Innuttaasut nalinginnaasut naalakkersuisut partiillu tapersersortaasa isertortumik pilersaarutaannik akiliinerisa una ilagiinnarpaat.
Missingersuutit oqimaaqatigiinnissaat utoqqatsissutaavoq!
Naalakkersuisoqatigiit aningaasanut inatsip oqimaaqatigiinnissaannik utoqqatsernermikkut kinaanivitsik takuteqqiinnarpaat. Meeqqaniit immikkoortuniillu tamanit pitsanngorsaavigineqarnissamut pisariaqartitsivissunit tigusivugut. Ataatsimiititaliarsuarnilu assigiinngitsuni politikerinut nipangiusimasussaatitaasunut, suliffeqarfinni pisortat pigisaanni tamani akisoorujussuarmik atorfinitsitsinernut tunniullugit. Sunik suliaqassanersut aningaasallu suut atorneqassanersut sunillu kinguneqassanersut inunnut nalinginnaasunut isertuussaavoq.
Aamma soraarnerussutisiaqartut procenterujussuarmik 1,3%-imik aaqqiivigineqarnerat mamianartorujussuuvoq. Illuatungaatigut akitsuutinik, sipaarutinik aningaasartuutinik amerlanerusunik qaffaammik taassuminnga qalili atuiffioreersunik suliaqartoqarpoq. Naalakkersuisoqatigiinni politikerit sooq utoqqaat ataqqinartumik utoqqalisinngilaat, tassani ernguttat nukatsilaarnissaannut inissaqarluni.
Oqimaaqatigiissitsilerniarluni allatut iliornissamik Suleqatigiissutsisut naalakkersuisoqatigiit arlaleriarlutik kiminniarsarinikuugaluarpaat, pitsaanerpaamillu iliortoqaraangami illuatungiliuttut allat assigalugit soqutigineqarneq ajorlutik.
Kommunit oqallinnermi uana ersarissumik nipaanerannut tulluartumik, innuttaasui naalakkersuisoqatigiit tamat oqatussaanerannik paasinninnerannit sakkortuumik eqqugaassapput.
Nuuk nipangersimavoq, siuttuimi mittarfittaassapput, kommunillu sinnerit Aasiaat pinnagit naalakkersuisoqatigiit borgmesteriinit aqunneqarput.
Minnerpaamik innuttamik inuuniarnerminni atugaasa ajortikkaluttuinnarneri soorlu tamassuma ajunnginneranik isummatik nassuiartariaqarpaat.
Aaqqiissutissat suuppat!
Isornartorsiuigaanni pissuserissaarneq tassaavoq aamma piviusorsiornissaq aaqqissutissanillu saqqummiilluni.
Inuussutissarsiutit tunngavittalu (meeqqat, atuarfiit, inissiat, isumaginninneq, peqqinnissaqarfik) pitsanngorsaaffiginissaannut periarfissat uteqqiinnarneqassapput.
Uani pakatsineq tassaavoq, naalakkersuisoqatigiit namminneq pullartatik kisiisa takorusuinnaraat, piviusunilu Inatsisartut illuatungiliuttullu tamat oqartussaaneranni sunniuteqarnissamut periarfissaat suut tamaasa atorlugit killilerlugit.
Aaqqiissutissaq tassaavoq qinersinissamik neriunneq, innuttaasut taamaalilluti taamatut aqutsineq ajunnginnersoq imaluunniit innuttaasut qitiutillugit tamat piviusumik oqartussaaqataanissaannik kissaateqarnerlutik qinersiniassammata.