Ineqarnermut Attaveqaqatigiinnermullu Naalakkersuisup Kangerlussuarmik aningaasalersuineq pillugu kukkusumik akisoortoq imaluunnit nammineq naammanngitsunik ingerlateqqitaminik kukkusunik paasissutissaateqarsimasoq Suleqatigiissitsisuni isumaqarnissarput toqqarparput.
Taamaakkaluartoq ministerit akisussaassuseqarnerat pillugu inatsit eqqortinneqassaaq suliamilu uani taamaaliortoqanngilaq. Assuarinnittoqartariaqarpoq soraarsitsisoqarluniluunniit.
Nammineq oqartussaaffigisami kukkusumik oqaaseqarnerup kinguneqartinneqarnissaa takusinnaasariaqarparput. Naalakkersuisup oqartussaaffigisamini tassanilu isumaqatigiissutigineqartut pillugit apeqqutinik akissuteqarsinnaannginnera iluaqutaanngilaq.
Taamatut kukkuluttorneq Naalakkersuisut oqariartaaseq erfalasoq atornikuusaat atorlugu annaanneqarsinnaassagunaraluarpoq; tassa ”ataatsimut paaseqatigiinneq”, isumaqatigiissutillu atsiunnginnerani, atsioreernera atsiorneraniluunniit taamatut paaseqatigiittoqarsimanersoq naluarput.
Naalakkersuisoq pineqartoq qujanartumik naqqiummik tusagassiuutinut nalunaaruteqarpoq, taamaaliornerlu akisisussaassuseqarluni iliuusissaatuaavoq. Taamaaliornerli kingusippallaarpoq.
Naalakkersuisut siulittaasuat assuarinnittariaqarpoq, Kangerlussuarlu perpiarlugu isumaqatigiissutaasumut sinaakkutit ersarissut innuttaasunut saqqummiunneqartariaqarput..
Paatsuungalluinnartoqaqqittariaqanngilaq, tamannali oqaluttuaannanngortariaqarpoq.
Innuttaasunut minnerpaamik pasissutissiinissaq, ersarissorujussuarmik akissuteqarnissaq, pisariaqartinneqarpoq.
Sapinngisamik Kangerlussuup siunissami qanoq atorneqarnissaanik iternga tikillugu nassuiaasoqartariaqarpoq – mittarfiit pillugit pilersaarutip aallartivinniarneqangajalersup imminut akilersinnaanera tamassuma sunnerpaa.
Taamaanngippat inuiaqatigiit UAGUT uukapaatinneqarsimassaagut.
Nalakkersuisut tamanna sukkanerpaamik aaqqittariaqarpaat