Nalaakkersuisut imminut atanngilluinnartumik politikkeqarput. Illuatungaani ataatsimut tapissutitaqanngitsumik namminiilivinnssap piviusunngortinnissaa suliniutigaat. Illuatungaani biologit pisassiissutissatut siunnersuutigisaannit qaffasinngerungaartunngorlugit pisassiissutit qaffappaat. Siunissami suna inuussutigissavarput?
Kinguaassagut sunik inuussuteqassappat?
Anguniagaq tassaavoq nungusaataanngitsumik aalisarnissaq piniarnissarlu. Nungusaataanngitsumik atuineq isumaqaannarpoq aamma siunissami isertitaqartassasugut. Aalisarpallaarneq pissutigalugu piffissani piniarfiluttuni qanoq iliussaagut?
Naalakkersuisup ippassaq biologit inassuteqaataat avaqqullugit pisassiissutit qaffaqqippaat.
Siullermik qalerallit, taava qilalukkat qernertat maannakkullu saattussanik pisassiissutit
Tassannngaannaq aaqqiisarneq nunatsinnut ilisarnaataajunnaartariaqarpoq.
Siunissamut qulakkeerinnilluni aaqqiissuteqartarneq pisariaqarpoq. Naalakkersuisut piffissamut sivisunersumut eqqarsannginnerat ilumoorsinnaanngivippoq.
Anguniagarmi tassaavoq nungusaataanngitsumik aalisarnissaq piniarnissarlut. Aaqqiissut tassaasariaqarpoq piffissani piniarluarfiunerusuni pisassiissutit annikitsumik qaffanneqartarneri.
Aalisartortatta piniartortattalu killiliiffigineqartuarnissaat Suleqatigiissitsisut kissaatiginngilaat.
Biologimmi inassuteqaateqarnerminni aalisarnissa pinngitsoortinnianngilaat, siunissamili ukiorpassuarni aalisarnerup imminut akilersinnaaginnarnissaa angorusuppaat.
Maannakkut amigaatigisarput tassaavoq, siunissami isertaqaannarniarluta kiisalu Kalaallit Nunaata MSC-mit akuersissutini pigiinnarnissaat qulakkeerniarlugu sapiillisaarluni aaqqiissuteqartarnissaq.
Taamaaliornikkut nuarsuarmi niuerfiit amerlanerungaartut niueqatigisinnaavagut aalisarnermiillu amerlanerusunik aningaasarsiorluta. .
Aallartissutissaq nunap immikkoortukkaarlugit pisassiisarneq AAMMA Naalakkersuisut biologit siunnersuutaannik kiisami malinninnissaat.
Politikkikkut pilerisaarutit peerneqarlutik, piffissamut sivisuumut aaqqiissutit atuutilersinneqarlik
Politikerit pisassiissutinik qaffaasaqattaartarneq iluaqutiginiassanngilaat.
Piniarneq pillugu Siunnersuisoqatigiit, piniartut inuussutissarsiortullu biologinik KNAPK-millu naapeqateqartariaqarput taavalu nunat tamat akornanni isumaqatigiissutit, malittarisassat misissorlugit ataatsimullu ukiunut arlalinnut pisassiissutinik piniagassanillu naapertuilluartumik agguaasseriaatsimik nassaarlutik ukiunullu arlalinnut isumaqatigiissuteqarlutik.
Tamaaliornikkut nunatsinni inussutissarsiutit annersaanni politikerit pisassiissutinik politikkimut sangutitsisinnaassusiat atuisinnaassusiat aamma kammalaatissarsiortarnerat akeraqalertarnerallu peerneqassapput.
Taamaalilluni isumaqatigiissutigineqartutut pisassiisoqartarnersoq nakkutigineqarnissaa aallunneqalissaaq.
Nunat tamat isumaqatigiissutaat, biologit siunnersuutaat aamma piniartut aalisartullu soqutigisaat imminnut akerleriinngillat, ingerlaqatigiittariaqarlutilli.
Tassa siumut aqqutissaq.