Eqqorsinnaanngilaq kinguaassiuutitigut innarliisup aqqaneq marlunnik ukiulimmik arlaleriarluni pinngitsaaliisimasup Semitsiap ullumikkut allaaserinninneratut mianersoqquneqaannarnera.
Suliaq aalajangersimasoq tamakkiisumik ilisimasaqarfinngisarput oqaaseqarfiginagu, inatsisitigut innarlitsaaliugaanermik eqqarsartaruaatsitsinni ataqqanaajarneqarnitsinnik misigisimaneq akisuavoq.
Pinerlunnernut taamaattunut pillaasarnerit SAKKUKIPPALLARPUT. Taamatut pisoqaqqinnginnissaa qulakkeerniarlugu nangitseqqiilluni iliuuserisartakkagut IKIPPALLAARPUT. Pinerluttut pinerluuteqaqqinnginnissaaat pinngitsoortinniarlugu suliniuteqanngingajappugut – pingaartumik kinguaassiuutitigut kanngutsaatsuliornerit nunarsuarmi tamarmi pinerluutigineqaqqittartunik suliani.
Naalakkersuit pineqartoq sukkanerpaamik iliuuseqarfigisariaqarpaat.
Isumaqarpugut ataatsimiinnissami tullermi angumerineqarsinnaasumik inatsimmik ilassutaasumik sukkanerpaamik atuutilersitisariaqartut, pingaartumik meeqqanut kinguaassiuutitigut kanngutsaatsuliortartunut sakkortusisamik pineqaatissiissutit pillugit.
Tamanna sakkortuumik takutitsineruvoq pineqartorlu aamma pillugu innuttaasunut annertuumik qaammarsaanissamik pisariaqartitsivugut.
Pinerluffigineqartut sukkasuumik ikiorneqarusullutik sumut saaffiginnissappat?
Meeqqanut innarlerneqartunut ilaqutaasut pinerluffigineqartup tarnikkut timikkullu naalliuttit iliuuseqarfiginiarlugit sumi ikiorneqarsinnaappat?
Pineqatissiissutit pinerluuteqartarnermiullu utertoqartinniarnagu suliniutit minnerunngitsumillu – NANGITSEQQIILLUNI nakkutilliinerit suut inatsisit maannakkut atuuttut atorlugit aallartissinnaavagut, taamaalilluni inuiaqatigiinni inatsisit tunngavigalugit inuusutut misigisimanerput taamatut sakkortutigisumik akulikitsigisumillu innarlerneqarniassanngimmat.
Pinerluuteqartunik paasinninnittarnerput maannakkutut isikkoqartoq atorsinnaanngitsoq paasinarsivoq. Ilaatigut pinerluuteqaqqinnginnissamut iliuutsit eqqortut maannakkut pigineqanngimmata imaluunniit sunniuteqartunik iliuusissatut pilersaarusiornissamut naammattumik periarifissaqanngimmat, aammali pillaassuteqartarnerup sakkukippallaarujussuarnera pissutigalugu.
Pinerluuteqartut taamaattut meeqqat inuusuttullu inuunerisa sinnera aserortarpaat.
Peqqinnartumik attaveqarsinnaassusiat, asannissinnaassusiat, tatiginninnermik misigisaqarsinnaassusiat, inuunerisa pitsaassusia, inunnut tatigisariaqaraluakkaminnut siunissami atassuteqarsinnaanerat, amerlasuullu kinguaasiuutitigut kanngutsaatsuliorfigineqarnermik kinguneranik PTSD-mik nappaateqalersarput inoorusukkunnaartarlutillu.
Tamakku inuunerup sinnerani atuukkajuttarput ataatsimullu taaneqartarlutik ”kingusissukkut kingunerlutsitsinerit, innarlerneqartullu ilaqutaat aamma kingusissukkut kingunerlutsitsilersarput ilaquttaminnillu innarlerneqartumit annertuumik sunnerneqartarlutik.
Tamanna ajortoq iliuuseqarfigisariaqarparput.
Salliutillugu pinerluffigineqartunik katsorsaaneq, kinguaassiuutitigut kanngutsaatsuliornernik suliani pinerluttunik sukannernernerusumik malinnaanikkut inatsisitigut innarlitsaaliugaaneq annertusingaarlugu kiisalu pillaatigineqartartut akkortuninngortillugit pinerleqqinngissamullu suliniutit sunniuteqarnermik tunngaveqarpiartut amerlillugit.
Nammineq akiniaasarneq pisariaqartilersissanngilarput, maannakkullu pissutsit akuerissanngilagut, tassani
pinerluuteqartut pinerluffigisatik ingerlaannaq naapissinnaallugit, taamaalillutillu qunusiarisinnaallugit innarleeqqillutillug, kinguneqartinneqanngitsumik.
Tamanna akuerineqarsinnaanngilaq
Naalakkersuisut Danmarki suleqatigalugu suleqatigiissitaliamik suligasuartussamik pilersitsisariaqarput, taannalu sukaterutissanik inassuteqaateqassaaq, innarliisunut innarlerneqartunullu suniutissatut pisariaqartinneqartunik misissuissapput ataatsimiinnissamullu tullermut inatsisinut allannguutissanik eqqortunik inassuteqaateqassallutik.
Inatsisartut ataatsimiinnermi kingullermi inatsisip immikkut ittup akuerineratigut tamassumunnga piginaatitsinikuupput, tassanilu Naalakkersuisut Meeqqat pillugit suliat eqqarsaatigalugit Danmarkimi naalakkersuisunut atassuteqarnissamik peqquneqarput.