Ulluni makkunani illuatungiliuttut uumisuttumik oqalunneragaapput, naak ulluni makkunani annertuumik akerliussutsimik takutitsinernut peqqutaasut tassaasut aqutsinerlunneq Naalakkersuisunilu ataqatigiinngittoqarnera.
Suleqatigiissitsisut isumaqarput pisut asuli oqalunnissamut suliassaqarfiullu iluani oqqannissamut ilungersunarpallaartut. Isumaqarpugut nunarput annertuunik qaangerniagassaqarlunilu ajornartorsiuteqartoq tamakkulu ataqatigiinnikkut taamaallaat aaqqinneqarsinnaasut.
Meerartagut, utoqqartagut, sanngiitsortagut napparsimasortagullu politikkerit ataavartunik aaqqiissuteqarnissamut kajumissuseqannginnerat/piginnaasakinnerat peqqutigalugu atugarliorput.
Allatut oqaatigalugu pisut aarlerinaqaat.
Inuit taakkartorneqartut tassaapput mittarfiit, isumalioqatigiissitat ingasattajaarnerillu allat aningaasartuutaangaatsiartut pinnagit salliunneqartussat.
Tamat oqartussaaqataanerat isumaqarpoq oqaloqatigiissinnaaneq politikkerillu iluameersumik ataqqinnittumillu oqaloqatigiinnissamut kajumissuseqannginnerisa aqqani tamat oqartussaaqataanerat ilungersunartumik inissisimavoq. Politikkerit imminnut inissianik nutaanik akissarsianillu qaffasinnerusunik tuniorarnermikkut innuttaasut tatiginninnerat ilanngullugu ilungersunartumiippoq. Piummartuneruvoq inuiaqatigiinnut kusananngitsoq aserorterisorlu.
Taamaammat suleqatigiissitsisunit peqatigiilluta ataavartunik aaqqissuteqarsinnaanerput sulissutigineqarpoq, matumani ilinniartitaanerup pitsanngortinnissaa, meeqqat pisinnaatitaaffiisa pimoorunneqarnissaat kiisalu napparsimasut, pissaaleqisut utoqqaallu naleqquttunik atugaqalernissaat salliunneqassallutik.
Tamakkuupput Inatsisartuni nunatsinnilu sulinitsinni kajumissutsimik pilersitsisut siunertarisagullu.
/ Jesper Enevoldsen