Demokratimik ingerlatsiviulluartut suulluunniit tusagassiuutit kiffaanngissuseqartut tapersersortarpaat pingaartigillu. Tusagassiuutit nunani kiffaanngissuseqarluni inuuffigineqartuni naalagaaffimmi pissaaneqartut sisamaattut taaneqartarput, tassa innuttaasut sinnerlugit oqaaseqartaramik pissaanillillu nakkutigisarlugit.
Taakkununnga aningaasaliissutit Aningaasanut inatsinni ikisilinneqarput, tamanna akuerineqarsinnaanngilaq. Aaqqissuussinitoqqamut tusagassiuutinullu aningaasalersuinitoqqamut uteqqissaagut.
Ikilisaanerit siorna aaqqissuussinitoqqamut uteqqissaagut, tusagassiuutit kiffaanngissuseqartut sumulluunniit attuumassuteqanngitsut qulakkiissavagut tapersersorlugillu, politikeritta tamassuminnga sorsuutiginninnissaannik piumasaqarfigissavagut.
Pissaaneqartut aalajangiineri pillugit nutaarsiassat innuttaasunut oqaatsit paasisinnaasaat atorlugit ingerlateqqinneqartassapput.
Tusagassiuutit malinnaasinnaajumallutik naammattunik aningaasassaqassapput, Inatsisartuni, inuiaqatigiinni nunamilu tamarmi.
Tusagassiuutit innuuttaasut oqaaseqartartoraat polikerillu isornartorsiorlugit, politikerinut killilersorneqaratik ilungersunartut pillugit aperisinnaassapput, politikkimillu inerlatsisunik isornartorsiuinertik pissutigalugu killilersorneqarnissamik annilaangassuteqaratik sulisinnaassallutik.
Innuttaasut kiffaanngissuseqarnerannik annikillisitsisunik innuttaasut avaqqutiinnarlugit arlalinnik suliniuteqartoqarnera misigivarput.
Ilanngaassivik, akiliisitsiniartarfik 150 mio. kr.-nik akilik siunertarineqartutut sunniuteqartussaanngitsoq kisiannili pisinnaatitaaffiaaffiusoq kiffaanngissusiiaaffiusorlu innuttaasunillu sanngiitsumik inissisimasunut aningaasaqarneq pillugu oqaloqatiginnitsiunnaartoq.
Akitsuutit pillugit tassanngaannaq aaqqiissuteqarneq, eqqumiitsuliortut sipaarniarfigineri, atuartut pisariaqartitsisut nerisassaannik piaaffigineqartut, akit qaffattorujussuit, illoqarfinnut pingasunut akikinnerusumik angalasarnissamik neriorsuinerit – bilitsilli qaffannissaannik kinguneqartussaq aamma Inersuarmi isornartorsiuisunik unitsitsinerit pissaaneqartullu pissaanermik takutitsinerat.
Tusagassiuutit kiffaanngissuseqarnerat maannakkut annikillisinneqaqqinniarpoq!
Tusagassiuutinut aningaasaliissutit sipaarniarnikkut eqqorneqarnerat 2020-mut Aningaasanut inatsisissatut siunnersuummi aamma takuarput. Allaganngorlugu tusagassiisartut sipaarniarfigineqarput suliniutillu nutaamik aallartinneqartut aamma sipaarniarfigineqarput.
Tamakku pineranni aviisit ikitsunik sulisoqarlutik sulisariaqarput maannakkullu ikilisaaffigeqqinneqarlutik. Tusagassiorfiup nuna tamakkerlugu innuttaasunik sullissisup KNR-ip atortut aserfallannikorujussuit ajornartorsiutigai malinnaaniarlutillu suleruluttariaqarlutik. Aningaasaliissutit atorlugit namminneq isiginnaagassiorsinnaarpianngillat tusarnaagassiorsinnaarpiaratillu ukiopassuarnilu tamanna ajornartorsiutiginikuuaat.
Nunatsinni tusagassiuutit allaganngorlugulu tusagassiuutit taperserneqarsinnaajumallutik naleqqutinngitsunik arlalinnik piumaffigineqarput. Tusagassiuutinut konto aamma marlunnut 2015-imi avnneqarpoq, tusagassiuutit ingerlatsilluartut aningaasaliissutinik tassanngaannaq ikilisaaffigineqarlutik.
Maannakkut ikilisaaffigineqaqqipput, sukkuaqqatut nipangersaatitut isigiinnarsinnaasatsinnik.
Suleqatigiissitsisut kiffaanngissuseqarluni tusagassiuuteqarneq TAMATIGUT sorsuutigissavaat, nunamilu taamatut maanitut inuttakitsigisumi tusagassiuutit pitsaasumik aningaasalersorneqarlutik ingerlaannarnissaat qulakkeerniarlugu ataatsimuussaagut.
Oqaluttuaminnik oqaluttuarsinnaanerat politikerinillu uagutsinnik isornartorsiuisinnaaneat qulakkiissavarput – assuarlerneqaratik, akiliuffigineqaratik uagutsinnullu nutaarsiassaqartitsisarnerminni kiffaanngissuseqarnerat annikilissineqarani.
Tusagassiuutit kiffaanngissuseqartut saassukkaanni inuiaqatigiinnut kiffaanngissuseqartunut saassussineruvoq, atugassaannillu piaaffigalugit nipangersinniarneqarlutik. Tamanna kusanaatsuliorneruvoq.
Kalaallit Nunaat tusagassiuteqarnermi kisermaassilluni naalakkersuisoqarfiussanngilaq. Nuna kiffaanngissuseqartussaassaaq kiffaanngissuseqartunik tusagassiuuteqarluni.