Siullermik Kalaallit Nunaanni peqqissaanermik sulisunut ajornakusoortunik atugassaqarlutik suliniuteqartorujussuarnut nersuineq.
Peqqissaavimmik atuisut paasiuminaatsunik arlalinnik naapitassaqartarpoq.
Tassanngaannaq ilisimatinneqartarpugut Kalaallit Nunaanni katsorsarneqartarunnaatumik nappaateqarluni.
Taava qanoq iliussanerluni aamma paasisitsisoqarneq ajorpoq.
Tamakku inuit arlallit oqaluttuarisarpaat piviusut. Annilaarnarpoq, uggornarpoq ilaatigullu inoqatitta Danmarkimut nuunnerannik kinguneqartarpoq.
Tassa peqqissuseq pissutigalugu arlalinnik qimaasoqarpugut.
Katsorsaannginneq katsorsaanerup nakorsaatinulluunniit akisuneranik pissuteqarajuttarpoq imaluunniit soorunami immikkut ilisimasalinnik peqannginnerput sumilu najugaqarnerput pissutaasarpoq,.
ASSIGINNGITSUNIK katsorsaasoqartarpoq..
Neqerooruteqannginnerup kingunerisa inuttut atukkat ajortumik aamma eqqortarpaat, tassa pissut assigiinngitsorpassuarnut sillimmasersinnaammata. Innuttaasutut katsorsannginneqarneq naammanngitsumilluunniit peqqissaasoqartarnera pissutigalugu Danmarkimut nuuttariaqartarnerput eqqorsinnaava – ilaatigut ilaquttat tamaasa nooqatigalugit.
Peqqinnissaqarfik nunatta angissusia isigigutsigu naammnngitsorujussuarmik aningaasaliiffigineqartarpoq. Naalakkersuisut tamanna Aningaasanut inatsisip isumaqatigiissutiginiarnerani maannakkut allanngortissinnaavaat. Maannakkut iliuuseqartoqarnissaanik pisariaqartitsivugut. Katsorsaanermi neqoroorutinik killiliinissaq maannakkut oqallisigineqarpoq..
Peqqissutsimut Naalakkersuisup peqqinnissaqarfimmut amerlanerusunik aningaasaliisoqaqqusineranik Naalakkersuisut tapersinngippassuk kigutinut narlorsaatinit katsorsaanissamut neqeroorutinut nalingainnaasunut ikilerisoqassaaq. Ikioqatigiinnissarput uagut akisussaaffigaarput, innuttaasunut taamaalillutik piginnaatitaaffigisamittut peqqissutsimik sullinneqarsinnaaniassammata.
Katsorsaanermi neqeroorutit Kalaallit Nunaanni neqeroorutigineqarunnaartut paasissutissiissutigineqarnissaat Suleqatigiissitsisut ujartorpaat, kunngeqarfiup sinnerani Danmarkimi innuttaasunut neqeroorutinut sanilliullugit uuttorlugit.
Aamma inuit sipaarniarnernit eqqorneqartut qanoq iliornissaannik siunnersuutit – nuunneq eqqarsaatiginagu.
Pissutsit siunissami allanngortinnissaannut periarfissat Narsami maani ajoraluartumik takusinnaanngilagut, tassa politikerit Nuummi Ilulissanut mittarfinnut marlunnut ”siumut naatsorsuutigineqanngitsunut” aningaasartuutit sillimaffiniarlugit immikkoortuni allani suli sipaarniartariaqarmata..
Nunamut taamatut angitigisumut aningaasassaqannginnera paasilluarsinnaavarput. Taamaammat politikerit peqqinnissaqarfiup naalagaaffeqatigiinnermi allanut ingerlatseqatigiilersinniarlugu periarfissaq Suleqatigiissitsisut qineqqusaarnermi saqqummiutaat sukumiinerusumik misissortariaqarpaat, taamaalilluni naalagaaffeqatigiinnermi naalagaaffimmi innuttaasut tamarmik assigiimmik katsorsarneqarnissamut neqeroorfigineqarniassammata. Tassa katsorsarneqarnissamik qularnaaviginninnissaq isumaqatigiinniutigineqartarpoq.
Taamaaliornikkut nunat allanut nunasisartut killilerneqarsinnaapput Kalaallillu Nunaannut uterluni najugaqarnissaq pilerinarnerulersinnaalluni.