikkut ingerlatsinermi inuit ataasiakkaat partiiginnaat pinngikkaluarlugit malinnaavigineqartarmata, taamaattumillu tamatta akuliussinnaatitaanissarput pingaaruteqarluni.
Taamaaliornikkut innuttaasunit toqqaannaq aarlerinartorsiornerup iluani ilassuteqaatit apuussorneqarnissaat qulakkeerneqarsinnaammat.
Inatsisitigut ikiorsiissutitut aaqqiiffiginninnerit, aningaasaliinerit kiisalu allat suliat pingaaruteqartut ilutigalugit isumaqarpugut kikkut tamarmik ilassuteqaatigisinnaasaat pingaaruteqarluinnartut. Sunami tamarmi isigigaanni inatsisitigut aalajangersaatit aammalu aningaasaliinissamut tunissuteqaatit inuiaqatigiit iluanni pingaaruteqarluinnartutut inissisimammata. Peqataannginnissamut isumaqataannginnermullu nalilersuisinnaaneq pissusissamisuuginnarpoq, taamaakkaluartorli oqalliseqataasinnaanissamut periarfissiineq piusariaqarluni.
Inuiaqatigiinnut politikkikkut suleqatigiinnissarput pingaaruteqarluinnarpoq.
Suleqatigiinneq isumaqatigiinnermik amerlanerussuteqarnermilluunniit taamaallat ilisimaneqanngilaq, taamaattorli kikkut tamat ingerlatsinermi atorsaasumik isumatusaartumillu ingerlatsinissamut isumasiorneqartarnissaat pingaaruteqarluinnarluni, matumani kikkut tamat suleqataasut tamaviaarlutik isummat assigiinngitsumik qimerloorsinnaasariaqarlugit, suliamilu attuumassutillit tamarmik peqataatinneqarsinnaaqqullugit.
Taamaasilluta nuna tamakkerlugu kikkut tamat pillugit inatsisitigut aalajangersaanerit pitsaanerusut qulakkeersinnaassagatsigit.
Partiit kiffaanngissuseqarsinnaatitaanerinut killilersuutit pineqaratik matumani taasinikkut tunuliaqutaasut aallaavigalugit tamatta tusaaneqarsinnaatitaanissarput paasissutissinneqarsinnaanissarpullu qulakkeerneqartariaqarpoq.
Taakkartorneqartut eqqaareerlugit qulaani pineqartup kukkussutaannaasimanera neriuutigaarput. Aarlerinartorsiortoqartillugu suleqatigiinnginnissaq tamavitsinnut atuutsinneqarsinnaanngilaq. Maannalu tamanna Inatsisartuni aamma pigisariaqarparput.