Nalakkersuisoqatigiit sapiissuseqarnermut, akisussaassuseqarnermut peqqinnermullu akerliujuarput. Tamakku ukiaq manna isumaqatigiinniarnerit eqqarsaatigalugit imaqanngitsutut isikkoqarpoq.
Akisussaassuseqarneq?
Siuttunut attaveqaatinut aningaasaliinerujussuit kingunissaat innuttaasunut inatsisartunullu isertuunniarneqarpat.
Akisussaassuseqarnerua akitsuutinik nutaanik atuutilersinngikkutta akissarsiaqartunullu nalinginnaasunut aningaasartuuteqalersitsinngikkutta sulisartut peqatigiiffii tunuarsimaassasut
Il.il.
Sapiissuseq?
Sapiissuseqarnerua meeqqat nerisassaannik atuarfimmi aaqqissuussinernit aningaasanut tigusigaanni, inuiaqatigiinni tungavissatsinniit.
Inuiaqatigiinnut sunniutissaanik nalorninartumik suliffeqarfiit akileraarutaannik appaaneq sapiissuserunerua. Sunniutituaa immaqatassaasaaq siuttut suliniutaannut akiliutissanik pissarsiaqarneq, ERSINNGITSUNIK akileraaruiineq sanngiinnerusunik eqqueqqittoq.
Sapiissuserunerua utoqqaat 1,3%-inik aaqqiivigineqarnerat, tamassumalu kingorna arsaaqqillugit.
Il.il.
Peqqissuseq?
Ilaatigut katsorsaanissamut periarfissat ilaat peerlugit nutaallu atuutilersinnagit peqqinnissaqarfimmi tamarmi sipaarniarneq peqqitsitsilissava.
Pissakinnerusut eqqorlugit taamaammallu inuussutissat peqqinnartunut akisoreeqisunut akissaqanngitsunut akitsuusiineq peqqitsitsilissava.
Inissiat oqunarunnaarniassammata iluarsaatinnginneri peqqitsitsilissava.
Inissiat imatut akisutigineri peqqinnittartumut inuunissamut akissaqartoqarani peqqitsitsilissava.
Il.Il.
Akisussaassuseqarneq, sapiissuseqarneq peqqinnerlu tassaapput:
Inuiaqatigiinni aningaasaliinerit pillugit piffissaagallartillugu iliuuseqarneq (issuagaq Mærsk), imatut paasillugu inuiaqatigiit tamarmik siuttuinnaanngitsulli ineriartorsinnaaniassammata pitsaasunik tunngavissaqartitsilerneq.
Nunatta aqunneqarnerani ersarissunngortitsigitsi ammasumillu ingerlatsileritsi.
Ikinnerussuteqartut ataqqisigit.
Sapiissuseqarneq tassaavoq qitiusumik allaffissuarmi annertungaartumik sipaarniarneq.
Sapiissuseqarneq tassaavoq inuit suleruluttut upperineri qitiusmiillu immikkuuluattuni aqqunnagit.
Sapiissuseq tassaavoq inuussutissarsiutit pisortat suliakkiinissaannik pisariaqartitsinatik ineriartorsinnaanernnut sinaakkusiineq il.il.
Peqqinneq tassaavoq peqqinnartunik akilerneqarsinnaasunillu inissiaqartitsilerneq.
Peqqinneq sapiissuseqarnerlu tassaapput nunat sanilliukkusutatinnut assingusinnaasumik peqqissutsimik neqeroorutit ingerlatiinnarnissaannut nunatut mikivallaarnitta nassuerutiginera. Tamanna pillugu naalagaaffeqatigiinnerup iluani suleqatiginnikkumagitsi.
Peqqinneq tassaavoq kikkut tamarmik peqqinnittunik toqqarneqarsinnaasunik pisinissaannut tamanut periarfissaqartitsineq (akissarsiat, inissiat akikitsut, kalaallit tunisassiaasa akitsuutit qaffannagit eqqussukkanut unammillertinniarneri).
Peqqinneq tassaavoq meeqqat tamarmik qaarsilaarnissaasa isumaginera atuartinneqarsinnaanerallu, misissuinerimmi tamarmik takutippaat pitsaanerusumik ilinniagaqaruit inuunermi peqqinnartunik isumatusaarlunilu toqqaanissap ilimanarnera annertunerulissasoq.