Naak ippassaq akerliussutsimik takutitsinermi nipituumik nilliasoqaraluartoq partiit naalakkersuisoqatigiit tusaanianngilluinnarput.
Innuttaasut naammagiliilerput.
Akitsuutit piinnarnagit, suulli tamaasa pillugit.
Atugarissaarneq ajorsiartorpoq tamannalu malugisinnaavarput.
Ippassaq Inatsisartut saavanni, illoqarfinni allani arlalinni Facebookimilu nillianerit akisuasut tusaasimanngikkaanni tupinnaannartumik tusilartoqarsimassaaq.
Inuit akitsuutit qatsutiinnanngilaat, politikerit, pissaanermik atornerluineq, tusaajumaneqannginneq qatsuppaat, navianartumiittullu sinnerlugit suaartarusullutik.
Meeqqat inuusuttullu, peqqinnissaqarfik, inissiat, ingerlarsimaffeqanngitsut, kingunerlutsitsisut, navianartumiittut, inuusuttut ilinniagaqartut, innarluutillit atugaat, utoqqaat kisimiittut nerisarluttut ajortumillu paarineqartut… Allarpassuarnik taasaqarsinnaagaluarpugut.
Innuttaasut tusaaneqannginnamik nipituumik sakkortuumillu nilliapput
Tusaaneqanngillalli. Ajoraluartumik.
Allannguisoqanngilaq immaqa maannakkorpiaq qinersinissaq annilaangaginerpaagamikku.
Naatsorsuutigaat iluareqqusaarluni ungasitsikkut arlalinnik akuersisoqassasoq, aningaasanut inatsimmi pingaarnersiuinerit allanngortinneqassasut, suliniutit sunniuteqarpianngisut pillugit nutaarsiassarpassuarnik saqqummiussillutik – taavalu pisarnertut ingerlanissaq naatsorsuutigaat.
Sooq?
Tamannami atorsinnaajuaannarnikuuvoq.
Allanik nikarsaaneq, inuttut qanoq ittuunerannik saassusineq, illuatungiliuttunut uumissuineq pissutigalugu – naak innttaasunut tunngaviusumik kamakkaluarlutik – avataaniititsipput, allat pillugit oqaasipiluit atorpaat, Ataatsimiittarfimmi, isumaqatigiinniarnerni piffissalu ingerlanerani naapertuillartumik piffissarlu eqqorlugu akerliunerit – tamakku tamaasa oqaloqatigiinnissutigerusuppianngilaat.
Aap, Illuatungiliuttut maannakkut sakkortusaalerput.
Kisianni qaammaterpassuarni ukiorpassunngungajalersuni pissuseriissaartartuarnikuuvugut.
Naak ajortitsiniartoqartaraluartoq, kusanngitsumik iliortoqartaraluartoq, Ataatsimiittarfimmi nipangersarneqartaraluartugut, illuatungiliuttuni ilaasortanik inunnik tatititsiniaasoqartaraluartoq.
Suleqatigiissitsisut ilaasortarput ataasiinnaasoq atorlugu atugarissaarneq, meeqqat inuusuttullu navianartumiittut, angerlarsimaffeqanngitsut, ileqqorissaarluni oqaluttuarnissaq, ikinnerussuteqartunik illersuinissaq pillugit oqariartuut uteqattaartuaannarnikuuarput.
Isornartorsiuivigaangatta ileqqorussaarluta taamaaliortarpugut, isornartorsiulli akueriuminaattarpoq, inuiaqatigiimmi akornanni inuuneq amerlasuunut nuanniitsuuvoq
Alianarnerpaajusorli tassaavoq nunatsinni inoqatitta amerlanersaasa Ataatsimiittarfimmi sunik aalajangiisoqarnera inuuniarnermi atukkanut apeqqutaasorujussuit ilimanngimmassuk.
Maannakut, pingaartumilli siunissami.
Akisussaafferujussuuvoq, tamanna Inatsisartuniikkaanni tamakkiisumik ilisimasariaqarpoq.
Kikkut tamarmik tamanna paasilluarnikuunngimmassuk alianarpoq.
Ippassaq akerliussutsimik takutitsinermi uanga, Tillie, arlaleriarlunga qullipippunga.
Akerliussutsimik takutitsisuniit oqaatsit sakkortuut pissutiginagit, kisiannili inoqatitta naaggaarsinnaaneq kiisami paasimmassuk. Oqartariaqarlutik.
Imminut tamanna tuppat amerlasuunut tussaaq.
Inatsisartut avataanni najugaqartut, sulisut inuusullu pinnagit allat pillugit aalajangiisarneq pitsaanngitsuusoq.
Inatsisartut avataanni najugaqartut, sulisut inuusullu pinnagit allat pillugit aalajangiisarneq pitsaanngitsuusoq.
Nunatsinni kusanartorsuarmi.
Ataatsimuunngikkutta taamatut iliorsinnaaanngilagut.
Pingaartumik innuttaasut peqatiginngikkutsigit.
Putusaaneq, takunaveersaartitsineq, Ataatsimiittarfimmi uagutsinnik nipangertitsiniaaneq naammakkunnaarput.
Innuttaasut maannakkut imminnut oqaluussinnaapput, internetikkut, oqarasuaatikkut pitsaanerusukkut, tusagassiuutit isii siutaallu aqqutigalugit.
Siuttutoqqat nungullarnikut, kisimiilluni ingerlatsinissamik eqqarsaatitoqaq, naalagarsuit, Ataatsimiittarfimmi eqqunngitsumik oqalussinnaaneq, allagaatit uppernarsaatit isertukkatut, allamut sangutitsiniarneq aamma ileqqutoqaavoq atorneqarsinnaajunnaarnikoq.
Inuttaasut isummaminnik anitsinikuupput.
Sooq tusaanialinngillat???
Nakkarsinnaasut nakkaannariarlik.