Naalakkersuit KNI-p sinerissami ”illoqarfinni unammillerfiusutut” taaneqartartuni ingerlatsilernissaa kissaatigaat. Tunngavilersuut tassaavoq nioqqutissat akikinnerulissasut. Tassungali atatillugu Suleqatigiissitsisut annilaangatigaat kioskiutillit pisiniarfinnillu piginnittut tamarmik ingerlatsisinnaajunnaarnerannik kinguneqassasoq, Brugsinilu namminersortuusoq aningaasaliinissamut tunngavissaaruttussaq.
Illoqarfinni namminersortut sumiiffinni pisariaqarfiiani ingerlatsinissaat kissaatiginarneroqaaq.
Inuussutissanik pilersuivigut eqqarsaatigeqqittariaqalerpagut..
Naalakkersuisut innuttaasut ikiorniarsarinermik eqqarsaatitik naammassinngitsoortarpaat, tassanga taarsiullugu kisermaassiniarunik eqqarsaatigeqqissaanngisanillu tassanngaannaq aaqqiiniarsarilersarput.
Ukioq manna aningaasanut inatsisissatut siunnersuummi KNI-p nunatsinni illoqarfinni tamani arajutsisaarilluni ingerlatsilernissaanik suliniuteqarneq ingerlateqqinneqarpoq. KNI kukkusumik aningaasaliiguni Nunap Karsia nateqanngitsutut attartorfissatut atussavaa.
Taamaalinerani Brugseni najukkanilu atisanik, sumiiffinni pisiniarfiutillit ulluinnarni atugassanik, iggavimmi atortorissaarutinik, pinnersaatinik tuniniaasut, kioskit nunatsinnilu pisiniarfiutillit kikkulluunniit pisiniarfinnik nutaanik, niuerfimmut nutaamut illoqarfimmulluunniit allamut NAMMINNEQ ilungersorlutik ileqqaarniartarput.
Assersuutigalugu Brugseni 500-nik sulisoqarpoq, Ilulissanilu pisiniarfiuteqarnermini iluanaarutini appasissorujussuusoq 150 mio. kr.-nik aningaaliinikuulluni..
Avinngarusimasuni nioqqutissanik allatut iliorluni pitsaanerusumik pilersuinissaq qulakkeerneqarsinnaavoq, sumiiffinnilu nioqqutissat akikinnerusariaqarnerinik isumaqarfigisatsinni piviusorsiorluta paasisariaqarparput assartuinermi akit tapiiffigineqassasut, pisiortornerup ilorraap tungaanut sunneeqatigiittarnissaa qulakkeerlugu, nutaamik iliorluta pilersuinermi periarfissat misissorlugit, namminersortut unammilleqatiginagit!
Tassa Namminersorlutik Oqartussat inuussutissarsiortut namminersortut ikiuerusukkaluarnermik ipitissavaat suliffissaarutsitsillutillu.
Nunap Karsia unittussaanngitsumik mangiarlugu namminersortut unammillerlugit pisiniarfinnik ammaanissaq aaqqiissutissaanngilaq. Aaqqiissutissaq tassaavoq sullissinissamut isumaqatigiissutitsinni allaanerusumik eqqarsartariaaseqarnissaq, taamaalilluni ersoqatigiinneq ingerlatiinnarneqassalluni, aammali namminersortut pilersitsiniarusussusiat, namminersortut najukkanilu suliffissat pigiinnarlugit
Inuussutissarsiortut namminersortut ineriartortitsinissaat aalluttariaqanngilarput niuerfinnilu unammilleqatigiiffiunngitsuni nioqqutissanik pilersuinerup toqqaannartumik tapiiffiginissaa qulakkeerlugu?
Suleqatigiissitsisut isumaqalernikuupput nunatsinni nioqqutissanik pilersuineq sumiiffiiit ilaanni ingerlalluarneqarnissaasumik namminersortut niuerfiinut iluaqutaasumik eqqarsaatigeqqinnissaa piffissanngortoq.
Avinnarusimasunut nioqqutissamik akisuumik nassitsigaangatta tassunga nassiunnissaa qanoq akeqarnersoq apeqqutaavoq – tassa nioqqutissap anngunnissaanut qanoq periarfissaqartiginersoq, niuerfimmi tunitsivissat qanoq amerlatiginersut – tassa ”containerimut akileeqataasussat” qanoq amerlatiginersut kiisalu pisiniarfimmik ingerlatsissalluni imminut akilersinnaanersoq – tassa ininut, nioqqutissanik pilersuivimmut, sulisunut, imermut, kiammut il.il. aningaasaliineq.
Illoqarfini ersoqatigiinnissaq kissaatigigutsigu – taamaaliussaagullu – nutaamik allatullu
eqqarsartariaaseqartariaqarpugut, najugaqarfinnut taakkununnga najugaqarfinnullu taakkununnga sullissinermut isumaqatigiissutit kisiisa atorlugit illoqarfinnut qanoq pitsaasumik pilersuissaagut.
Politikerilli uagut tamanna eqqarsaasersuutigissanngilarput, aningaasanut inatsimmi oqaasertaq annikitsuinnaanani tamanna politikkikkut sumukiinerungaartumik suliniuteqarfigisariaqarpoq.
Allaanerusumik eqqarsartariaaseqarnissarput piffissanngorpoq, namminersortunut iluaqutaasumik innuttaasunullu iluaqutaasumik.