Aningaasanut Inatsissap isumaqatigiinniutiginerani Aningaasaqarnermut Naalakkersuisup ilinniarfiit ikilisarniarpai, atuarfiit karakterigissaartitsinngitsut pillarniarpai. Naalakkersuisut arajutsivaat ukiuni kingullerni 40-ni namminneq sullarlussimanertik
Kiffartuussinermut isumaqatigiissutit meeqqat atuarfiani atulertariaqarput. Ulloq unnuarlu paaqqinnittarfiit taxameterimik aaqqissuussinermik eqqussivigineqartariaqarput. Tarnip nakorsaa ilungersorpoq. Inissiat aserfallassimaqaat aamma isatingassaannanngulerput. Utoqqarnik paaqqinninneq annikeqaaq. Peqqinnissaqarfik aqullaaqqavoq. Pisortat tungaanniit ikiunngippallaaqaagut angerlarsimaffeqanngitsut, persuttagaasimasut, inuillu kinguaassiutitigut kanngutsaattuliorfigineqarsimasut. Meeqqalluunniit kingutaat narlorsaasersorsinnaanngilagut imaluunniit nunami maani utoqqartagut timimik sungiusaasumik ikiorserneqartarnissaat qularnaarsinaanngilarput aamma pilattartissimasut allallu peruluutigisaminnik nappaatillit peqqissarfissaqartinngilagut. Inuiaqatigiinni tungiuineq aseroqqavoq.
Uffa aatsaat taama aningaasarsiortigaluta, uffa Kalaallit Nunaat aatsaat taama akissarissaartigigaluartoq.
Piffissami matumanerpiaq Aningaasaqarnermut Naalakkersuisutta uppertitariniarsaraatigut oqarluni innuttaasut pitsaanerusumik atugaqarnissaat Inatsisartut piumasarimmassuk, Aningaasanut Inatsisissaq oqimatigiisinneqarsinnaanngitsoq. Nassuerutigiinnartariaqaraluarpaa Illorsuarmi allat pingaarnerutikkitik….
Qaavatigut Naalakkersuisut nunarsuarmi piitsuunermut akiuussutissat pitsaanerpartaat ilanngarteriffiginiarpaat, tassalu ilinniartitaaneq.
Nunarsuarmi tamarmik ilinniartitaaneq inuit ataasiakkaat atungarissaarnerulernissaannut aqqutaavoq aamma innuttaasut amerlanerusut atugaat pitsaanerulersinneqartarput taamaasilluni inuiaqatigiinni ineriartorneq sorpassuartigut nungukkiartuutaanngitsumik pisinnaajartulersarpoq. Ilinniarsimassutsip inuit isornartorsiusinnaanngortittarpai, paasissutissanik pissarsiaqarsinnaanngortittarpai aamma tusarfiit upperiinnarnagit uppernarsaatissarsorsinnaanngortarput, ilinniarsimasut inuunertik naallugu inuunermut aningaasarsiornermullu sakkussaqalersarput. Taamatullu aamma nutaarsiassat paasilluarsinnaanngortarpaat taamatullu kikkit tamat oqartussaaqataanerisa ingerlarnga.
Allaanngilaq partiitoqqat killormorluinnaq kissaateqartut innuttaasut eqqarsaatigalugit. Innuttaasut namminneq pisinnaasariaqarput.
Inuit Kalaallit Nunaat qimattarpaat meeqqamik ilinniarnissaannut periarfissarissaarnerulersikkumallugit aamma toqqissisimanarnerusumik peroriartorsinnaaqqullugit. Inuit qimarrapput napparsimalertaramik utoqqalillutilluunniit. Aamma inuppassuit nunartik qimallugu nunamut allamut nuttarput qitornatik innarluuteqartut innarluuteqanngikkaluartulluunniit pisortanit sumiginnagaaqqunagit, sunalu tamarmi aallartittarpoq meeraaqqerivinni meeqqerivinniluunniit inissaqartitsinnginnermik taava atuarfinnut ingerlaqqittarput meeqqat atuarfiinut ilungersoqisunut aamma ingerlaqqiffinnut taamatullu ilinniarfinnut naapertuuttumik pitsaassuseqanngitsunut.
Pissutaavoq ilinniarfinni meeqqat atuarfiinut ilinniartitsisunullu tusarnaarsinnaannginneq aamma angajoqqaanut atuartunullu. Oqaluttuartuaraluarut politikerinut suut pisariaqarnersut iluarsartuussineq timitalerneqassappat. Maannakkutut ingerlaaseqarneq qimassagutsigu soqutigisaqaqatigiillu tamaasa ataatsimut isummersortillugit immikkut aningaasaliissutit amerlasoorsuunngitsut atorlugit amerlasuunik iluarsiisinnaagaluarpugut. Taakkulu immikkut aningaasaliissutissat tunniunneqapallattariaqarput.
Allaqquttussaanngilaq; atuarfiit pillartaraanni, ikiornagillu qaavatigullu sulisut piginnaanngorsagassaagaluit ikilisarlugit, taava nunatsinni inuttut aningaasarsiornikkullu ajornartorsiuterpassuagut qaangernavianngilagut. Ukiuni 40-ni ilinniartitaaneq akisussaaffiginikuuarput. Pisariaqarteqaarput allatut pingaarnersiuisalernissarput.
Innuttaasut pillugit – sualumik meeqqat inuusuttullu.
Pillaaqinata oqaloqatigiinneq atussavarput. Atuarfinnik.