Nappaatit Tuniluuttut pillugit Ataasimiititaliarsuaq Naalakkersuisullu suut periarfissaanersut suullu qaqugukkut illersorneqarsinaanersut ulapputtorujussuupput.
Nunarsuarmi tuniluunneq atuuppoq, tassani nunat killeqarfiit pisortat sulisoqarfii matuneqarput suliassat nalinginnaasut kinguartinneqarput, suliallu allat peqqissaavinni Danmark-imi Europa tamaat sinnerlugulu, suliffeqarfiillu matuneqarlutik.
Tamanna piffissami nutaanerusumi aammalu nunarsuarmi Europamilu takusatsisut aalajangeriataartarneq oqaluttuarisaanermi siornatigut pinikuunngilaq.
Ataasinngornerulerpoq amerlasuullu Danmarkimit nunaniillu allanit tikittut tunillaariaannaasut allat tunillanissaat ersigalugu taaneqartartutullu napparsimanatillu tunillaasinnaanertik aammalu suliffeqarfimmut inuiaqatigiinnullu akisussaaffeqaramik angerlarsimaannarsinnaanerlutik akunnattooqqapput.
Tamanna paasinarpoq ullumikkullu tusagassiortunik toqqaannaq katersuutsitsinermi Nappatit Tuniluuttut pillugit Ataatsimiititaliarsuup aamma oqarneratut suliamiillu suliamut nalilersuineq tunngaviussaaq.
Tamatta akisussaaffik annertooq paarivarput. Eqqugaasimasuusinnaaguit, qinnuigissavatsigit angerlarsimaannaqqullutit minnerpaamik ullut 14-tanit. Massakkut Naalakkersuisut, Inatsisartullu suleqatigiittariaqarput, ujartuiniarlutik aningaasat ikiuiniarnissamut atorsinnaasut, tamanna peqqutaavoq napparsimaveqarfigut maannamut piareersimanngimmata, nappaat massakkut takkutissagaluarpat, atortorissaarutit naammannavianngillat. Massakkut pingaarnerpaajuvoq napparsimaveqarfiit piffissamik tuninissai, piareersarluarnissaat anguniarlugu, taamaasilluta sanngiinnertagut, utoqqartagullu ikiorluarneqarnissaai, anguniarlugu.
Naalakkersuisut, partiit, ataatsimiititaliarsuarlu sulissutigerpasippaat sukkanerpaamik iluatsinniarlugu.
Utoqqaat inuillu timaat akiuussutissat annikitsut: Allat qanillinaveersaaqqullugit qinnuigisigit
Qularutissaanngilarli uagut isumaqartugut ullumikkornit annertuunik iliuuseqartoqartariaqartoq.
Suleqatigiissitsisut inuillu nappaateqareersut utoqqaallu mattuteqqullugit inuillu eqqiluillartut kisiisa pissutsinilu aqunneqartuni pulaartittaqqullugit kaammattorusuppagut.
Ajornakusoorarluatoq ilaquttassinik pulaartoqarnaveersaaritsit piumasaqarfigisigillu errortorluartassasut, skuutik matup silaatani peertassagaat takkukkunillu napparsimagaasinnassanngitsulluunniit.
Imaluunniit qinnuigisigit pulaarnissartik kinguarteqqullugu.
Suliffeqarfiit: Anigorneqarsinnaanngitsumik nappaatillit, timaat akiuussutissaqarpianngitsut utoqqaallu paarisigit:
Angerlarsimaffimminniit sulisinnaasut sulerusuttullu tamaasa: Angerlartissigit; timaat akiuussutissaqarpianngitsut utoqqaallu angerlartissigit angerlarsimaffimminniillu sulisissigit. Aqagumiit pissutsillu allanngornissaasa tungaanut
Amerlasuunik sulisoqarfiusuni, aqutsisut eqqiluisaarnissamik atortullu qaavisa matullu tigummiviisa ullormut arlaleriaqaluni salittarnissaat qulakkertitsissigit.
Utoqqartatta inuillu timimikkut sanngiitsut uloriarnartumiittullu tunillanneqannginnissaaninnik kikkut tamarmik akisussaaffeqartorujussuupput.
Suli tunillatsittoqarsimannginnera isumaqanngilaq suli tunillatittoqarnikuunngitsoq
Isumaqaannarpoq tunillatsissimasunit misiliutissanik – suli – tigusisimanngitsugut akissutisisimanngitsugullu. Nakorsat tunillatittoqarsimaneranik paasinnissaasa amerlanerillu misissorneqarnissaa tungaanut – taakkulu nassaarinissaat missornissaallu sapaatit akunnerinik arlalinnik sivisutigisinnaavoq – akisussaaffeqartorujussuuvugut, immitsinnullu tunillannaveersaarluta iliuuseqartariaqarluta.
Inunnik attaveqartarnerput sungiusimagatsigu pissusilersortarnitta allanngortinnissaa ajornakusoortorujussuuvoq, immaqalu inuusuttut peqqissullu anerusunnerugaluartut nuannisarlutillu.
Silamiinnissaq ajornaqutissaqanngilaq, kisianni allat minnerpaamik 2 meterinik qanillinagit, aqqusinermi qitserarasi, attatit matullu tigummivii attornagit kingornatigullu kiinarsi isisi oqarsilu attornagu
Inuit kiinartik tiimimut agguaqatigiissillugu 28-t missaanni attortarpaat, sivikinnerpaamik sikuntit, sapinngisamik 30-t, errortorsimanngikkuit taamaaliornaveersaarit.
Nutaarsiassat eqqunngitsut nutaarsiassallu assigiinngissutaat
Nutaarsiassat eqqunngitsut tusagassiortunit suliarineqarluarsimasunit tusarfinnik paasissutissanillu isummersimasunit aviisinit saqqummersitaniillu akuerisaasuniinngillat.
Aviisit internetikkullu aallakaatitat tusarfinnit tatiginartuneersuupput nunaruarmilu tamarmit tusassiisartuneersut tatigineqarluarsinnaapput.
Atuakkassannik isornartorsiuisinnaassuseqaritsi, peqatigitilluguli nunarsuarmi pissutsit tiimimiit tiimimut, ullormiit ullormut, allanngorartuunerat eqqumaffigalugu, tassani ullualuinnannguit allaaserisat ilaat pisoqalereersimasinnaallutik.
Nunarsuarmili nunaniillu uagutsinnit siulliunerusujussuullutik virusimik tunillaaffiiusunit pissutsinik atuartaritsi paasiniaallusilu. Siunnersuutit maleqquneqartut pisortaqarfimmiik malissigit; naalakkersuisut.gl, nun.gl-ilu, taakkuupput ataatsimiittaliarsuap quppersagaatai, nutaarsiassat malinnaafigisigit, eqqaamallugulu aamma nammineq akisussaaffimmik tigusinissaq.
Naggasiullugu:
MIANERINNIGITSI. Utoqqaat timimikkullu sannngiitsut pullarnagit. Eqqiluisaarneq pillugu paasissutissanik ujarleritsi sapinngissinnillu taamaalioritsi.
Ingasaallugu eqqanaarsarasi, taamaaliorussi pisiniarfiit nioqqutissaarutissapput.
Ilisimasiuk ajornartoorneq anigorniarlugu politiit, Inatsisartut, Naalakkersuisut oqartussallu tamarmik maannakkut sulisorujussuit.
Ilisimasiuk Corona-virussi Kalaallit Nunaannut takkutissasoq, kisiannili takkuteersimasutut pissusilersoritsi. Ulluni aggersuni ullut 14-it uagut nammineq pissusilersornerput akisussaaffeqatigiinnerpullu inuiaqatigiinni qaammatini marlussunni tulliuttuni virusip qanoq tuniluunnissaanut pingaaruteqartorujussuuvoq.
Nunani allani misilittakkat ilinniarfigitigit, INGERLAANNARLU akisussaassuseqartumik pissusilersorta.
Inuit allat qanillinagit, uivernissaq ingaassallugulu eqqanaarsarnissaq pinngitsoortitsigit.