(Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq)
Ilinniartut ineqarfii pillugit inatsisip nutarterneqarnera iluarisimaarnarpoq.
Ilinniartitaanermut naalakkersuisoqarfik Naalakkersuisullu atorneqarluarsinnaasumik ersarissumillu inatsisiliornerat uanilu allaaserinninnerat pillugu nersualaangaarpagut. Ersarippoq inatsisip uuma atorneqarluarsinnaanissaa siunertaasoq.
Ilinniartut ineqarfii aningaasat immikkoortinneqareerpata sanaartorneqassapput – Aningaasanut inatsimmi aningaasat atorneqanngitsut
Ilinniartunut ineqarfeqarnermi suliassaqaqaaq, qularutissaanngilarli ilinniartut ineqarfiinik amerlanerusunik salliutillugu sanaartussasugut. Sanaartorneq aallarteriartigu, aningaasat atorneqanngitsut suliniutillu piviusunngortinneqanngitsut amerlavallaarput, aamma aningaasanut inatsimmi.
Ilisimavarput missingiisiornissamut sanaatornissamullu sulisussanik amigaateqartugut piffissarlu saanartorfissaq sivikippoq.
Soorunalumi sanaartornerni ajornartorsiut annerpaaq tassaavoq akii. Uagut sanaartornermi suliffeqarfinnut malittarisassiorpallaarnitta kingunerisaanik. Pilersaarusiornerlunnermillu. Suliffeqarfinnut sanaartortunut suliariumannikkusuttunut anginernut immikkut pisussaaffeqarpugut, pitsaasumik pilersaarusiornissamut.
Naggataatigut immitsinnut eqqorujussuaannartussaavugut, aningaasanut inatsimmi aningaasatigut.
Sanaartornermik ingerlaavartumik pilersaarusioritsi – suliffeqarfinnut sanaartortunut killilersuutit peersigit
Ingerlaavartumik pilersaarusiorneq pikkoriffiginerusariaqarparput, sanaartortut taamaalillutik piffissamut sivisuumut pilersaarusiorsinnaaniassammata. Ataatsimut allaffik neqeroortitsinermik suliammillu ingerlatsinermik isumaginnittumut atoqqittariaqalerparput – soorunami ajornakusoortunik atugassaqaraluartut. Aamma aningaasanut inatsimmi sanaartornermut aningaasat uninngaannannginnissaat qulakkeertariaqarparput.
Sanaartornissanik tulleriaasinissamik allattuivimmik suliaqartumik naalakkersuisoqarfiit akimorlugit suleqatigiissitaliortoqarnissaa Naalakkersuisut salliutilluinnarariaqarpaat, taamalilluni qitiusumi immikkoortup sanaatornissat tulleriaarniassammagit qulakkeerlugillu. Utaqqiinnarsinnaanngilagut.
Inissianik amigaateqarneq inissiallu aserfallassimasut nunatsinni najugaqartut aamma ajornartorsiortippaat
Nuummiinnaq ukiut ikitsuinnaat ingerlaneranni illoqarfimmut 5.000-ingajaat nuupput. Siornatigut inissianik amigaateqarnermit tamanna annertunerusumik malugineqarpoq. Inuppassui iloqqarfimmi inissiani oqulinni aserfallassimasunilu najugaqarput, anisinneqartullu piffissami qaninnerusumi inissaqalernavianngillat.
Ilinniartut ineqarfii aamma piumaneqartorujussuupput.
Erseqqippoq aappariit ukiumut 500..000-inik isertitallit ilinniartut ineqarfii najugaqassanngitsut. Tassungali peqatigitillugu oqaannartariaqarpugut immaqa inissiamik naassaarsinnaannginnerat pissutaasoq, aapparisarlu ilinniarusuppat ilinniartut ineqarfianni najugaqartariaqarput.
Ajorilinnginneranni pissutsit paasiniaqqaartariaqarpagut.
Soorunami peqquserluttuliornerit akuerineqarsinnaanngillat namminerlu pisinnaasut nammineertariaqarput, kisiannili tassani ineqarnerannut inissianik amigaateqarneq ersarissumik pissutaasoq ilinniarneq unitsinneqassanngilaq.
Aamma Nuummi maannamiit sukkanerungaartumik sanaartornissap qulakkeernissaanik pisariaqartitsivugut. Aamma sinerissami taamatut pisariartitsiviusunut tamanna soorunami atuuppoq, Nuummili ajornartorsiortoqarneruvoq, pilersaarusiornitsinnilu tamanna sillimaffigisariaqarparput.
Innarluutillit pitsorluttullu ilinniartut ineqarfinniissinnaanerat
Qularutissaanngilaq innarluutillit ilinniartut inaannik allanngortitserisinnaanerat pitsaasorujussuuvoq, taamaalilluni innarluutillip pisariaqartitaanut naleqquttuuniassammat, immaqali tamassuma takutippaa inissianik innarluutilinnut naleqqussakkanik siunissamik sanaartornissamik pisariaqartitsisugut.
Silamiikkaanni takuneqarsinnaavoq utoqqaat pitsorluttullu pisiniarfinni majorallaffinni takisoorujussuarni ingerlaniarsarisut, ippassaanilu eqqarsaatigaara nunatsinni pitsorluttuulluni timikkullu innarluuteqartuulluni sooq taamatut ajornartigissanersoq.
Piffissaq suli sivisussaaq, tassa tamanna maannamut salliutinneqarnikuunngimmat, kisianni innnarluutilinnut naleqquttunik siunissami inissiaqarnissarput qulakkiissavarput – aamma ilinniartut ineqarfiini.
Ullumikkut ilisimasaqarneruvugut, taamaammat siunissami pitsaanerusumik iliuuseqartariaqarpugut.
Taamaaliussaagut? Naalakkersuisut oqaluttarfimmiit maanngaanit apererusuppakka.
Pilersitseqqittarneq tassunga atatillugu immaqa eqqarsaatigeqqittariaqarpaput, tassa inissiat innarluutilinnut naleqquttunngortinnissaat tassanngaaniillu nooqqippata ajornakusuungaatsiarmat…
Tamanna ajornakusoortuuvoq, tassa ilinniartut aatsaat tikikkaangamik inissiaq takusarmassuk, taamaammallu inissiaq qanoq ittuunersoq siumut takusinnaanagu. Aamma ilinniartut ineqarfianni inissiaq tamatuma kingorna piffissaq pisariaqanngitsumik atorneqannginneratut isikkoqarsinnaavoq, tassa innarluutillip allannguutit anisernissami tungaanut atortussaammagit.
Taamaammat issiavik kaassuartagaq atorunikkut assersuutigalugu majorallaffiit pinngitsoorsinnaanngilaat.
Ernisimalluni / Qitornartaarsimalluni sulinngiffeqarneq
Taamaammat periutsip tamassuma qanoq allanngortinnissaa Naalakkersuisut eqqarsaatigaat?
Erninermut atatillugu atuanngiffeqarnermi ajornartorsiutit oqaluuserisaqarpagut. Ilinniartoq ataatanngorpat anaananngorpalluunniit inatsit qanoq atuuppa? Imaaliinnarlugu paasivarput inissiartik annaassagaat.
Piaartumik pingaartumillu pisumi uani ilaqutariit erninermut atatillugu ilinnianngiffeqartut ilinniarsinnaasariartut inatsimmi toqqaannartumik ilannguttariaqarparput.
Inigisartik annaasariaqanngilaat.
Qaammatini sisamani immikkut akuersissuteqarsinnaanerup ilanngunneqarnikuunera naatsorsuutigiinnarsinnaanngilarput.
Takutilluartariaqarparput meeqqat ilaqutariillu meerartallit ilinniartitaanermi ilaasut tassanilu pingaaruteqartut.
Ajornartorsiut ilisimaneqarluarpoq, tassa erninermut atatillugu ilinnianngiffeqarneq ilinniarnermullu atassuteqartitsinermut ajornartorsiutit.
Tamanna oqallisigeriartigut, matumanilu kaammatuutigaara ataatsimiititaliap sulinermini tamanna oqallisigissagaa.
Taamatut annikitsunik oqaaseqaateqarluta siunnersuut una ataatsimiitaliami suliamut attuumassuteqartumi sukumiisumik oqallisigisassanngortipparput.