Meeqqanut inuusuttunullu pitsaanerusussat mianerineqarnissaat pingaartumillu kinguaassiuutitigut innarliinerit pineqarpata anguniagaqarfiunngitsumik Aningaasanut inatsisiliortoqarniarpoq. Tamakku kingunerilu anguniagaqarluta akiorsinnaajumallugit kisitsisit paasissutissallu eqqortut qulakkeerneqarnissaat pisariaqartippagut.
Ilisimatusarneq, paasissutissat aamma ilisimasat tunngavigalugit anguniagaqrluni suliniutit
Kinguaassiuutitigut innarliinerit pillugit paasissutissanik pitsaanerusumik katersinissamik ilisimatusarnermillu pisairaqartitsisoqarujussuuvugut.
Innarliinerit suut pisarnersut, kikkut innalerneqartarnersut, qassinik ukioqarnersut pissutsinilu suni kikkut innarliisarnerannik erseqqissaanissaamik pisariaqartitsivugut.
Nakuusernermik, tarnikkut qinusiarinninnerit atorneqartarnersut, internetikkut meeqqanik qanoq annertutigisumik uukapaatitsiniartoqartarnersoq kimigiisertoqartarnersorlu.
Innarlerneqartut angerlarsimaffimmit ajortunik atugaqarfiusunit qimaasarnersut, ajorteriaannareersuusersut, inuit meeqqap namminerlu akornanni pissaanermik atuisoqartarnersoq – soorlu timersornermi sungiusaasutut, inunneranni inersimasutut saniatigut sanianiittuusarnersut, inuusuttut allat tatiniartarneraat – imaluunniit arlaannut pileritsatsinniarneqartarnersut, tassani arlaatigut naaggaarnermi kingunissai tamakkerlugit paasisinnaannginneraat.
Katsorsaanissamik neqerooruteqarnermi innersuussinissamullu periarfissaqarnermi ajutaasut annikillisinneqartarput
Aamma oqaliittarfinnik pisariaqartitsivugut, tassani inuusuttut inersimasullu meeraanermi innarlersneqarsimanerit oqaloqatigiissutigisinnaallugit, eqqortumik ikiorneqarsinnaallutik kisimiinnginnertillu ilisimassallugu. Neriuppugut taamaaliornikkut imminut toquttartut ikilisinneqassasut. Innarlerneqartut ilisimassavaat inissaqartinneqarlutik inuiaqatigiinnullu attuumassuteqarlutik innarlerneqarsimanerminnilu AKISUSSAANNGISAANNARLUTIK.
Pisuuneq oqalliseriaaserporlu nassuiaasersoqqinneqassapput, taamaalilluni innarliisup kinguaassiuutitigut innarliinerminik tamanik akisussaaffeqasslluni, oqaatsillu atorneqartut allatut paasinninniartisisut, inuttut atukkani aqutsiniarnerit allatut paasineqartinniasarineqartut sillimaffigissavagut, qassinillu ukioqartut pineqarnerat apeqqutaatinnagu ullumikkorniit ilumoorinnerungaassavagut.
Qanga innarlerneqarpit? Innarlerneqartunut innarliisunullu paasisitsiniaanerit
Aamma paasisitsiniaasarnissanik pisariaqartitsivugut.
Naatsumik oqaatigalugu; paasissutissat ilisimatusarnerlu pitsaanerungaartut pisariaqartippagut, tamakku Aningaasanut inatsimmi sumiluunniit takuneqarsinnaanngillat. Katsorsaanerit suut pisariaqartinneqarnersut erseqqissassallugit pingaaruteqarpoq, nunap immikkoortuini sumi, periusissiornermi piginnaasatigullu. Eqqortumik anguniagaqarlunilu katsorsaanissamik neqerooruteqartarnissaq pingaaruteqarpoq pisariaqartitsiviusunilu iliuuseqarnissaq pisariaqatinneqarpoq, innarlerneqartunut innarliisullu siunissami unitsinniarlugit aammalu oqartussanut inuiaqatigiinnullu ersarissorujussuarmik oqariartuuteqarluni paasisitsiniaasoqartariaqarluni..
Qaqugukkummi nuanniitsumik misigisaqartarpa qaqugukkullu innarliisoqartarpa?
Ilaasa innarliinerit inersimasunngorneq atorlugu atugarisarpaat innarlerneqarsimanerlutillu qularutigisorujussuusarlugu.
Amerlasuut nuaniitsumik misigisaq pillugu nuanniilliuuteqartarput, nalornissutigaluguli pisumik pinngorteqataanerlutik taamaammallu innarliineq nammineq akisussaaffiginerlugu. Immaqa innarliinertut taaneqarsinnaanersoq nalornissutigisarpaat:
Inersimasuunerit meeraanerit apeqqutaanngitsoq, aamma nalunngisamit, ilaqutamit peeqqamilluunniit uukapaatinneqarsimanerit, tassani naaggaarsinnaanak erseqqissarluassallugu pisariaqarpoq. Neriorsorneqarsimanermik misigisimanerit imaluunniit tamakkiisumik paasisinnaanngisannut angersimaguit taassumalu kinguneranik atoqateqarniarsarineqaruit apeqqutaatinnagu, taava innarliineruvoq.
Arlaatigut pissaanermik atuisoqarnera pineqarpat, piginnaasaqannginnerit – assersuutigalugu ukioqassutsikkut aalakoornermiluunniit – imaluunniit ukioqassutsit, inerikkiartornermi killiffiit imaluunniit naaggaarnissamut piginnaasaqannginnerit pineqarpata, taava innarliineruvoq.
Arlaata ilinnut oqartussaanini pissaaneqarniniluunniit atorpagu, arlaata apereqqaarani innarlerpatit, taava innarliineruvoq. Arlaata aalakoornerit, inuusuppallaarnerit, qasunerit kingunissai ilisimallugit angersinaanngikkuit, taava innarliineruvoq.
Ilaata atoqatiginiarlutit pisuusutut misigitinniarsarippatit, pinngitsaaliniarpatit, arlaata illaatigippagu sulili arlaataperusunngisannik nuanniitsumik misiginartumik atoqatiginiarsarippatit, taava innarliineruvoq.
Ajornangitsuararsuuvoq; Inersimasut apereqqaakkit. Ersarissumik angerneqarit.
Meeqqat, innarluutillit inuit paarisatit aalajangiiffigisartakkatit aqutalluunniit arlaatigulluunniit oqartussaaffigisat attornagu.
Inuusuppallaarpata, ajortiasuuppata aalakoorpallaarpata angerneqaraluaruilluunniit taamaaliornak. Tamakkiisumik.
Inersimasut inersimasutut iliuuseqartarnissartik akisussaaffigaat meeqqallu killiliinissamik ilinniartinnissaat akisussaaffigaat.
Innarliineq pineqarluarsinnaavoq aamma imaliinnarluni pillarneqaataasinnaanngikkaluartoq. Tamanna eqqaamajuk.
Immikkut siunertanut aningaasaliisoqanngilaq
Suna innarliinernut pissutaasarnersoq kikkullu innarlerneqariaannaanerunerannik ilisimasaqarnissaq pisariaqartipparput.
Assersuutigalugu Danmarkimi paasineqarpoq innarluutilli aamma meeqqat inuusuttullu inissinneqarnikut kinguaassiuutitigut innarlerneqariaannaanerusut.
Aamma kinguaassiuutitigut inarliinerit qanoq iliuuseqarfigineqartarnissaannut nuna tamakkerlugu najoqqutassiiuliornissamik pisariaqartitsivugut. Innarliisoqarsimanerank pasitsaassaqaraanni inummit innarlerneqarsimanermik oqaluttuarfigineqarutta qanoq iliussaagut, angajoqqaat, paaqqinnittarfiit pisortallu allat innarliisoqarsimaneranik paasisaqarpata oqaluttuarfigineqarpataluunniit qanoq iliussappat?
Annertunerungaartumik ilisimatusarnissamik, nangitseqqiilluni ilisimatusarnissamik, kisitsisinik amerlanerusunik tamakku tamaasa pillugit atortunik amerlanerusunik pisariaqartitsivugut. Innuttaasunut annertuumik qaammarsaanissamik pisariaqartitsivugut aamma nuna tamakkerlugu pinaveersaartitsinermi immikkoortumik taamaallaat kinguaassiuutitigut innarliinerit pillugi paasititsiniaanermik pinaveersaartitsinissamillu suliaqartussamik pilersitsinissamik pisariaqartitsivugut.
Taamaaliornikkut sunniuteqartumik anguniagaqarfiusumillu immikkoortumi kisitsisit amiilaarnartut ikilisinniarlugit suliniuteqartoqalersinnaavoq aammalu meeqqat, inuusuttut inersimasullu amerlanerungaartut pitsaasumik toqqissisimanartumillu inuuneqarnissaat qulakkeerneqassalluni.
Tamakku tamaasa aningaasani inatsimmi aamma takuneqarsinnaalersinnissaannik pisariaqartitsivugut. Maannamut taamaaliorsinnaanikuunngilagut. Tamanna Suleqatigiissitsisut Aningaasanut inatsisissamut piumasaqaataasa ilagaat.
Ilisimasat tunngavigalugit annertuumik suliniuteqarfigineqanngitsut, piffissamut sivisuumut pilersaarusiorfigineqanngitsut aamma ikiuiniarluni ajunaarnersuaq unitsinniarlugu pinaveersaartitsiniarlunilu anguniagaqarlunilu suliniuteqarfiunngitsut tutsuiginanngillat angusaqarluarniarfiunatillu.