Innarluutillit illersuisuata tarnimikkut napparsimasut sinnerlugit suaarutaa, tassaavoq tarnimikkut napparsimasunut qanigisaasunullu tunngatillugu ajornartorsiuterpassuit ilaannaat.
Innuttaaqatigut tarnimikkut napparsimaleraangamik suut tamarmik annaasarpaat isumalluutigingaatsiarsinnaasaminnillu ilaqutaqanngikkunik qaqeqqinngisaannassapput.
Inuiaqatitsinni tarnimikkut napparsimasut inunnut naleqqutinngilluinnartumik pineqartarput. Siullermik tarnit nakorsaannit nappaatip suussusersineqarnissaa ajornakusoorpoq, pitsaasumik pissarsiaqarnartumillu oqaloqateqarnissaq ajornakusoorpoq, ajunngilluinnartumillu nakorsaaserneqarlunilu nappaammik suussusersiivigineqarnissaq ajornarluni. Tamakku pisinnaagaluarpata tarnimikkut napparsimasorpassuit ajunngitsumik naammassisaqarluarsinnaallutillu inuusinnaassagaluarput.
Tulliattut ilisimasakissutsip aqqani inuiaqatigiinnit ajattugaalersarput, ilaat atukkatik pillugit paasineqarsinnaanatik ilaquttaminnit ajattugaalersarput, amerlasoorpassuit katsorsarneqanngitsoorlutik aanngajaarniutinik atornerluisunngortarput ilaallu angerlarsimaffeqanngitsutut inuulersarlutik.
Ilaat piffissaagallartillugu katsorsarneqarsimannginnertik peqqutigalugu pinerluttuliortunngorlutik pillagaasarput innuttaasullu tarnimikkut napparsimasut amerlasuut uummatinngulaarnartumik atukkatigut ilungersunartorsiortaqaat.
Ilaat nikallungarujussuarnermik sorsuuteqartarput inuunermiluunniit atukkatigut ilungersungaaramik imminut toqunnermik kinguneqartarluni.
Tamakku tamaasa inuiaqatigiittut pingaartittuugutsigit katsorsaanissaq periarfissaagaluarpoq.
Tamanna kusananngilluinnarpoq.
Meeqqat tarnimikkut napparsimanertik pillugu pisariaqartitsisut systemimi piumasaannarmik eqqakattarneqalersarput angajoqqaallu meeqqatik najummilluaqqissaartariaqartarpaat. Atuarfiit, peqqinnissaqarfik isumaginnittoqarfillu meeqqanik taamaattunik sullissinissamut naleqqutinngilluinnarput.
Tarnikkut nappaatilittut nappaatip suussusersineqarnissaa eqqortumillu ikiorneqarnissaq kiisalu malinnaavigineqarlunilu oqaloqateqartarnissaq pisariaqarluinnarpoq. Qanigisaasut ullut tamaasa imaluunniit ukiut tamaasa ilaquttatik tarnimikkut napparsimasut pillugit qissattuarput. Inuit nissuminnik napisut sivisuumik utaqqisarlutillu kukkusumik katsorsarneqartartuuppata imaluunniit katsorsarneqanngitsuuppata akuerinavianngilluinnarparput, tamanna innuttaaqatitsinnut tarnikkut napparsimasunut atuuppoq. Suliassaqarfilli aningaasaliissutinik sulisunillu amigaateqarpoq inuiaqatigiillu tamakkiisumik isigissagaanni ajattuineq ilisimasakissuserlu atuullutik. Tamanna piaartumik aaqqiivigisariaqarparput.
Tarnikkut nappaatilinnut systemimik pitsaanerujussuarmik pisariaqartitsisoqarpoq, nunani avannarlerni nuanarsuarmilu ilisimatusarnernit paasisimasat pisariaqartinneqarput akulikitsumillu nunarsuarmi nakorsaatit ineriartornerat pillugu nalilersuisoqartariaqarpoq, sulisut pikkorissut pisariaqarput minnerunngitsumillu suliassaqarfimmut aningaasaliissutit annertusangaatsiarneqartariaqarlutik. Inuiaqatigiinni aningaasat, sulisut ilisimasallit tarnikkullu nappaatit pillugit ilisimasat atorfissaqartinneqarput aammattaaq qanigisaasunik ikiuinissaq qulakkeerneqartariaqarluni.
Isumaginnittoqarfimmi meeqqat inersimasullu ikiorneqaratik imminut isumagisinnaanngitsunut tarnimikkullu nappaatilinnut tigooraaveqartariaqarpoq.
Suliassaq ajornartorujussuartut isigineqassanngilaq suliassatulli inuiaqatigiinni atugarissaarfiusuni pisariaqartinneqartutut, nalinginnaasutut naatsorsuutaasutullu isigineqassaaq.
Tarnikkut napparsimaneq paquminartuunngilaq iluameersumillu aningaasalersorneqarlunilu sammineqassaaq.
Inuit tarnikkut napparsimasut naleqassutsimik, asanninnermik, attaveqarnermik inuttullu allatulli inuulluataarsinnaanermik misigisaqarsinnaatitaapput.
Amerlasuut angerlarsimaffimminni uninngalersarput, kiserliulersarput, imminut mattuttarput systemillu kukkuluttorneratigut tarnimikkut napparsimaneruliinnartarlutik kiisalu immaqa ilaquttaminnit ungasissumi najugaqartarlutik imaluunniit ilaqutaasa pulaarnissartik qunugilersimasinnaasarpaat.
Ilaqutariit tarnimikkut napparsimasortallit ajutuuinnermi ikiuutissanik, oqaloqateqarnissamut periarfissanik, nappaatinik suussusersinissamik, qanigisaasunut oqaloqateqarnissamut qisuariarnissamullu sakkussanik kiisalu systemimik iluameersumik innutaaqatitsinnik taakkuninnga isumaginnilluartumik annertungaatsiartumik pisariaqartitsipput.
Tarnikkut nappaatillit avaanngusungaarlutik aqqusinikkut ingerlaarujoortarput imaluunniit aanngajaarniutinik atornerluisunngorsimasarput, inuunerannilu atugaat takullugit uummatinngulaarnanngitsuunngilaq.
Najugaqarnissaq kimulluunniit pingaaruteqarpoq inuillu nammineerlutik imminut isumagisinnaanngitsut ulluinnarni ajunngitsumik ingerlanissaminnut ikiorneqartariaqarput.
Tarnikkut nappaateqalernissaq nammineerluni aalajangerneqarneq ajorpoq inuiaqatigiinnilu kikkulluunniit eqqugaasinnaapput.
Taakkuninnga ajattuineq peertariaqarparput tarnikkullu nappaatilinnut systemimik iluameersumik inunnullu naleqquttumik pilersitsinissamut aningaasanik nukinnillu atuisariaqalerpugut.
Naalakkersuisut ukiorpassuit qinigaaffiillu taarseraattut ingerlaneranni suliassaqarfimmik pingaartitsinerat amigarsimavoq pingaartitsilernissaallu pisariaqarpoq.
Tarnikkut nappaatilinnut atugassarititagut kanngunarluinnarput.