Nunatsinni ilinniarfinni sumiluunniit ilungersunartorsiortoqarpoq meeqqat naammattumik ilikkagaqarsimanatik meeqqat atuarfiat qimattarmassuk.
Suleqatigiissitsisuni nalunngilarput pissutaasut amerlaqisut aamma immikkoortoq annertuumik iliuuseqarfigisariaqartoq, oqartussaaffiit tamaasa suleqatigiisillugit.
Namminersorlutik Oqartussat, inunnik isumaginninneq aamma atuarfiit pisariaqartillugu politiit peqqinnissaqarfillu suleqatigisariaqarpaat.
Aningaasanulli inatsisissap isumaqatigiissutigineqalerneranut atatillugu isumaqarpugut makku sulissutigisariaqarigut:
Atuartitsinerup qaffassarneqarnissaa.
– Aqqutaasinnaavoq ilinniartitsisut pikkorissut ullumikkut sumut tamaannga agguataarneqarsimasut atorluarneqarnerunissaat.
– Qarasaasiaq atorneqarnerulerli ungasinganiit ilinniartitsinermi, pikkorinnerpaat klassinik arlariinnik ataatsikkut ilinniartitsisinnaanngortillugit aamma najukkami ilinniartitsisut ikorfartorneqarlutillu ikiorneqarsinnaanngorlugit.
– Tamatuma saniatigut najukkami misissuinerit ingerlanneqartariaqarput paasiniarlugu najukkani ilinniartitsisoqarfiulluartuni piginnaaneqartoqarnersoq ilinniartitsinermut suleqataasinnaasunik.
Nunaqarfinni aamma illoqarfinni minnerni qarasaasiaq iluarsiissutaasariaqarpoq
Nuna tamakkerlugu suleqatigiinnissamut Teknologi periarfissani pitsaanerpaavoq.
Tassungali atatillugu pisariaqarpoq kommunini nunalu tamakkerlugu politikerit suleqatigiinnissaat akisussaaffik milorujuttaqattaarunnaarlugu.
Tulliatut atorfillit atuarfiillu suleqatigeeqquneqassapput – najukkamiinnaanngitsoq nunali tamakkerlugu.
Tamatuma iluaqutissartarisinnaavaa meeqqat atuarfiisa assigiiaarnerulernerat, atuarfiit sapinngisamik assigiimmik pitsaassusilimmik ilinniartitsiviusinnaanngorlugit.
Iluaqutissat annersaat pissarsiarineqartussaq illoqarfinnut minnerni nunaqarfinnullu tussaaq, najukkami piginnaasallit allaniit ikorfartorneqalissammata.
Nammineq ilinniartitsisussatsinnik pilersorsinnaanngussaagut systemimut taamaattumut.
Systemilu taamaattoq annerpaamik iluaqutissarsivigineqassappat salliutittariaqarpagut kalaallit ilinniartitsisut linjefagi piginnaaneqartussat, tamanna kingusinnerusukkut piginnaaneqarnerulernissamut aqqutaammat.
Tassunga atatillugu humanismemut kulturimullu tunngasut ilinniartitsissutit sumiginnarneqassanngillat, pissuserissaarnissamut, tusarfinnut isornartorsiuisinnaanermut tunngaviummata aamma naliginnaammata kiisalu imaqarluartumik kulturimut paasinninnissamut tunngaviummata.
Oqaatsinut ilinniarneq kingusinnerusukkut ilinniaqqinnissamut tunngaviupput, naliginnaammat ilinniarnerup iluarujussuata Kalaallit Nunaata avataani ingerlanneqartarnera.
Aamma nammineq oqaatsinik ilinniartinneqarneq takornartat oqaasiinut ilinniarnissamut tunngaviulluartuuvoq.
Pingaaruteqarpoq meerartagut inuusuttagullu ilinniartissagatsigit misiginneqatigalugit, allat paaseqatigilluarlugit kiisalu atorlugu isornartorsiuerpalaartumik oqallissinnaaneq tunngavigaluguli imminut tatigineq aallaavigalugu nammineq paasinnissinnaasuseq aamma kulturimut paasinnissinnaassuseq.
Taamaasiorututta meeqqat nukittunerusut pilersissavagut.
Kim Lyberth & Jesper Enevoldsen
Suleqatigiissitsisut Kujalleq
Kim Lyberth