Oqaatigiuartarnikuuarput: Mittarfinnut nutaanut akissaqanngilagut, niuernermi ingerlatsinermi tunngavik ajortumik aaqqissuussaavoq, pilersaarullu saqqummiunneqartoq imminut akilersinnaanngilaq, inuiaqatigiinnut akisuallaarpoq.
Soraaninngornissamut ukiut siorna ukiunut 66-inut qaffanneqarput, maannakkullu qaffaqqissallutik.
Inuiaqatigiinni utoqqaat sanngiinnerpaallu ataatsimut isigalugu mittarfiit nutaat akilissavaat. Mittarfiillu ilismagineqartutut isertitsissutaanavianngillat, akiitsoqalerujussuaannanngilagut, aamma Inatsissartuni qaffanneqqusaalluni politikkeqarpoq, mittarfiit aningaasalersornissaannut isertitaqarniarluta sukujuppassuarnik utoqqatsissutissarsiorpugut. Siumut, Demokraatit aamma Nunatta Qitornaasa ukiorpassuarni allamut saaqattaartitsiniartarneri tigussaapput innuttaasullu amerlanerujartoqisut qimarrallutik. Innuttaasut nunatsinni atorfissaqartitagut ajunngitsumik ingerlapput, isertitaqarluartarput aamma sulinertik ilinniagaqarnertillu nuannaraat. Innuttaasut inuunertik tamaat sulisimasut politikerit aningaasalersuinernik aaqqissuussilluarsimannginnerannit nunatsinnilu aningaasaqarniarnermik mangiuisumik politikkeqarnerannit pillarneqassanngillat. Assersuutigalugu nunanat avannarlernut sanilliulluta Kalaallit Nunaanni inuunikinnerusarpugut, soraarnerussutisiaqalernissamullu ukiut qaffanniarneqarneri namminerlu soraanerussutisiaqalerissamut pinngitsaaliilluni akiliisitsiniarnerit pissusivinnut naapertuutinngilluinnarput. Piffissap sivikitsup ingerlanerani sanaartornernut piffissamut sivisuumut imminut akilersinnaanngitsunut aningaasaliiniarluni aningaasanik isaatitsiniarluni allamut saatitsiniarnertut isikkoqarpoq. Aningaasaqarnermik politikkiuvoq ajortoq.
Qaffanneqqusaalluni politikkeqarnermi politikkikkut killilersuinermik millisitsiniarneq takujuminaappoq.
Innuttaasunik sumiginnaanerit tulleriiaaginnavissut, tamassumalu ikiorneqarnissamik toqqissisimanissamillu pisariaqartitsinerpaajusunik takusatsitut ajornerusumik sullissineq.
Siumut patajaallutik qinersisartut inuuniarnerminni ajornerusunik atugaqaleqqissapput.
Annilaangassutigaarpulli ajornerpaaffia suli takunngikkipput, Ataasiullutillu pingasuusut akitsuutinik amerlanerusunik annertunerusunillu nassaarniarnertik nangeqqissavaat, mittarfinnut namminerlu suliniutinut takulluarsaatinut aningaasanik nassaarniarlutik pisortat sullisinerat suujunnaarsissavaat ajornerulersilluguluunniit, taamaalineranilu innuttaasut nunatsinnit nuuttarlutik imaluunniit illoqarfinni nunaqarfinnilu najukkaminni pituttorneqassallutik. Inuuniarnermut akissaqanngivissapput, peqqinnissaqarfimmit ikiorneqarsinnaanngillat, suliffeqaannarnissamut kajujuummissutit ikiliartuinnassapput. Kukkusumut ingerlavugut.
Soraarnerit atugalioreeqisut suna sakkortunerusumik eqqorneqassapput.
Soraanerit inunnertik tamaat sulerulussimallutik aalisartooreerlutilluunniit suli ukiumi ataatsimi suleqqittariaqassapput, inissiani nungullarsimasunissapput, ikitsuararsuarnik aningaasaateqassallutik aammalu soraarnerussutisiaqarnermi, peqqissutsimi akileraartarnermilu allanngorartunik siumullu eqqoriarneqarsinnaanngitsunik atugassaqassallutik. Partiit pingasut, kaffimut qujanaq. Eqqaamasiuk kaffi sukkoqassanngitsoq.
Suleqatigiissitsisut soraarnerussutisiassat akilerneqartartut ukiut ikitsut ingerlaneranni aamma ikilinissaat siulittuutigaat. Aningaasammi soraarnerussutisiassanut pinngitsaaliissummik ileqqaartinneqartut (pisortanit) utoqqalinersiat akilerneqannginneranni ilanngaatigineqartussaapput. Isumaqarpugut aningaasaqarnermi politikkimi ersarluttumik paasiuminaatsumilu alloriarneq taannaassasoq. Utoqqaat pitsaasunik atugassaqartinneqassapput, suliffeqarunnaarunillu naammaginartumik soraarniunissamut periarfissaqassapput, maannakkut taamatut politikkeqartoqanngilaq, unitsittariaqarpoq. Kusanaatsuliornerit tulleriiaaginnavissut takusarpagut, tamakkulu innuttaasut siunissami ukiorpassuarni nanertuutigissavaat. Piffissaq uterteqqissinnaanngilarput, siumut isigiinnarsinnaavugut ajornerpaanullu piareersarluta. Naalakkersuisooqatigiit innuttaasunut neriorsuutaat imaqanngitsut piviusunngunngisaannassapput.
Suleqatigiissitsisut innuttaasut peqatigaat, aammalu Kalaallit Nunaanni innuttaasut peqatigalugit pitsaanerusunik atugassaqarnissaq ullut tamaasa sorsuutigissavarput.