Coronavirus pillugu nutaarsiassat tiimimiit tiimimut allanngorartuarsinnarput. Taamaattumik pisariaqarpoq iliuuseqapallassinnaanermik uppernarsaanissaq. Tiimimiit tiimimut allanngorartoqaraluartoq, kiisalu Naalakkersuisut siulittaasuannut ikorfartuinissamut piareersimallutta assannik isaatsigaluartugut, suli akineqanngilagut. Uippallernissaq pinaveersaartinniarlugu, maannakkut ataatsimiigiaquneqarnissatsinnut neriulluta naalakkersuisoqatigiinni partiinut oqariartuutissagut ammasumik nalunaarutigissavagut.
Ullut tamaasa Danmarkimiit nunatsinnut timmisartoq tikittarpoq, kiisalu Islandimiik sianerissami illoqarfinnut akulikitsumik tikittoqartarluni, tamatumalu coronavisruimik tunillaassuuttoqarsinnaanera ilimanarsitsippaa. Inuiaqatigiittut inissisimanerput nappaammik tunillaassuutumik annikillisaaniarsarinissarput sukkanerpaamik pinartunngoriaannaavoq Taamaattumillu akisussaassuseqarluta iliuuseqartariaqarpugut.
Isumaqarpugut Kalaallit Nunaat ulluni 14-nini matuneqartariaqartoq, soorlulisooq Danmarki taamaaliortoq. Naak inissisimanerput Danmarkimi pissutsinut suli assersuussassaanngikkaluartoq. Kisiannili taamatut inissinnissarput pinaveersaartariaqarparput.
Avataaniit tikittut angerlarsimanissaannik innersuunneqanngillat kisiannili nammineq piumassusertik naapertorlugu angerlarsimaannarallarnissaminnut kaammattorneqarlutik, uagulli isumaqarpugut angerlarsimasarnissaat piumasarineqartariaqartoq. Tassami peqqinnissaqarfitta pisinnaasai eqqarsaatigissagaanni tamanna pillugu iliuuseqannginneq illersorneqarsinnaanngilaq. Innuttaaqatigut annikinnerusumik akiiussutissallit eqqarsaatiginerisariaqarpagut.
Naalakkersuisut siulittaasuat matumuuna aammaloorlugu kaammattorniarparput partiini siulittaasut ataatsimeeqatiginissaanut aggersaqqullugit, tassami piffisanngormat iliuuseqarnissamut, taamaalillutami siusinaarluta upalungaarsimaniassagatta, taamatullu uippallilernissaq pinaveersaartinneqassammat.
Neriuutigaarput kaammattuuterput tigulluarneqarluni erniinnartumik ingerlanneqassasoq.
Ataatsimoortariaqarpugut. Ikioqatigiittariaqarpugut. Toqqissisimanermik pilersitsisariaqarpugut, taamaattumillu kingusinaartinnata iliuuseqartariaqarluta. Danmarkimisullu iliuuseqarta, nuna ulluni 14-ini matuneqarli. Kalaallit nunaannut angalannissaq nunalu qimallugu aallarnissaq innersuusutaassanngilaq, inuit 100-it qaangerlugit peqataasoqartillugut katerisimaatitsinissaq innersuunneqassanngilaq. Inatsisit suut periarfissaanersut misissorneqassapput, pisariaqassappallu inatsisitigut aaqqiigallarnissat piareersimaffigineqassallutik.
Kinguneqarluartussamik politikkikkut maannangaaq iliuuseqartariaqarpugut. Piffisaqarluarnitta atorluarnissaanut pisariaqartitsinerput takutittariaqarparput
Kaammattuutigaarput:
- Nunatsinnut avataaniit avammullu angallanneq pisariaqanngitsoq unitsinneqarli, inuit nunatsinnut tikittut angerlarsimaannarnissaannik innersuunneqarlik.
- Angerlarsimaffeqanngitsut sanngiinnerillu iliuuseqarfigineqarlik.
- Pisortat suliffiutaat kiisalu suliffeqarfiit sulisui akisarsiaqartiinnarlugit angerlarsimatinneqarlik.
- Inuussutissaqarnissarput nakorsaatissaqarnissarpullu pisariaqartipparput.
- Inuiaqatigiinnut malittarisassanik saqqimmiisoqarnissaa pisariaqartiparput.
- Isumannaatsumik nunattta iluani naappaammik tunillatsissimanermik misissuisoqarsinnaalernissaa pisariaqartipparput.
Piareersimavugut pisarialimmik iliuuseqarsinnaanissaq tapersersissallugu, kiisalu pisortani sulisut akisarsiatigut annasaqannginnissaat isumannaarniassallugu.
Nunatsinni inuttaasunut kaammattuuteqarpugut angalareernermi nammineq piumassusertik naapertolugu angerlarsimaannarallartarnissaannik, kiisalu napparsimallutik malugisimagunikku angerlarsimaannarnisaanik. Neriniartarfinnik cafenillu pinguaatinik allanillu piginittut akisussaassusillit qinnuigaagut matusinnaanissamik nalilersuilluaqqullugit, taamalilluta coronavirusip tunillaassuussinnaanera pinaveersaartinneqassammat. Utoqqaat, napparsimasut, annikinnerusumillu akiiussutissallit eqqarsaatigalugit iliuuseqartariaqalerpugut.
Naalakkersuisunut illuatungiliuttutut piareersimavugut oqaloqatigiinnissamut.
Uani partiini politikki aporfiisariaqanngilaq, kisiannili nappaatip tunillattuutinnginnissaa pingaarnerulluni. Piareersimavugut.
Tillie Martinussen, SAM.
Muté B. Egede, IA.
Pele Broberg, Parti Naleraq.
Aqqalu C. Jeremiassen, Atassut.