Pinerluttulerinermik suliani ilisimanittunik illersuisarnermut atatillugu ilaatigut sioorasaarisarnerit sukateriffigineqarnissaasa atuutilersinneqarniarlugu immikkoortoq Inersuarmi oqaluuserinearpoq.
Qularutissaanngilaq ullumikkut periarfissaqarnitsinnit iliumannittut pitsaanerungaartumik illersorneqarnissaat pisariaqartinneqarpoq. Taamaaliortoqavissinnaanerpalu?
Isumaqarpugut politiinut unnerluussinermi iilsimannittunut sioorasaariniartoqarnerani politiinut unnerluussisoqareernerani pineqaatissiinermik sakkortunerlersitsinissamut piumasaqaatinik atuutilersitsisoqassaq. Aamma siooarasaarisoqartillugu akornusersuisoqartillugulu taamaaliortunut allaganngorlugu mianersoqqusinissaq pineqarpat sukkasuumik nalilersuisoqartariaqartassasoq.
Tamanna aamma aapparisamut annersaanermi suliat ingerlanneqaranni atuuttariaqarpoq.
Maannakkut eqqarsartariaatsimik qaangertitsinissaq pisariaqartinneqarpoq, tassani – pingaartumik najugaqarfinni mikisuni – annersaasunut pinerluttunullu innuttaasunut inatsisinik malinnittunut sioorasaarisunut allaganngorlugu mianersoqqusinissamut periarfissaqavissalluni, taamaammallu ullumikkornit immikkut, sukkasuumik pineqaatissiisinnaaneat atuutilersittariaqarpagut, pineqaatissiinerillu sukkanerunissaat qulakkerlugu.
Soorlu Tasiilamit piviusulersaarummi ungaasinngitsukkut takugipput; innuttaasut akiniarneqarnissartik annilaangagigamikku politiinut unnerluutiginninnissaq qunugigaat. Taamaattoqassanngilaq.
Nunami kinguaassiuutitigut pinerluuteqartunik aqqusinermiikkunnaartitsinissamik pisariaqartitsiviusumi, ilisimannittunut, taakku ilaqutaannut qanigisaannullu sioorasaarisarnerit akornusersuisarnerillu sakkortoorujussuarmik iliuuseqarfigineqartarnissaat inatsisitigut innarlitsaaliugaanermut pingaaruteqartorujussuuvoq.
Innuttaasut sioorasaarneqarpata suliffeqarfinnut il.il. ilitsersuutinik suliaqartoqartariaqarpoq, taamatut iliuuseqartarnerup akuerineqarsinnaanngitsup atorunnaarsinneqarnissaanut pisariaqartunik politiinut sapinngisamik sivunerpaamik isumalluutinik amerlanerusunik atugassiisoqartariaqarpoq.
Aamma sioorasaarinerit akornusersuinerillu taamatut iliorfigineqartunut tarnikkut qanoq sunniisarnerinik ilaqutaasunut, suliffeqarfinnut ataatsimullu isigalugu inuiaqatigiinnut pitsaanerusumik ilisersuisoqartariaqarpoq
Aapparisamik nakuusertartumik ilaquttamilluunnit nakuusertartumik qimatsisup PTSD-qalertarnera takornartaanngilaq, stressilersarput, annilaangalersarput, nikallungarujussualersarput aninissartillu ersigilertarlugu, tamakku tamarmik tarnikkut kinguneranik tigulaariffiuginnarput ikitsut.
Tamanna qanoq qulakkiissarput?
Saassunneqarnerami kalerrisaarutit atuutilersinneqarnissaat isumaliutigisinnaavarput, tassani politiit pinerluuteqartut politiinullu unnerluutiginnittuusinnaasut immikkoortilluinnarneqaranni suna ilimagineqarnersoq pinerluuteqartumik oqaloqateqarlutik takuninngila il.il. unioqqutitsippata kingunerisassaat pillugit sukkasuumik iliuuseqarsinnaallutik.
Kingullitillugu minnerunngitsumilli tamassumunnga periarfissaqavitsillugu illersorneqarsinnaasutullu isigineqarpat suliniuteqartoqartariaqarpoq; pinerluffigineqartup pinerluttullu akornanni isumaqatigiinniarsitsineq.
Pinerluffigineqartut annilaanganerisa stressernerisalu annikillisinneqarnissaat pinerullugu.
Soorunami pinerluffigineqartumut iluaqutaasumik tamassuma ingerlanneqarsinnaaneranik assersuutigalugu psykologinit naliisoqarnera apeqqutaatillugu illersorneqarsinnaasumillu ingerlanneqarsinnaatillugu.