Inatsisartut Suleriaasianni § 37 imm. 1 naapertorlugu Naalakkersuisunut apeqqutit imaattut matumuuna
saqqummiuppakka:
Naalakkersuisunut apeqqutit:
1. Nunatsinni mittarfinni nunanit tamanit tikinneqartartuni Covid-19-virusimik atortut nuunneqarsinnaasut atorlugit misissuisarnissaq Naalakkersuisut pilersaarutigaat?
2. Timmisartut inuttaannik nunanit tamaneersunik mittarfinni Covid-19-virusimik atortut nuunneqarsinnaasut atorlugit misissuisarnissaq Naalakkersuisut pilersaarutigaat?
3. Laboratoriamik nuunneqarsinnaasumik sumiiffiit ilaanni ikkussinissaq Naalakkersuisut pilersaarutigaat, taamaalilluni napparsimavinni tunillaattuuttoqarnissaa pinngitsoortinneqassalluni, pissutsillu aqullugit Covid-19-visumik sukkasuumik misissuisoqarsinnaalluni?
4. Nunap immikkoortuini napparsimaviit kiisalu nunaqarfiit peqqissaasoqarfiillu Covid-19-virusimik misissuisoqarnissaanik kissaateqartoqartillugu qanoq iliortassappat?
5. Nunatsinni laboratoriat inummik tunillatsittoqarsimaneranik qanoq sukkatigisumik paasisaqarsinnaappat?
6. Nunatta Nakorsaaneqarfia Nappaalanersuarmulluunniiit Immikkoortortaqarfik tunuluuttoqarnissaa pinngitsoorniarlugu innuttaasunut immikkut inassuteqaatissaqarpat?
a. Immaqa TV-kut takukkullu attaveqarneq atorlugu qanoq iliortoqarnissaanik nuna tamakkerlugu ilitsersuinissamik pilersaaruteqartoqarpa?
Tunngavilersuut:
Covid-19-virusip nunanut nunatsinnut ilangalasartoqarfiusunut kalaalerpassuillu angalaffigisartagaannut siaruaassimaneratut isikkoqarpoq.
Nappaatip siaruaasinnaanerata annertunerpaamik pinngitsoortinniarneqarnissaa kissaatiginarpoq, taamaalilluni nunatsinni tamani napparsimaviit peqqissaasoqarfiillu tunillatsissimasut napparsimasullu katsorsarsinnaassallugit.
Taamaammat virusip tuniluussaarinniarlugu aqunniarlugulu sunniuteqartumik iliuuseqartoqartariaqarpoq, taamaalilluta peqqinnissaqarfik ajornartorsioreeqisoq naammassisaqarsinnaassutsikkut ajornartorsiortissanatigu.
Nunatut eqqatsinniittutut tunillatsittut amerlatigilernissaannut isikkoqarpoq; tunillatsittoqareersimanngippat siulliit tunillatsissapput. Taamaammat napparsimasut, utoqqaat inuillu timaat nappaatinut annikitsumik akiuussutissallit sakkortuumik eqqugaasarmata, nunatsinni aqutsisut pilersaarusiornissaat iliuuseqarnissamullu piareersimanissaat kissaatiginarpoq.
Taamaammat Naalakkersuisut Naalakkersuisullu sulisoqarfiisa virusip siuaruaakkiartornera nunatsinni pinngitsoortinniarlugu unitsinniarlugulu sunik pilersaaruteqarnerisa tusarnissaa soqutiginarpoq.