Oqalugiaat taannaavoq unitsinneqartoq oqaluttarfimmiit, Tillie Martinussen saqqummiussilluni arlaleriaq unitsinneqaqattaarpoq siulittaasumiit:
Novembari 12-iani.
Siullermik Kalaallit Nunaanni piffissaq aningaasaqarnikkut ingerlalluarfiuvoq, kisianni aningaasaqarnermik politikkimi aningaasanut inatsisinik imminnut atanngitsunik akuersissuteqarniartuarpugut.
Aalisarnerup siunissamik appariartornissaa, innuttaasut utoqqaat amerliartornerat, inuussutissarsiornermi ingerlatsinerit annertuallaarnerat/annertuallaalernissaat, inissiaqarnermi kinguaattoornerput, isumaginninnermi paaqqinnittarnermilu kinguaattoornerput kiisalu atuarfeqarnermi annertuumik kinguaattoornerput isummerfigineq ajorpagut.
Utoqqaat, meeqqat inuusuttullu navianartumiittut, tarnikkut napparsimasut, timikkut napparsimasut minnerunngitsumillu inissianik oqoqartunik attartortut, angerlarsimaffiit ammalluinnartut, inissiat nillertut aserfallannikullu – tassunga ilanngullugit utoqqaat taakkunani najugallit – ikiorneqarneq ajorput tamannalu aningaasanut inatsimmi uani ilimanarani.
Pingaarnersiuinerit meeqqat aamma kigutiminnik narlorsaatissanik pissrsisinnaanngitsut kigutaattut equngatigaat.
Ajoqaaq taanna anguniagaqarluarfigineqanngimmat, ajoqaaq tusarlugu aningaasanut inatsisini amigartooruteqarneq oqimaaqatigiinngitsoqartorlu aamma Missingersuutit pillugit inatsimmi pgf. 2-miit 5-imut malinneqannginnissaat kissaatigineqarmat.
Siorna aningaasanut inatsimmi ukioq mannalu aningaasanut inatsimmi isumaqatigiissuteqartut akornanni akisussaassuseqannginnermik pisuutitsiniaasoqarpoq. Taamatummi oqartoqaqqusaanngilaq. Eqqortorli tassaavoq pingaarnersuiunissaq apeqqut pineqartoq. Isumaqatigiinniarnerni annertuumik ajattaattoqarpoq, eqqortorli tassaavoq piffissami qinigaaffiumi politikerit tulleriinnilersuinertik inissittariaqaraat nappanneqarsinnaasumillu aningaasaqarnermik politikkimi akisussaassuseqarnissaat. Aamma piffissap uuma kingorna.
Akiitsoqartualersarpoq, ukiuni piffissap ingerlanerani siuariartorfiunerpaani, suliniuterujussuarnut pitsaasumik aningaasalersorneqanngitsut, aningaasatigullu iluanaaruteqarfiunngitsunut. Mittarfinnut, imermik nukissiuutinut, Inatsisartut inissiaannut allanullu taarsigassarsinikkut aningaasalersorneqarluarsinnaasunut ingerlanneqarnerallu amigartoorfiusunut, tassungalu peqatigitillugu utoqqaat, meeqqat inuusuttullu, atuarfiit ilinniarfiillu saniatigut aningaasaliisoqarnissaa, inuunermi atukkanik pitsaasunik, inissiallu pisoqaaneri aserfallassimanerilu pissutigalugu matuneqartiaqartunut ikiorserneqarnissaq amigaatigaat.
Peqqinnissaqarfik annikippallaanik aningaasalersorneqaannanngilaq, meeqqanut inuusuttunullu atugarliortunut iliuuseqarnissat naammattut amigaatigineqarput – taamaalillutik naggataatigut imminnut toquttarlutik – kinguaassiuutitigut innarliinerit kingorna kingusissukkut kingunerlutsitsinernik katsorsaasarnermut aningaasat amerlanerusut aamma amigaatigineqartuarput.
Aamma angerlarsimaffinni nakuusertarnernik iliuuseqartarnissaq pinaveersaartitsinissarlu, atornerluisarnermik pinaveersaartitsinissaq, inuttatsinnut sulisunut pitsaasunik piffissarlu eqqorlugu isumaqatigiinniartarnissat amigaatigineqarput, imminullu nappassinnaanerusumik pitsaanerusumillu siuariartortitsilivissinnaasunik aaqqissuusseqqinnissat aallartinneqarsinnaagaluartut ilanngaatit iluaqutaarpiartussaanngitsut pilersaarutigineqarlutik.
Akiliisitsiniariaatsimik akisuumik nujaqanngitsunik nujaajaasussanik piitsunillu piiaaviusussanik aallartitsiniarpugut – ullumikkut misilerarsinnaaleriikkatsinnik – aningaasaliineq akisooq aningaasaliinermut naleqquttumik pissarsiviusussaanngitsoq tassungalu peqatigatigitillugu apereernerani angerlarsimaffeqanngitsunut ikiuutaasussaanngitsoq.
Angerlarsimaffeqanngitsut kiisami salliutinneqaramik nuannaartut. Naamik neriorsuuterpassuit eqqortinneqarneq ajorput.
Quianaannarpoq innuttaasullu avataanit isiginnaarput, siunissamilu siuariartornissamik imaqanngitsunik neriorsuuteqartoqarluta tatiginninnerat atornerlullutigu.
Siuariartortoqanngippat oqassaagut allat pisuussutigigaat.
Taamatut ingerlasoqarnerani utaqqinneqarsinnasunut 6 milliardit tikilllugit attarttukkat aningaasalersorniarlugit akitsuutit immaqa qaffassavagut, innuttaasullu soraarnerussutisiaminni immaqa ilanngaauteqassapput qaammammulu 200 kr.-t missaanni akissarsissallutik ”sulinerulerluarsinnaallutillu”.
Tamanna innuttaasut pissarsissutigissagaat oqarniarsarigaanni pikkorilluartoqartariaqarpoq.
Naalakkersuisoqatigit immaqa tapersersorneqanngitsut immaqalu, immaqalu partiini naalakkersuisoqatigiinni marluusuni akunnerminni tunuliaqutiminnullu ilisimatitsisoqatannginnera atuarfimmi anitsiartarfimmi ippassaq nuannassimanermit igalaaminikut sanernissaannut saligutit angisoorujussuusariaqarput.
Igalaaminikut tassaapput innuttaasut takorluugaat maangaannartut tassaapput, peqatigitillugulu poltikeriusut annertuumik kusanartumillu eqqaamaneqateqarnissarput anguniartillugu, qaartartut qineqqusaarnermi neriorsuutigut KIISAMI pitsanngorsaatissanik takorluukkatsinnik aseruisut. Tassunga taarsiullugu takorluukkagut maangaannartut maannakkut sanissavagut. Aammaarluta.
Aalisartut siuariartornissarput qulakkeermassuk qujanaq, MSC-mit akuersissutit pillugit qujanaq, neriunarporlu aalisarnerup ingerlatiinnarneqarnissaa kissaatigineqassasoq. Kisianni aalisartut ilaqutaat ikinngutaallu ilaquttaminnut pisuujunerusut takkukkaangamik, kigutinut, illunut peqqinnissamut naviananngitsumik inissiassamut, pitsaasumullu, utoqqarnut kalaaliminissanik aningaasanik kingunerluutillu katsorsarnissaannut aningaasanik qinullutik, aalisartut ilaqutaasullu eqqaamasariaqarpaat, politikerimik sumiffiinnik inunnillu katsorsaasinnaasunik pututinneqarlutik – tamarmillu imatut iluatsitsitiginngitsut ikioqqunissamik qinnuivigisinnaasamik isertitaqarluartartunik ilaqutaqarlutik.
aningaasanut inatsimmik kinguartitsineq ataatsimik ataasiinnarmillu siunertaqartariaqarpoq: aningaasaqarnermik politikkimik imminut nappaasinnaasumik isumaqatigiissuteqarnissaq, aningaasat kaaviiaartut amerlavallaarnerisa appartinneqarnissaat, suliffeqarnerup allanngortinneqarnissaa taamaalilluni immikkoortunut pisariaqartitsiviusunut sulisussarsiortoqassalluni innuttaasunillu ikiuerpiarluni sulinissap aallartinnissaa, aningaasanullu inatsit sunniuteqartoq inuillu tunngavigalugit nappanneqarsinnaasoq taperserneqarluni.
Atuarfinnut, illunut, peqqinnissaqarfimmut, ilinniarfinnut, pinaveersaartitsinermu siusissukkut suliniuteqarnernut annertuumik aningaasaliigitsi. Nunatsinni piginnaasaqalersitsiniarluni sulisussarsiorniarlunilu Naalagaaffeqatigiinnermi suleqatigiinneq atorsiuk, uummatisi ammarsigit, aningaasanut inatsimmi nammatassat agguaateqqissaaat eqqumaffigisiuk eqqarsaatigalugulu, taamaalilluni nukisut pisariaqarfiinut atorneqarniassammata.
Tamanna annertungaartumik pisariaqartinneqarpoq.
Tamanna angerlarsimaffeqanngitsut inissaqalernissaannut atorsiuk, meeqqatsinnut atugarissaarnissaannullu ilinniagaqarnissaannullu atorsiuk, ilinniartitsisunut, innarluuteqartunut, inunnut isumassuisunut, imminut ikiulernissamut aningaasaliinernut, innuttaasutsinnut, napparsimasortatsinnut, sanngiitsortatsinnut naviartumiittunullu atorsiuk.
Aningaasat nukittorsarnissaannut atorsigit!
Assassinnik isaaffigisigit, kikkut tamaasa ataatsimoorfinni ilanngutitissigit, aningaasat inuussutissarsiortut ingerlatsillualernissaannut atorsigit – entreprenørinut angisoorsuaannaanngitsunut aammali suliffeqrfinnut mikisunut akunnattumillu angissuseqartunut tamanut.
Sanaartugassarujussuarnut uagutsinnullu inissiassanut aningaasaliisinnaagutta, innuttaasunut inissiassaannullu aningaasaliissutinut naleqqutissapput. Naalakkersuisummi Inatsisartullu sanngiitsut ikiussanngikkunikkit sumut atorneqassagamik. Pisuut imminnut isumagisinnaapput isumagisariaqarlutillu.
Nunaqqatigut putumit taartumit qaqinissaannik ikiorneqarneqassapput.
Assasi taakkununnga isaassigit!!!
Maani allaffinni ungalusimanitsinnit anillakaassaagut, innuttaasunut ulluinnarni takuneq ajukkatsinnut ANILLAKAASSAAGUT. Inuit ingerlalluanngitsut, qajannarsisimasut, aalakoortut, annilaangasut, kiserliortut, qiiasut, perlilersut nikallorujussuarsimasullu. Suliffissaqanngitsut, tarnikkut napparsimasut, innarluutillit, inuusuttut, takorluugaqartut, inuit inuummarissut tamatta inuuvugut. Isaatigut isigisigit piffissamilu oqaluttuarisaanermi siuariartorfiusumi sunik atorfissaqartitsinersut aperalugit.
Akipput!
Nunatta siuariartornera ILUAQUTISSARSIVIGISSAVAAT. Uagutsinnit IKIORNEQASSAPPUT.
Maani uagut pilluta, namminiussutsitsinnik akersuunninnitsinnillu ulapputeqarpallaarpugut.
Innuttaasut pillugit maaniippugut.
Tamanna aningaasanut inatsimmi anguniaqarani allaaserineqarnikuuvoq. Taanna inuuttaasut pinnagit politikerinulli suliaavoq.
Aningaasanut inatsisip naammassinissaata kinguartinnera, akisuussaassuseqarnissamik aalajangiinissamut, innuttaasutsinnut pitsanngorsaanissamut, ikiorneqarnissamik pisariaqartitsisunut pitsanngorsaatissanut atorneqarli.
Taamaammat Naalakkersuisut kisiisa isornartorsiornissaannu piffissaq oqaluffissaq atornianngilarput. Kikkut tamarmik maaniittut akisussaaffeqarput. Akisussaassuseqartumik aningaasanut inatsisileqalernissaq suleqatigiissutigissavaput. Immaqa ukiorpassuarni siullermeertumik, aammali asannissuseqarluta.
Taamatut oqaaseqaluta siunnersuutip uuma suliarineqarnerani taaseqataassanngilagut. Piffissami uani atorneqartussatut ilisimariikkatsinni kikkut tamanna angusariaqarnikuuaat.
Isumaqarluinnarpugut imminiussuserput eqqarsaatigiinnarlugu innuttaasut aqullaartinneqartuartarnerat tukattuusoq alianartuusorlu.