Nalagaaffeqatigiinnermi maannakkut kiisami suleqatigiilertoqarnera pitsaalluinnarpoq. Kalaallit Nunaat kiisami ikioqquvoq.
Kalaallilli Nunaata siulliullugu meeqqat inuusuttullu aningaasaliiffigisariaqarpai, taamaanngippat taakkuninnga salliutitsinnginnitsitut isikkoqarsinnaammat-
Tulliullugu sumiiffiit innalerfigineqarneq ajortunik, inissiinissamut periarfissanik, ilaqutariinnut angajoqqaat angajoqqaajullualernissamut pisariaqartitsisunut pikkorissartitsinerit pisariaqartitsisoqarpoq, minnerunngitsumillu ilitsersuisarnissamik, tarnikkut katsorsaasarnissamik, aningaasanik aqutsinermik ikiuisarnissamik ilaqutariinnut siusissukkut suliniuteqartarnissamut ataatsimoortunik attavigisartakkanillu peqqissaanissamik pisariaqartitsisoqarpoq.
Tulliullugu kinguaassiuutitigut kanngutsaatsuliorsinnaasunut neqeroorutivinnik pisariaqartitsisoqarpoq – siullermeertumik kanngutsaatsuliornissamik pinaveersimatitsisumik – arrlaat kanngutsaatsuliornissamik isumaliuteqarpat akeqanngitsumik neqeroorutigineqartussaq kinaassutsimullu isertuuffiusinnasoq.
Kinguaassiuutitigut kanngutsaatsuliorsimasunut pillarneqarnikuusunut inuunermik pitsaasumik ingerlatsileqqinnissaannik pilersaarutivinnik, inatsisitsinnik nutarterinissaq, taamaalilluta pitsaanerusumik pillaasarniassagatta tassanilu pillarneqarnikunut taamassuma ingerlannerani aqqusinermikkunnaartillugit inuunermik pitsaasumik ingerlatsisitsilerniarluni suliniutit pisariaqartinneqarput.
Aamma aapparisanut annersaasartunut angajoqqaat immikkut sammillugit annertuumik suliniuteqarnissaq pisariaqartinneqarpoq.
Aamma sulianik suliarinnittartunut sulisunullu allanut aalajangiisartussanut, sulisunut suliassat ikilisinnissaannut ikiuuttunut nunamilu tamarmi najukkani sulisunut ikiuutitut siunnersuisarfimmik pisariaqartitsisoqarpoq. Tamanna ukiualuit qaangiuttut nakkutilliinermi nalunaarutini ersarissumik ersinnikuuvoq
Nammineq katsorsaasartutsinnut isumaginninnermilu suliassanik suliarinnittartunut tapersersuilluni oqaloqatiginnittarnissamik pisariaqartitsisoqarpoq, sakkortuumik pisoqartillugu soorlu kinguaassiuutitigut kanngutsaatsuliortoqartillugu, annersaasoqartillugu pinerluffigineqartunut, imminut toquttoqarnerani kingullerlutsitsinermi il.il. PTSD-mik katsorsarneqarnissamut perfissaqarneq annertuumik pisariaqartinneqartorujussuuvoq.
Politiit peqqissaqarfimmilu sulisunut sakkortuunik pisoqarneranik siullermeerlutik naammattoorsisunut tarnikkut suliniuteqarnissaq annertoorujussuarmik pisariaqartinneqarpoq, aamma kommunini, Namminersorlutik Oqartussani allanil ataatsimut kivitseqatigiinnissamik pisariaqartitsisoqarpoq. Neriuppugut tamakku suleqatigiissitami ilanngunneqassasut Kalaallillu Nunaanni aningaasaliissutissanik inunnik suliassanut naleqquttunik kiisalu suliniutinik sunniuteqartunik sukkasuumik maani atorneqalersinnaasunik aamma tarnit pisussaannik immikkut ilisimasalittatsinnik nunaqavissunik, peqqinnissaqarfimmut allanullu sulianut attuumassuteqartunik sukkasuumik nassaarniarnissamik suliniuteqartoqarluni. Utaqqinneqarsinnaanngillat.
Meeqqanik ullut tamaasa annaasaqartarpugut.
AAMMA sunniuteartunik najukkaniillu aallaaveqartunik piffissamut sivisuumut suliutit qulakkeerneqarnissaannik pisariaqartitsisoqarpoq.
Ingerlaannaq ikiuinissamik pisariaqartitsineq qaangiuppat arriitsumillu atuutitikkiartuaarneqarsinnaasunik paasisitsiniaanerit. Tamakku Suleqatigiissitsisut amerlasooruliarlutik siornatigut oqaatigisarnikuusaattut; Kalaallit Nunaata suliniutit nammineq akilertariaqarpai takutillugu tamakku pingaartittorujussuugigut, immikkoortumili nammineq iliuuseqarsinnaalernissatta tunganut tapersiisoqartarluni, suliamik ingerlatsinermi ikiuisoqartarluni isumasiueqatigiittoqartarlunilu piffissat ilaanni ataatsimoortumik suliaqartussanik tikititsisarluta.
Naggataatigut minnerunngitsumilli isumaqatigiissutaagallartussanik pisariaqartitsisoqarpoq.
Sulisut akissarsiaannik assigiisitsilernerit, politiini eqqartuussivimmilu sulisut amerlisinneri, isertitsivinni sulisunut ikiuineq pingaartumillu immikkut illoqinartuni nakorsaatit atorlugit atoqaterussukkunnaartitsinissamut periarfissaqarneq.