Maannakkut nutaarsiassat atuarugit ajoraluartumik nikallornarpoq.
Kujataani utoqqaat illuanni paarsinermi sumiginnaasoqarsimanera pillugu Inatsisartut ombudsmandia aqqutigalugu ilanngutasseqqittoqarpoq. Oqaatigisariarpoq sumiginnaasoqartoq ilami annertoorujussuarmik.
Kommunimili aqutsisut kommunilu politikkikkut aqutsisut utoqqatsissutat ajornerpaajupput.
Siullermik sulisut sulinngitsoortarnerat pisuutinneqarpoq, aqutsisuunermi sulisunik pingaanerutitsinissaq pimoorunnagu aamma kommunalbestyrelsip aqutsisuunermilu akisussaasoqartoqarani. Paaqqinniffinni sulisut amigarput, amigaataasut ikiorsiiviginiarlugit sulisunik avataaneersunik tikisitsigitsi.
Tamassuma saniatigut ataqqinaateqarluni utoqqaanissaq qulakkeerniarlugu isumalluutinik naammattunik politikkerit akisussaasut atugassiinngillat. Eqqarsaatigeriaruk immaqa illit piffissaq sivikitsoq qaangiuppat taamatut pineqassallutit.
Assersuutigineqarsinnaavoq utoqqaat nangimut ataatsimut koruunit marlussuit sipaarneqartoqariaqartoq arlaata isumaqarnera pissutiglugu piffissat ilaanni pinngisaminnik nanginik atorfissaqartitsisartut.
Kingunissaanik kikkut tamarmik siunissaannut sunniuteqarsinnaasorujussurnik sukumiisumik nalilersueqqaarnata inuiaqatigiinni oqallittarpugut suliniuteqartarlutalu, utoqqartatsinnullu parineqartariaqartunut anikitsualuinnaat aqutsinermi pisariaqartunngortittarlugit.
Utoqqatsissutit sulisunillu pitsaarpianngitsunik atugassaqartinneqartunut pitsaanerpaamik sulisunut unnerluussutit unitsissigit immissinnullu akisussaatileritsi. Kommunimi politikerit maannakkut akuliuttariaqarput ajutoornerlu aaqqiivigalugu.
Inuiaqatigiit sanngiinnerpaanik navianartuniittunillu qanoq pinnittarnermikkut nalilerneqassapput. Pisumi uani naliliisoqartariaqarpoq; inuiaqatigiiusugut utoqqartagut ataqqinnilluta pitsaasumillu ikiorsinnaanngikkutsigit naleqanngilagut. Utoqqaat iluat paaqinniffiuvoq.
Utoqqaat inuunertik tamaat sulinikuupput inuiaqatigiinnullu aqqutissiuinikuullutik. Taamatut pineqarnatik pitsaanerusumik pineqartariaqarput. Asasagut kommunalbestyrelsi akisuussaaffik tigusiuk utoqqartagullu naleqquttumik ataqqinassusilimmik utoqqaatillugit sulisullu sapinngisaminnik suliniarsarisut sulinermi pitsaasunik atugassaqartillugit.
Qulerinngilara politikkerit ataatsimiititaliat angalanissaat sipaarfigippatigit nanginik pitsaalluartunik ukiuni arlalinni akissaqartoqalissasoq. Aqutsisullu pikkorissartinneqarnissaannut aamma sinneqartooruteqartoqassaaq, taamaalillutik sulisut sulinngitsoortarnerat naggataatigut namminneq akisussaffigalugu paasissallugu aaqqiissutissanillu nassaarlutik.
Kim Lyberth
Samarbejdspartiet – Suleqatigiissitsisut Kujalleq