Ilinniartut inaannut akit tamanut assigiissapput, ilinniartut inaanni ineqarnermut akiliutit ilinniartut isertitaat tunngavigalugit procentinngorlugit akilerneqartarnissaat atuutilersinneqassapput sulinissamut kajumissuseerutsitsisoqassaaq.
Naalakkersuisut ilinniartut inaat pillugit inatsisivimmik suliaqarmat pitsaalluinnartuuvoq. Tamanna pillugit nersualaarpugut. Taamatut oqareerluni ilinniartut isertitaat tunngavigalugit ilinniartut inaanni ineqarnermut akiliutit aalajangerneqartarnissaannik Inuit Ataqatigiit, Demokraatit, Siumut aamma Nunatta Qitornai oqalliseqarput.
Tamanna ajorluinnarpoq. Taamaaattoqassappat ilinniartut ilinninermik saniatigut sulerususseerutsinneqassapput
Ilinniarnerup kaasarfimmioqalerfiusumillu suliffinni aningaasanik amerlanerusunik aningaasaateqarnissap akornanni toqqaassagunik amerlanerit sulissapput..
Ineqarnermut akiliutit procentinngorlugit naatsorsorneqartarneris tamanna kingunerilluarsinnaavaa.
Tamassumunnga taarsiullugu pingaartumik Nuummi Sisimiunilu, Qaqortumi Ilulissanilu, Aasianni sumiffinnilu pisariaqartitsiviusuni ilinniartut inaasa nutarternissaat ilinniartullu inaannik amerlanerusunik sanaartornissaq siunertaasariaqarpoq.
Ilinniartut inaasa aserfallatsaaliugaanerat tunngavigalugu ineqarnermut akiliutit aalajangerneqarpata naapertuilluarnerussaaq.
Ilinniartut ilinniarnerminnik naammassinninnginnerminni sullivivinni sulinissaat naleqartorujussuuvoq. Sulisut akileraarutitigullu isertitatta amerlineqarnissaat kisiisa eqqarsaatinagit, aammali ilinniakkaminnik atuisinnaaniassammata sulinerlu misiliiffiginiassammassuk.
Ineqarnermut akiliutit allatut qaffanneqarnissaat kissaatigineqarpat sulerusukkunnaartitsisumik taamatut periuseqarnermut taarsiullugu tamanna oqallisigisiuk.
Taamatut oqareerluta Suleqatigiissitsisut ilinniartut siunissami innarluuteqartunut naleqquttunik ilinniartunut ineqartitsinissamut sanaartornerullulu aallartinnissaanut tunngavilersuipput. Nuummiinnaq innuttaasut ukiuni kingullerni 5.000-nik amerlinikuupput, tamanna inissiaateqarnitsinni ajornartorsiorfioreersumi nappanneqarsinnaanngilluinnarpoq, ilinniartullu inaannik aamma amigaateqarpugut.
Taamaammat uggornarpoq aningaasanut inatsimmi ukiut tamaasa aningaasat atorneqarneq ajortut illoqarfinni ilinniarfeqarfiusuni ilinniartut inaannik sanaartuinnissamut atorneqanngitsut amerlammata.
Ilinniartut pitsaanerusunik atugaqarnissaat soorunami tassaavoq piumasaqaateqarneq, piumasaqaatilli sulinerminni qaffakkiartornissaanut suliffeqarnissaannullu akornusiissanngallit.
Isumaqarpugut tamanna isumatusaarnerusoq.
Taamaattumik partiit allat qinnuingivangut kollegianut akiliutit pillungit eqqarsaatigeqqaassallungu