Meeqqat Atuarfiini akissarsititsisarneq atulerli piginnaasat qaffatsinneqaraangata. Pitsannguallatsisisinnaanngitsut pillarneqartassanngillat. Meeqqat Atuarfiisa pitsanngorsarnissaannut aqqutissamik sanasoqarli. Atuarfiit qaffassarnissaannut atatillugu siunnersorteqarnissaq qularnaarneqarli. Taamaaliorutta kalaallit Danmarkimiittut angerlaralissapput aamma nunanut allanut nuuttariaarussaaq.
2018-mi Kalaallit Nunaanni inuusimasut inuit 16.472-t Danmarkimi najugaqarput( Kalaallit Nunaanni naatsorsueqqissaartarfik naapertorlugu). Nunaqqatigut tappavani najugaqartut amerlaqaat. Illoqarfiit pingaarnersaanni Nuummi najugaqartut 20.000-t pallippaat, taamaasilluni illoqarfissuanngulerpoq.
Nunanut allanut nuussimasut amerlavallaaqaat, ilaat angerlartikkusuppagut siuarsaaqataaniassammata, tungiuinermut iluaqutaallutik akileraartarlutillu.
Nuannersortaavoq ilinniarluarsimasorpassuat piginnaasalippassuillu Danmarkimiimmata. Nuanniitsortaraa angerlartissinnaannginnatsigit.
Meeqqat atuarfii pitsannguallatsitsisut akilerneqartalerlik
Ilinniartitaanermut Naalakkersuisoqarfiup susassaqartut suleqatigalugit sanasariaqarpai pikkorissaanerit, ilinniartitsissutit aamma perorsaariaatsit misiligarneqarnikut, atuarfinnit sukkulluunniit atorneqarsinnaasut. Atuarfiit Naalakkersuisoqarfimmi immikkut ilisimasalinnit siunnersorneqarsinnaasariaqarput supervisererneqarlutillu taamatullu aamma aqutsinermut pikkorissarneqartariaqarput aamma ilinniartitsisut pisariaqartitsinertik naapertorlugu piginnaanngorsarsinnaasariaqarput.
Meqqat atuarfiini atuartut sanngiinnersaasa karakterii qaffatsinneqarsinnaappata soorlu kalaallisoornermi, danskisoornermi, tuluttoornermi matematikkimilu, taava atuarfiit ukiup tulliani immikkut aningaasaliiffigineqarsinnaanissaat periarfissaasariaqarpoq. Arsaartorneqassanngillalli angusassatik angusimanngippatigit.
Taamaasiorluta ilinniartitaaneq pitsanngortikkiartuaarsinnaavarput.
Supervision, nunaqarfiit inuilu qarasaasiaq atorlugu qaffarsartariaqarput
Eqimattanik oqaloqatiginnittartunik pilersitsisinnaasuugutta; ilinniartitsisut atuarfinnilu pisortaatut atorsinnaasaannik, pikkorissaasarnerillu siuarsarlugit aamma ilisimasaqarnerulernissamut periarfissat peqataanillu ammaallugu Danmarkimiit nunani allaniillu ilinniartitsisunik atorfinitsitsisinnaanissaq taamatullu inuutissarsiortut kattuffiillu tusarnaarluarlugit, taava periarfissaqarsinnaassajunnarsigaluarpoq meeqqat atuarfiisa pitsanngorsarneqarnissaat. Aningaasartaqarpulli iliuusissat, tassanili apeqqutaavoq aningaasaliinnginnissatsinnut akissaqarnersugut. Meeqqat atuarfiit ilungersoqaat, ilinniartitsisut artukkersorneqarpallaarput aamma inuttut ajornartorsiuteqarpallaarpoq ikiuisussanut eqqortunut innersuunneqarsinnaaneq ajortunik minnerunngitsumillu ilinniartitsisut ilinniarsimasut amingaataapput.
Qarasaasiaq iluaqutigalugu nuna tamaat ataqatigiisissinnaanerlutigu aamma nunaqarfinni avinngarusimasunilu ilinniartitsisut ikiorneqarsinnaalersillugit, ilinniartitsisunik allanik isumasioqateqarsinnaanngortillugit allanilllu ilinniarluarsimasunik illoqarfinni najugaqartunik, immaqa aamma supervisionersinnaanngorlugit tassunga alloriarsinnaagutta.
Suleqatigiissitsisuni Danmarkip suleqatigineqarsinnaanera eqqarsaatitsinniippoq.
Aamma Naalakkersuisut qularnaartariaqarpaat kollegianik sanaartornissaq, perorsaasut akissarsiaanik qaffaanissaq, ilinniarnermut atatillugu sungiusaatigalugu suliffissat amerlineqarnissaat. Kollegiani inissat taamatullu ilinniarnermut atatillugu sungiusaatigalugu suliffissat ikippallaaqaat. Tamanna Iliuuseqarfigisariaqarparput. Soorlu aamma inissianik allanillu sanaartornissaq kiisalu sualummik Nuummi iluarsaassinissat mikinngitsumik pisariaqartinneqarput. Angerlarartut sussaanngitsumik atungaqartinneqartarput.
Taamatullu oqareerluta neriuutigaarput, sanaartornerit, tungiuineq, inunnik isumaginninneq, utoqqarnik isumaginninneq aamma innarluutilinnik sullissineq taamatullu suliffeqarneq akaareqatigiiffiusoq pitsanngorsarneqarsinnaajumaartut.
Kisianni tunngavianut uteqqilaarta: Meeqqat atuarfii ikiortariaqarput. Pillarneqaratik.