Inuit Ataqatigiit, Partii Naleraq, Suleqatigiissitsisut aamma Atassut Aningaasanut inatsisissamut siunnersuummut atsioqataarusunngillat. Naak aningaasanut inatsisissamut isumaqatigiinniarnikkut naaperiarnissamik misiliiuartoqaraluartoq – naalakkersuisooqatigiit illuatungiliuttunik nipangersaapput.
Illuatungiliuttut isornartorsiuinerat aallaavigalugu naalakkersuisoqatigiit nipangersaaniarnerannut illuatungiliuttut isiginnaaginnarsinnaajunnaarput. Isumaqatigiinniarnerigaluit tamarmik isasoorput.
Innuttaasunut inuuniarnikkut sanngiitsumik inissisimasunut, angerlarsimaffeqanngitsunut, meeqqanut inuusuttunullu ajornartorsiortunut, tarnimikkut napparsimasunut kiisalu ilinniartitaanermut, inissianut, utoqqarnut peqqinnissaqarfimmullu immikkut aningaasaliiniarsarigaluarnerit naalakkersuisoqatigiinnit itigartinneqartuarput. Peqatigitillugu naalakkersuisoqatigiinnit Aningaasanut Inatsimmik akisussaassuseqartumik akuersinissaq eqqartorneqarluni.
Oqaluttuarisaanitsinni aatsaat taamak aningaasatigut siuariartorfiutigisumi tamanna isiginngitsuusaarsinnaanngilarput, isiginngitsuusaarsinnaanngilarput naalakkersuisoqatigiit akitsuutitigut innuttaasut kaasarfiinit toqqaannartumik aallerlutik Aningaasanut Inatsimmik akuersiniarnerat.
Meeqqat kigutaat narlorissarneqarsinnaanngitsut, peqqinnissaqarfik aningaasassaaleqisoq, utoqqaat utoqqalinersiamikkut qaffaavigineqarsinnaanngitsut, inoqatittalu nerisassaqaratik inuunerat taamatullu siusinaartumik utoqqalinersiat qaffaaffigineqanngitsut ilumoorsinnaanngillat. Sulisartortatta aningaasarsiaat piffissaagallartillugu Naalakkersuisunit isumaqatiginninniutigineqanngillat, qaavatigulli innuttaasut sukateriffigineqarniarput akitsuutinillu atuutitsilersitsisoqarniarluni.
Qasseeriaqaluta naalakkersuisoqatigiinnut assatsinnik isaassisarpugut, qasseeriaqalutalu inissaaleqineq, inissiat oquttut, iluarsaassassat, ilinniartut inaat amerlanerit, meeqqat atuarfiat pitsaanerusoq, peqqinnissaqarfik ingerlalluartoq, kinguaassiutitigut atornerlunneqarsimasunut ikiorsiinerit, meeqqanut inuusuttunullu angajoqqaavinullu atugarliortunut ikiorsiinerit, kigutigissaanermut tunngasunik pitsanngorsaanerit kiisalu utoqqalinersialinnut utoqqarnullu inuuneq naallugu sulerulussimasunut atugassarititaasut naapertuuttut aallunneqarnissaat kissaatigalutigit oqaaseqartarsimavugut.
Peqatigitillugulu angallannermut akit qaffannginnissaat oqaatigineqartarpoq, taamaattorli qaffattarput. Inuit SIK malillugu aningaasarsiallit angalanissaminnut akissaqanngillat, taamatuttaaq utoqqalinersiallit ikiorsiissutinillu pisartagallit qaffaaffigineqarnissamik neriulussinnarput. Pissutsillu ajorseriarfissaattut kommunit nammatassaat annertusineqarput, innuttaasut atugarissaarnerisigut toqqaannartumik eqquisussat.
Aaqqissuussaanikkut nutaamik aaqqissuusseqqinniarneq ataasiinnarluunniit naammassineqarsimanngilaq, utoqqaat, meeqqat inuusuttullu atugarliortut, peqqinnissaqarfik allalluunniit naalakkersuisoqatigiinniit neriorsuutigineqarsimasut pitsanngoriarfiusimanngillat. Qineqqusaarnermi neriorsuutit unioqqutinneqartuarput, piffissamilu sivitsortumi suleqatigiinnermik timitaliinissamik neriuuteqarluta utaqqimaarsimavugut. Suleqatigiinnissarli pisinnaasimanngilaq. Iluareqqusaarneq aallaavigalugu qanorlu politikkikkut eqqarsartaaseqarneq kisiat aallaavigalugu suliassanik ingerlatsiniarsarineq taamatut kinguneqarpoq.
Qasseeriaqaluta eqqunngitsumik paasissutissiinerit siammarneqartut takusarpagut, uppernarsaatit isertugassanngortinneqartarput, illuatungiliuttullu tatiginninnginnermik taasititsinissamik saqqummiiniaraluaraangamik nipangersarneqartarput, oqaluttarfimmit ataqqinarnerpaamiit isornartorsiutinik saqqummiiniaraluartillutik unitsinneqartarlutik. Tamanna tamat oqartussaanerannik nungutitsiniaaneruvoq, innuttaasut mitallerneqarput, akuerineqarsinnaanngilluinnarporlu. Taamaattumillu peqatigiilluta nipituumik ersarissumillu naaggaarpugut. Isornartorsiutit naalakkersuisooqatigiinniit unitsinneqassanngillat.
Naak illuatungiliuttuusugut assigiinngikkaluaqaluta peqatigiilluta maanna periuserineqartunut peqataaniarata misigisimagatta killiliivugut.