Politikki iligiilluni arsaattartuunerunngilaq
Politikki iligiilluni arsaattartuunerunngilaq, qiimmassaalluni illersuisoqartussaanngilaq qanorluunniit ingerlasoqaraluarpat. Politikki tassaasariaqaraluarpoq eqqarsarluarluni pingaarnersiunissaq amerlanerpaaq iluaquserusullugit tunngaviusumillu suliaq taanna ataqqinaatissaagaluarpoq.
Innuttaasut akuerissappassuk qanorluunniit pisoqaraluarpat ataatsimooqatigiinnut ilaasariaqartugut, taava naggataatigut innuttaasut ajorsartuartussaapput.
Qitornaat, ataakkui, angajoqqaavi taakkulu namminneq ajornarsartarput pissaaneqarusunnerup isumatusaarnissaq inangeraagagu taamaasillunilu aaqqiissutissat, isumassarsiat aamma tunngaviit pillugit unammineq pilersillugu.
Partiit illit innuttaasullu pitsaanerpaamik atugaqalernissaat sulissutigisariaqarpaat, systemip namminerluunniit atugarissaarnerunissaat pinnagu. Tamanna oqaatigissallugu pingaartorujussuuvoq.
Pingaarutilerujussuuvoq paasissallugu politikerit ilinnut sullissisuummata kisianni pissaaneq atorfimmik atornerluinermik kinguneqarsinnaavoq taamaattumik pingaartorujussuuvoq qularnaassallugu politikerinik nakkutilliisoqarnissap isumannaarsimanissaa.
Aamma akuerisariaqarpoq isumassarsianut pilersaarutinullu ingasattajaartunut innuttaasut naggaarsinnaanissaat.
Landskarsi akiliisoralugu pullattakkanik angallatisiniarnerit allarpassuarnillu tusaamaneqaatigiligassanik pissarsiniarnerit naaggaarsinnaasariaqarpagut.
Politikerinik kiisalu sullivinnik isornartorsiuinerit assigiinngissutilerujussuupput, aamma inuttarsiuilluni inuit naliginnaat isornartorsiorniorneqartarnerat, inuuneri aserorniarlugit aamma ataqqinassusaat. Assigiinngissutilerujussuupput.
Politikkerneq isornartorsiorneqarmat imaanngilaq inuit ataasiakkaat isornartorsiorneqassasut. Aamma qulequtat sunaagaluarnersoq assortuussutigerujussuaraanni imaanngilaq noqqallaamisoqarsinnaassanngitsoq aamma imaanngilaq isumaqatiginngisaq pissusiluffigineqaannassasoq, assortuunneq qaangiussimalerpat.
Inunnik aqutsineq
Oqallittunut akulerunnissaq ajornartarpoq partiinut attuumassutillit oqaaseqaqattaartussanngorlugit sassartinneqartarmata allanut kusanaattuliortussanngorlugit.
Qulequtaq pineqartoq perpiarneq ajorpaat siunertariinnartarlugulu inummik akerartuinissartik imaluunniit ajoqusersortarlugit allaat oqaaseqartarfiit akuuffiginissaat kajuminnarunnaartittarlugu. Oqaaserisartagaat ilumoortariaqanngillat. Politikerit nutaat nukittuujusariaqarput. Periuserineqartummi akuerineqarsinnaanngilluinnarput.
Aamma ilikkalersimasariaqaraluarparput Ataatsimiittarfimmi oqallittaraluarluta avataani kammagiittut pissuseqartarpugut. Kisianni marserneq ingatsikkiartorpoq ulluinnarni, sulereernerup kingorna, piffissaq naallugu. Pissaaneqarusunneq pissutaavoq inoqatinillu aqutserusunneq. Politikerinit immaqali aamma inunnut immaqa oqaaseqartarniarlutik kissaateqartaraluartunut. Inuit oqaaseqarunik allaat suliffitik annaasinnaavaat. Politikkikkut tatisineruvoq qularnaarniarlugu illuatungiliuttut sanngiinnerusut, tamallu taamaallaat kisermaassilluni naalakkersuisoqarfinni takusaraluarpagut. Taamaattumik nukittugaatsiartariaqarpoq pisortanut akerliuniassagaanni.
Tamanna immaqa aamma inuiaqatigiit akornanni akerartuunnersuarmut ersiutaavoq.
Kisianni tamatta peqatigiippugut aamma oqallinneq ilinniartussaavarput immitsinnut sequtsinngikkaluarluta imaluunniit suliffissanut mattutinngikkaluarluta, kammalaatigiinnerit aserortinngikkaluarlugit aamma anaartaasaqattaaginnarata.
Politikki periutsillu qanorsuaq isornartorsiorneqarsinnaavoq aamma isornartorsiuinissaq periarfissaajuartussaavoq. Kisianni assigiinnik malitassaqanngikkutta kimmaattuassaagut imminut isumaqatigilluunniit illersorniarlugit. Kammalaatigiiaarneruvoq. Aamma inoqatinik nakkutilliineruvoq – kiffaanngissuseqarnerunani, demokratiunani pissuserissaarnerunaniluunniit.
Soorlu politikkikku kisermaassisuullunilu nakkutilliinikkut illuatungiliuttunut aningaasaliissutit periarfissallu killilersoraanni anguniarlugu pissaaneqartuarnissaq pissaanermillu tigummereersut ingerlajuarnissaat. Tamakku ataatsimiinnissami aggersumi sukumiisumik oqallisigisariaqarpagut.