Aningaasanut inatsimmi aningaasaliisoqareerpoq. Kisianni ataatsikkut sanaartugassat amerlavallaarput peqataanillu Naalakkersuisut suliariumannittussarsiuussinermi atortussanik piaartumik nassiussuineq ajorput taamaasillunilu piffissaagallartillugu pilersaarusiornissaq pisinnaaneq ajorpoq. Kollegiani inissat amingarnerisa ilinniartortagut imaannaanngitsorsiortippaat
2019-p aallartisimalaarnerani inersimasut 109-t 56 -nik qitornalli Nuummi kollegiami initaarnissartik utaqqivaat. Aasianni inersimasut 15-t utaqqipput. Nalunaarsorneqanngitsullu allat Nuummi najugaqartut allatsinnerluunniit ajorput angajoqqaaminnilu najuaqartariaqartarlutik imaluunniit najugaqatigiiffinni kollegiaqarfiit avataanni. Eqqumiikuluppoq sanaartornissamummi aningaasaliisoqareernikuuvoq.
Ilinnialersussanik ilinniagassaminnik aallartissinnaaneq ajorput, najugassaqannginnamik. Tamanna ajorluinnarpoq! Uteqattaartuarparput ilinniartitaaneq pingaarteqalutigu, kisianni pingaartinneqarneraqisoq ersinngingajappoq.
Ilinniartut kollegiani inissaaleqisut Namminersorlutik Oqartussanit aqqutissiuunneqarneq ajorput aamma ikiorneqarneq ajorput, inissaqartinneqanngikkunik. Inissaqarpat ajunngilaq; inissaqanngippalli susoqarsinnaanngilaq.
Iluarsiissutissat akisoorsutit taava saanneqartarput; ineeqqamik attartorsinnaaneq ilinniartunut iluatsitsillutik kollegiani inissarsisimasunut. Allat ukiorpassuarni inissarsiorsimasut inissaraluannik inagiisarput inissianut naliginnaasumik attartortakkanut. Ingerlariaqqiffissaqannginneq eqqartorparput. Kollegiat amerlanerusut sukkanerpaamik sanaartorneqartariaqarput.
Inissaaleqineq erloqinartoq aamma piffissaagallartillugu iliuuseqarsimannginneq
Pissutaaqataasinnaasoq tassaavoq Naalakkersuisoqarfiit tamarmik immikkut suliariumannittussarsiuussisalernissaat, C aamma B-overslaginik pissarsiniartalernissaat, sanaartugassanik qularnaarisalernissaat il.il. Siornatigut qitiusumik tamakku ingerlanneqartarput, immaqa periutsip tamatumap uterfigeqqinneqarnissaa eqqarsaatigineqarsinnaavoq, Naalakkersuisoqarfinni naalakkersuisut aalajangereeraangat sanaartugassanut aningaasaliissutit qanoq atorneqassanersut. Nuummi erloqinaannaartumik inissaaleqisoqarpoq aamma illoqarfinni annerni inissaaleqisoqaqaaq, nuttarneq pissutaalluni aamma siornatigut politikkikkut piffissaagallartillugu iliuuseqartoqartarsimannginnera pissutigalugu.
Inissiat nunami maani nungullarluinnarnikuupput, politikkikkut tunulliunneqartuarnikuupput, namminersortut sanaartornissaat kaammattuutigineqartorsuusimanngilaq aamma iluarsaassassanik ulikkaarpoq nutaanillu sanaartungaatsiartoqartariaqarluni.
Peqataanik sanaartorneqarniarput mittarfissuit nuannarineqarpallaanngitsut, atuarfinnik napparsimavinnillu sanaartortoqartariaqarluarpoq aamma kollegiani inissat ikinngitsut amingaataapput. Ataatsikkulli sanaartorneqalissappata akit qaffangaatsiartussaapput. Iluarsiissutissatuaq tassaavoq avataaneersunik sanaartortitsiartornissaq, annermik nunani avannarlerniit aamma Danmarkimiit, tassa nunaneersunik pitsaasunik sulinermi malittarisassaqarfiusuneersunik aamma kattuffeqartunik. Aamma immikkoortumi tassani nutaamik eqqarsarnissaq amingaataavoq, sanaartornermi nutaamik eqqarsarnissaq amingaataavoq.
Piffissaq ungasinnerusoq isigalugu pilersaarusiornissaq qularnaarumallugu sanaartukkat pilersaarutit naapertorlugit aallartinneqartarnissaat piffissaagallartillugulu, akit qaffaruloornerannik kinguneqanngikkaluartumik. Aamma eqqarsaatigisariaqarparput sumi sunillu pisariaqartitsineq annerunersoq. Kollegianik inissat tamakku ilagaat.
Najukkami sanasunut pingaaruteqarpoq piffissaq ungasinnerusoq isigalugu pilersaarusiorsinnaanissaq aamma pisariaqartillugu sulisussanik atorfinitsitsiniareertarnissaq aamma siumungaaq pilersaarusiortoqartariaqarpoq ilaatigut ilinniarnermut atatillugu sungiusaatigalugu suliffissat qularnaarumallugit soorlu aamma akit patajaatsunik qularnaartariaqartussaapput.
Namminersorlutik Oqartussat kommunillu pitsaasumik ataqatigiissaarisartuuppata sanaartornermilu piffissap ungasissoq isigalugu pilersaarusiortarlutik taava inuutissarsiutinut, ilinniartunut innuttaasunullu naliginnaasumik qinigassaqassagaluarpoq pitsaanerusunik.