Soraarnerussutisiaqalernissamut aaqqissuussinermut peqataasussaatitaanermi akileraartarnikkut suliaq tukanneruleraluttuinnartutut isikkoqariartormat, partiit illuatungiliuttut ataatsimoorlutik Naalakkersuisut ammasumik siuinersiuinissamut aggersarpaat.
Taamaaliornikkut piffissami Naalakkersuisut innuttaasut kaasarfiinit toqqaannartumik aningaasanik aalleqattaarnernik annertuunik ingerlataqarneranni, innuttaasut ulluinnarni inuunerata eqqornerlunneqannginnissaa qulakkeerumavarput.
Peqatigitillugu suliap akisussaasunit qanoq sivisutigisumik ilisimaneqareersimanera paaserusupparput. Taamattaaq inatsisit malinneqarsimanerat qulakkeerumavarput, innuttaasummi amerlaqisut uatsinnut toqqaannartumik saaffiginninnermikkut kiisalu attaveqaatitigut innuttaasut oqaloqatigiittarfianni inummut ilanngaatinik allanngortitanik kiisalu procentinik akileraarutaasussanik qaffanneqarsimasunik takutitsiortorput, taamaaliornermikkullu akileraartarnermut allaffimmit akissut innersuussutigaat. Arlallittaaq tamatuma pinnginnerani akileraaruseriffinnit oqaloqatigineqarsimannginnertik oqaatigaat, taamaattoqarnissaalumi ilaatigut piumasaqaataagaluarpoq.
Ilanngaataarutsitsinerup procentillu akileraarutaasussap qaffanneqarnerisa saniatigut procentip akileraarutaasussap ukioq naallugu atuunnissaanik akileraaruseriffiit uppernarsaaneri ingerlateqqinneqarput, taamaalillunilu qaffaanerit aningaasat akiligassat akilernissaasa tungaanut taamaallaat atuutissanatik. Inuit 6.000-init amerlanerusut siuliani taaneqartunit eqqorneqarsimanerat tusagassiuutitigut tusarliunneqarpoq.
Pineqartumi inatsisit erseqqissorujussuupput, tassanimi Soraarnerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaat nr. 21, 28. november 2016-imeersumi § 7, imm. 2-mi akileraaruseriffiup naatsorsuutinik suliaqareernermi inuk saaffigalugu nikingassutip akilerneqarnissaanut sapaatip akunneranik sisamanik periarfissiinissaa piumasaqaataavoq.
Taamaammat ukiumut ilivitsumut naatsorsuutit, inummut attaveqarneq kiisalu sapaatit akunnerinik sisamanik piffissaqarnissap, januaarimi sapaatit akunnerini siullerni marlunni naammassineqareernera eqqunngitsuusorinarpoq.
Peqatigisaanillu § 7, imm. 2-mi piffissaliussap qaangiunnerani akileraaruseriffiup taamaallaat procentimik akileraarutaasumik qaffaasinnaaneranik inatsit erseqqissorujussuuvoq. Taamaalilluni ukioq naanagu imaluunniit ilanngaat allanngortinnagu, taamaallaalli nikingassuterpiaannavimmut tunngatitaalluni.
Illuatungiliuttut tamattaalluta partiit allat kissaatitsinnut tapersiinissaat neriuutigaarput, taamaalilluta innutaasut pisinnaatitaaffii qulakkeersinnaassagatsigit, suliamilu kukkussutaasinnaasut inatsimmilluunniit pitsanngoriaataasinnaasut sapinngisamik piaarnerpaamik isumagineqarnissaat qulakkeerneqarsinnaaqqullugu.
Múte Bourup Egede Hans Enoksen Aqqalu Jerimiassen Tillie Martinussen
Inuit Ataqatigiit Partii Naleraq Atassut Suleqatigiissitsisut