Nappaatit tuniluuttut pillugit ataatsimiititaliarsuaq pillugu inatsit aana – nappaatit tunuluuttut pillugit ataatsimiititaliarsuaq sunik aalajangiisinnaava?
Nappaatit tuniluuttut pillugit ataatsimiititaliarsuaq inatsit naapertorlugu annertoorujussuarnik piginnaatitaaffeqarpoq, inatsimmullu linki ataaniippoq. Suliamik ingerlatsinertik allanngortinniaraat tusarlugu nuannerpoq isumaqarpungalu Danmarkimi maannakkut pisut misissorniaraat tusarlugu toqqissiallannartoq.
Kissaatigisinnaavara sulisoqarfiit amerlasuut katersuuffigisartagaat tamanit orninneqartartut pilersaarusiortoqarnissaatat tungaanut tamamarmik matuneqassasut. Tamanna politikkikkut aalajangerluarsinnaavarput.
Soorunami kinguneqanngitsoorsinnaanngilaq, isumaqarpungali sulisuusinnaasunut ajornartoornermi paarsivissanik pilersitsoqartariaqartoq atuarfiillu tamarmik matuneqassasoq SU assigisaalu ingerlatiinnarneqassasut.
Nappaatit tuniluuttut pillugit ataatsimiititaliarsuup nunatsinni tamarmi aamma oqartussat suliamillu tapersiisussat sulinerminni ikiuuttussat aamma aggersarsinnaavaat.
Nappaatit pillugit Ataatsimiititaliarsuup peqqusisinnaaneranik inunnillu mattussititsisinnaaneranik pinngitsaalillugilluunniit katsorneqartitsisinnaaneranik linkimi ataaniittumi takusinnaasissitut Kalaallit Nunaanni inatsisitigut piginnaatitsisoqareerpoq.
Sumiiffiit ilaanni katersuuttoqarnissaanik aamma inerteqquteqarsinnaapput, tamannali nunatsinni tamarmi naammanngilaq.
Aamma inuit tunillaasinnaasut angallatini kikkut tamarmik ilaaffigisinnaasaanni angalanissaat inerteqqutigisinnaavaat.
Maannakorpiaq ajornartorsiut soorunami tassaavoq tunillatsissimasoqarnera maannakkut paasisinnaanngikkipput, uanilu paasisat utaqqisartussaagatsigit immikkorluinnaq pisoqarnerani inatsit allanngortittariaqarunarpoq. Taamaammat immaqa suliap ilaani nangaassuteqarput. Taamaammat inatsimmik pisariaqartumik allannguiniarluni Inatsisartut aggersarneqartariaqarput. Ataatsimiititaliarsuupil iliuutsit annertunerit tunillaassuuttoqalernissaanik pinngitsoortitsisussat ilaannai aalajangersinnaavaat. Taamaammat nunatsinni tamani iliuusissat aallartinneqarnissaat politikerit akisussaaffigaat.
Politikerit sunik aalajangsiisinnaappat?
Avammut killeqarfiit aqussinnaanngilaat. Tamanna Danmarkimi nunat allanut ministeriaqarfiup akisussaaffigaa, Danmarkillu avammut killeqarfiit qujanartumik matuai.
Naalakkersuisut suleqataasalu sukkasuumik suliassaattut kissaatigisarput tassaavoq, Danmarkimi tunillatsittut amerlasoorujussuunerat ilimagineqartorlu tuniluunneq aqunneqarsinnaajunnaartoq.
Danmarkimi nutaarsiassani atuarsinnaavarput peqqinnissaqarfimminni aprilip aallartinnerani peqqissagassat amerlanerpaalissasut.
Siumut naatsorsuisinnaanikuupput, nappaatillu qaqugu takkunnissaa missingersinnaanikuullugu.
Imaappormi nunarpassuarni napparsimasoqalernissaa utaqqigajuttaramikku sukkasuumik aalajangersimasumillu iliuuseqartoqarnikuunngitsoq.
Taamaammat politikerit SUUT aalajangersinnaavagut?
* Suliffeqarfinnut mikisunut akunnattumillu angissusilinnut ikiorsiutissat suliaralugit Naalakkersuisut Inatsisartullu suliaq aallartissinnaavaat.
*Ullut 14-ikkaarlugit tiimimusiallillu ajornartoorneq qaangersinnaaniassammassuk akissarsiaat quakkeerniarlugit Nalakkersuisut Inatsisartullu suliaq aallartissinnaavaat, pisortanilu sulisut akissarsiaat qulakkeerniarlugit suliaq aallartisisnnaallugu, taamaalilluta ajornatoornerup kingunerisaanik soraarsitsiortornerit aningaasameernerujussuillu pinngitsoorniassagatsigit.
* Naalakkersuisut namminneq timmisartoqatigiiffimminni, tassa Air Greenlandimi, timminnerit amerlassusissaannik aalajangiiniarneq aamma aallartissinnaavaat.
* Mittarfeqarfiit iniutaat qanoq pineqassanersut aalajangersinnaavaat, aammalu nappaatit tuniluuttut pillugit inatsisitigut piginnaatinneqarlutik taamaaliorusukkunik taamaaliorsinnaagunillu atugassanngortinneqarnissaat aalajangersinnaavaat – assersuutigalugulu Hotel Arcticip, Hotel Kangerlussuup aamma Narsarsuaq Hotelip atugassanngortinnissaat aalajangersinnaallugu.
Soorunami isertitat ikilinerannik kinguneqassaaq, pisunili atukkatsinni taamaattariaqarpoq.
* Naalakkersuisut Covid19-imik/Corona-virussimik nutaamik misissuissunermi atortunik taamaaliortoqarsinnaappat nunarsuarmi pisisinnaapput.
Østrigimi maskiinat nutaat ineriartortinneqartut Coroamik eqqortorujussuarmik misissuissutaasinnaapput, sulisunilli taakkunannga atusinnaasunik pissarsinissaq aammalu tuniniarneqartut ujartorneqartulu ajornartorsiutaassagunarput. Suliffinni ullumikkut takusinnaasara malillugu misissuinermi atortunik pissarsiniarneq aallartinnikuuaat, taamaallaalli Nuummut. Neriuutigaarput nunap immikkoortuini napparsimavinnut tamanut atortunik taakkununngalu sulisussanik pissarsiniarnissaq suliniutigissagaat.
* Naalakkersuisut nappaatit tuniluuttut pillugit inatsit naapertorlugu atuarfiit paaqqinnittarfiillu pillugit malittarisassiorsinnaapput. Maannakkut tamanna pillugu akisussaanianngillat, isumaqarpungalu tamanna uggornartuusoq. Neriuppunga tamanna aalajangerniarneqalersoq.
* Tuniluuttoqarnera pissutigalugu matusinerup kinguneranik Nalaakkersuisut pisumi uanitut taarsiivigineqarnissamik piumasaqarfigineqarsinnaapput. Taamaammat iliuusissat aallartinnissaat nangassutigigunarpaat, taamaammallu isumaqarpunga Inatsisartut piaartumik aggersarneqartariaqartut, taamaalilluta aningaasatigut ajornartoornissaq sioqqullugu iliuuseqarniassagatta, nunatsinnilu aningaasaqarnermi ajornatoornissaq pinngitsoortinniarlugu suliaq aallartittariaqartugut, minnerunngitsumillu innuttaasut tamassuminnga eqqugaasussat pillugit.
* Naalakkersuisut peqqinnissaqarfik tamakiisumik aalajangiifigisinnaavaat, taamaammat tunillanneqanngitsut pinnagit tunillanneqartunut immikkoortortanik ininillu immikkoortitsinissaq tuni pillugu pilersaarusiornissap aallartinneqarnissaa aalajangersinnaallugu, qularutiginngilarpullu gtamanna aallartereeraat.
* Angerlarsimaffeqanngitsunut allanullu ajutooriaarnarnut aningaasanik ininillu immikkoortitsinissaq aalajangersinnaavarput aammalu paaqqinniffinnut utoqqaallu inaannut pulaarnissamik inerteqquteqarsinnaalluta, inuillu paaqqinniffinni katsorniarsinnaavagut, tassani
sumiiffinni taamaaliorfigisinnaasatsinni tunngavissaqarfiusunilu tunillaaffiusinnaanngitsunik pilersisinnaalluta, utaqqarnut navianartumiittunullu. Taamaaliornikkut tuniluuttoqarninnginissaa annertunerpaamik aqussinnaagunarparput. Tuluit Nunaanni maannakkut taamaaliortoqarlerpoq, isumaqarpungalu uagut aamma taamaaliussasugut.
Suleqagissitsisuni isumaqarluinnarpgut oqartussat aamma Nappaatit Tuniluuttut Ataatsimiititaliarsuaq suliamillu ingerlatsisut allat politikerit avaqqullugit nunarsuarmi tamarmi tuniluuttoqarneranik inuiaqatigiit piareersarniarlugit suliassat ingerlatsilluareeraat.
Taamaakkaluartoq isumaqarpugut tuniluunneq pinngitsoortinniarlugu politikkikkut aalajangiinissaq arriippallaartoq. Naatsorsuutigeriartigu tuniluunneq nunatsinni atuutilereersoq tamannalu tunngavigalugu iliuuseqartariaqarpgut. Inatsisartut immikkut ataatsimiinnissamut aggersarneqarlutik, annertuunik iliuuseqarnissamik aningaasatigullu ikiuutissanik sapinngisatsinnik sukkasuumik isumaqatigiissitsisoqarli, iliuuseqarnissarlu isumagalugu.
Aatsaat taamaaliornikkut peqqinnissaqarfitta sapaatit akunneri marluk-pingasut qaangiuttut pisinnaajunnaarneranik kinguneqarsinnaasumik virussip tuniluunnera pinngitsoortinniarsinnaavarput
Aamma eqqiluisaarneq pillugu najoqqutassiat maleqqissaasigit. Inuunerit annaaniarlugit atuupput.
Nappaatit tuniluuttut pillugit inatsit, linkit ilassutit allannguutillug ilanngullugit:
http://lovgivning.gl/lov?rid={735E01F6-1C0C-482C-AC2C-44558EEF5FA2}
http://lovgivning.gl/lov?rid={C0EE0CBD-1524-439C-9173-7C3F3C37975A}
http://lovgivning.gl/lov?rid=%7B6D7E71A8-4757-49AB-88FA-FAC4566C822B%7D#
http://lovgivning.gl/lov?rid=%7B6D7E71A8-4757-49AB-88FA-FAC4566C822B%7D