Meeqqat atuarfianni ilinniartitsisorpassuit atuartut immikkut pisariaqartitsisut pisariaqartitaannik isumaginnissinnaanngillat. Ilaat ilinniaqqinnissamik periarfissaqartarput ilinniaqqinnissamulli utaqqisut amerlaqaat, immikkullu ittumik atuartitsisinnaasut amerlanngillat. Meeqqanut immikkut pisariaqartitsisunut tapersersortit ikiorneqartarnerat nersualaarneqartarnerallu annikeqaaq. Tamakkuninnga sulialinnut tunngatillugu kivitsinissaq aaqqissuusseqqinnissarlu pisariaqarluinnarpoq.
Ilinniartitsisut amerlasuunik sorsuuteqarput pingaartumilli immikkut ittumik atuartitsiviit kiisalu ilinniartitsisut innarluutilinnik, ineriartornermikkut akornutilinnik meeqqanillu immikkut pisariaqartitsisunik sullissisut ulluinnarni ilungersunartorsiortarput.
Immikkut ittumik atuartitsiviit alakkarussigit paasissavarsi ilinniartitsisut ulluinnarni aniguiniarlutik sapinngisartik tamaat sulisut, amerlanertigulli ilinniakkamikkut amigaateqartarput ilinniaqqinniaraannilu utaqqisut amerlaqalutik.
Ilinniarfissuarmi tamatuminnga pitsanngorsaanissaq pisariaqarpoq ilinniartitsisunulli ulluinnarni meeqqanik inuusuttuaqqanillu qulaani taakkartorneqartunik sullissisunut pikkorissaanerit ilinniaqqinnerillu pisariaqarputtaaq.
Pikkorissarnerit ilinniarnerillu aallunneqariaannaat suliffimmillu attassiinnarnissaq eqqarsaatigalugu sivikitsumik ingerlanneqarsinnaasut pigineqartariaqarput, kiisalu akunnerit suliffigisat pilersaarutillu ilinniartitsisut pikkorissinissaannut periarfissiisut sulinermullu skiimat taamaalillutik tamatumunnga naapertuuttumik aaqqissorneqassallutik.
Meeqqanut, inuusuttuaqqanut inersimasunullu immikkut pisariaqartitalinnut tapersersortit immikkut ittumik pikkorissarnissartik piginnaanngorsarnissartilluunniit pisariaqartikkajuppaat. Pisariaqartitsisoqaleraangat sukkasuumik ajornaatsumillu taamaaliorsinnaanissaat qulakkiissavarput. Tamanna Danmarkimik suleqateqarnikkut Ataatsimoortumillu Aningaasaliissutit aqqutigalugit aningaasaliinikkut qulakkeerneqarsinnaavoq.
Taamaaliornikkut meeqqat, inuusuttuaqqat inersimasullu immikkut ittumik pisariaqartitsisut pitsaanerpaamik isumagisinnaanngussavagut atugarissaassuserlu pitsanngortingaatsiarsinnaassallugu.
Ullumikkut ilaqutariit amerlanerit Kalaallit Nunaannit nuuttariaqartarput taamaammat innarlutillit tarnimikkullu nappaatillit pisariaqartitaat kiisalu meeqqat eqqarsartaatsikkut timikkullu ineriartornermikkut pisariaqartitsingaatsiartut, atuarfeqarnikkut paaqqinnittarfeqarnikkullu aaqqissuussaanitsigut ilanngutissallugit ilungersorluta sulingaatsiartariaqarpugut.
Inuit autismemik ADHD-millu nappaatillit imaluunniit naqinnernik ilisarinnissinnaanngitsut nukillaarnermilluunniit eqqugaasimasut atuartitsivimmi ataatsimi ataatsikkut atuartissallugit ajornakusoorpoq. Tamatuma saniatigut atuarsimasassat naapertuutinngitsut kiisalu inersimasut tapersersortillu ikippallaat pissutsinut ilaasinnaapput. Meeqqat immikkut pisariaqartitsisut pitsaasumik ilinniagaqarnissaat kissaatigigaanni pissutsit tamakku atuutsillugit kissaatip piviusunngortinnissaa ajornakusooqaaq.
Ilinniartitsisut tapersersortillu ilinniagaqanngitsut, supervisionimik neqeroorfigineqarneq ajortut, sulinermullu tunngatillugu siunnersoqatigiinnissamik kiisalu ilinniaqqinnissamut pikkorissarnissamullu periarfissaqanngitsut tamakkuninnga naatsorsuuteqarfigineqarput.
Tamanna allanngortissavarput Suleqatigiissitsisunilu isumaqarpugut tamatuminnga qulakkeerisoqassappat politikkikkut pingaarnersiuisoqartariaqartoq. Tamanna annertuumik pisariaqartinneqarpoq!
Angajoqqaat, tapersersortit, ilinniartitsisullu atugassarititaasut ilungersunarneri peqqutigalugit unamminartorsiorput, meeqqallu immikkut pisariaqartitsinissartik nammineerlutik aalajangigarinngilaat.
Taamaammat ilinniartitsisut, tapersersortit angajoqqaallu immikkut pisariaqartitsisunik meerallit pillugit, paaqqinnittut ilisimasaqarnerusariaqarput, atorfiit amerlanerusariaqarput, ikiortit salliunneqarnerusariaqarput suliassaqarfiullu taassuma ilinniarfiunissaata kivinnissaatalu akisusinnaanera nassuerutigineqartariaqarluni.
Pisariaqartitsineq piviusuuvoq meeqqallu pisuussuteqanngitsut kiisalu inersimasut allannguisinnaassusillit allannguerusuttullu aporfeqartuarnertilli peqqutigalugu taamaaliorsinnaanngitsut pineqarput. Nunatsinni innuttagut pingaartittariaqarpagut pingaartissavagullu. Una tassaavoq suliassaqarfik sumiginnagaangaatsiartoq. Tamanna allanngortittariaqarparput.