Inuppassuit akitsuutinik qaffaarujussuarnernut piffissami kingullermi akerliussutsimik takutitsisartut Naalakkersuisut tusaajumaniarpasinngilaat.
Kim Kielsenitut tullianik nerisassaqarnissap qulakkeernissaa nammineq eqqarsaatigisariaqanngikkaanni taamatut isummernissaq ajornanngeqaaq. Naalakkersuisut isumaqarpasipput suli akilisunerulissasut. Siuttummi qaffasissumik inissisimasut mittarfiliornernut, tunngaviusumik inatsit pillugu ataatsimiititaliarsuarmut, politikerinut inissianut nutaanut suliniutinullu allanut takulluarsaatinut pisariaqanngivissunut aningaasaqarnissaq qulakkeertussaavaat.
Suliniutit taamaattut innuttaasut nalinginnaasut iluaqutigisussaanngilaat – piitsuunerpaallumi iluaqutiginngivissortussaallugit. Taamaalilluni maannakkut naalakkersuisooqatigiit politikkiisigut inuttut atukkat ajornerujussuanngortussaapput. Kielsen innuttaasunut akerliussutsimik takutitsisunut aamma akivoq qinersisartut amerlanerussuteqartut aningaasaqarnermi allaanerusumik politikkeqarnissaq kissaatigigunikku Namminersorlutik Oqartussanut kingullermik qinersinermi allaanerusumik qinersiinnarsimassagaluartut.
Taamatut isummeriaaseqarneq tamat oqartussaanerannik killilimmik paasinninnermik takutitsineruvoq, tassa tamat oqartussaanerannik aqutseriaatsimi qinersinerup inernera kisimi apeqqutaasariaqanngimmat. Tamat oqartussaanerat aamma oqaloqatigiinneruvoq, ataqqeqatigiinnerullunilu. Tamat oqartussaaneranni oqaloqatigiittarnerup ilarujussua innuttaasut ulluinnarni kissaataannik piumasaqaataannillu pisariaqartitaannilluunniit itigartitsiuarnikkut nipangersinneqartussaavoq.
Suleqatigiissitsisunit ernumassutigeqaarput taamatutt isummeriaaseqarneq – Naalakkersuisut tungaannit – politikerinik qatsusseqqinnissamik kinguneqassasoq nunatsinnilu kusanaqisumi ataqatigiissinnaassuseqarneq akornusissagaa.
Amerlaqisunit ilisimaneqarpoq Suleqatigiissitsisut meeqqat atuarfiata qaffassarneqarnissaa suliniutigigaat taamaalilluni Kalaallit Nunanni pitsaanerusumik ilinniagaqartarnissat qulakkeerneqarniassammata.
Meeqqat atuarfiannut ilinniarnernullu aningaasaliinnerit ataatsimut isigalugu iluanaarutaasaprut, ilaatigut siunissami kinguaariit, innuttaassut politikerillu, tamat oqartussaaneranni pitsaanerusumik oqaloqatigiittarnissamut piginnaasaqartilernissaat pissutigalugu.
Naalakkersuisut meeqqat atuarfiannut aningaasaliissutaat iluaqutaanngitsutut isikkoqarpoq, tassa tamat oqartussaaneranni oqaloqatigiinnerit takussaanngimmata. Nunatsinni innuttaasunut annertunerpaamillu aningaasaqarnitsinnut tamanna akornutaavoq.
Kusanartutut isikkoqarniassammata allanut sangusaaniarnerpassuit apeqqutaatinnagit isertitat, aningaasartuutit neriorsutillu imminnut atanngillat. Siunissamik akilissinnaajunnaariaannaavugut aammalu timmisartumut angalanernulluunniit bilitsit akii aamma qaffariartupiluulereerput.
Tamassumani innuttaasut qimarrannissaat qulakkeerneqarpoq. Innuttaasut nunatsinniiginnarnissaat sulinissaallu suli atorfissaqartinnerulerparput.
Akerliunerit tusaaniarneqarnissaat innuttaasut tamatta kissaatigaarput, tusaanngitsuusaaginnarneqaratik.
Maanit ”inuit nunaanni” pitsaanerusumik imminut atasinnaassutsimik qulakkeerinninnissamut tapersiisussamik tamat oqartussaaneranni oqaloqatigiittarnerit kissaatigaagut.
Annertunerusumik paasisaqarusukkuit attaveqarfigiuk:
Jesper Stormly Enevoldsen – Suleqatigiissitsisuni aningaaserisoq siunersuunernullu ilaasortaq.
Jesper_Enevoldsen@outlook.com