Tupinnanngilaq Kalaallit Nunaat pisiareqqunngimmat.
Amerikamiut præsidentiata sianilluanngitsup siunnersuutaa kikkunnik tamanik attuivoq.
Aamma uppianeq sumi tamaaniippoq. Tamannalu immini alianarpoq.
Nallinnartuunngilagut, ukiuni 40-nik akisussaaffik tigumminikuuarput
Ersarissorsuarmik uppertikkuminartuunerussaaq isumaqaraanni atugarissaalerumaartugut USA-mit bloktilskudinik pisalissagutta. Amerikamiut iligaagut kisianni Danmarki, NATO-mut ilaasortat nutat aamma ilaatigut Naalagaaffiit Peqatigiit, uatsinnik illersuisut ataatsimooqatigiinnissamut qangarsuarli aamma sivisuumik atasussanik isumaqatigiissuteqarfiginikuuagut Danmarkimut atanerput aqqutigalugu. Massakkulli takuleriallaratsigit, politikkimi ileqqorlulluni paasissutissiinerit isumaqanngilluinnartut, pilersinneqartut ilinniarsimanngitsutsimit, nunarsuup sinneranut paasisimasaqannginnermit aamma tusagassiutinit kingulliunneqartuartunit.
Issittumi nunap inuii ilungersunartorsiorput. Tassa imaappoq naggueqatigut inuit, nunarsuarmi tamarmik, uatsinnut naleqqiullutik allarluinnarnik atugaqarput. Aamma inuit USA-mi najugaqartut.
Ussernartorsiornarsinnaavoq oqassalluni uangut atugarissaarnerusugut nukittugatta pikkorillutalu – aammami taamaappoq.
Eqqortorli tassaavoq qangarsuarli periarfissinneqarnikuugatta ineriartussalluta, ataatsimooqateqarluta, tassanilu Danmarkip naleqartitagut, oqaatsigut kulturerpullu paarilluarsimavai – uangut peqatigaluta.
Massakkulli taagorneqartorsuuneq ajorpugut nilliaatigigaangatsigu “suleqatigiinnissaq” kisianni tamanna pisariaqarpoq.
Akuttunngitsumik nunarsuarmioqatigiit akornanni upperiatsajasutut pissusilersortarpugut. Tamatuma tusamasaalluarnerput isumatuutullu isigineqarnerput innarlertarpaa aamma tamanna pissutaaqataasimassaqqooqaaq præsidentip uniffeqanngitsunik kullullip Twitterimi neqorooruteqarneranut sorpassuarnillu neqerooruteqarneranut.
Ajoqusiineruvorlu massakku uangut inuiaqatigiittut paasiniannginnatsigu soqutigisat suut tamatumani pineqarnersut. Tigusariniarneqassagutta ulorianartorsiuleriaannaavugut innarleruminarlutalu aamma nunarsuarmioqatitsinnut isumaqatigiissuteqarsimanngikkuta Naalagaaffeqatigiinnerput iluaqutsiullugu.
Tatigisinnaasatsinnik suleqateqarata isumaqatigiinniarnerit taamaattut ingerlannissaat misilittagaqarfiginngilarput Ilinniarsimassuseq, ilisimasat, nunanik allanik suleqateqarneq il.il. nipaatsumik eqqissillutalu siarsartariaqarpagut qularnaarlugulu inuiaqatigiittut peqqissuunissarput.
Politikeritut tamanna pingaarnerutittariaqaraluarparput.
Avissaartuunnerup imminut iluaqutissarsiortut pilersissavai
Partiit naalagaaffinngornissamut tapersersuisut avissaartuuttoqartillugu nuannaarnerpaasarput, Danmarkimi tamatigut pisuutissinnaasarpaat uangullu inngilinnguatut. Ilumoortorli tassaavoq Danmark suleqatigilluaratsigu aamma suleqatigiilluta ilitsinnut nukittuutut sassarsinnaasarpugut, soorlu USA-mut allanullu naalagaaffinnut pissaanilissuarnut.
Tamatumani taamaallaat pisariaqarpoq pereersut alarlugit siunissamut isigaluta nukittuutut ataatsimoornissarput. Ataatsimoorutta nukittunerusussaavugut.
Soorunami uangut aalajangiisussaavugut, tamanna Namminersorneq pillugu Isumaqatigiissummi isumaqatigiissutaareermat, taamaakkaluartorli avaqqussinnaanngilarput nunarsuarmioqatitsinnik suleqateqartariaqarata. Inuit pisinnaatitaaffiit akiginagit, sanngiitsortagut akiginagit aamma uppertikkuminarnerup piliai tunngavittut atornagit. Politikki piviusunik tunngaveqassaaq, ilisimasanik aamma paasissutissiissutinik.
Nunarsuarmioqatitta suleqatiginissaannut isumaqatigiissuteqanngikkutta, niueqatigiinnermut isumaqatigiissuteqanngikkutta aamma nunani allani atorfilittat ataqqillugit suleqatigilluanngikkutsigit, ilinniarluarsimanngikkutta, nutaanik isertitaqalinngikkutta aamma attanneqarsinnaasumik inuiaqatigiit ineriartortinneqanngippata saperpugut.
Kialluunniit kissaatiginngisaannarpaa pisuut piumasattaannguaminnik pissasut piitsullu qinusartutut inuussasut.
Isumaqataalluinnarpugut nunanut allanut politikki pillugit Danmarkimik suleqateqarnerput ineriartortinnerusariaqaratsigu, aamma oqartussaaffiit 32-t suli tigusimanngisagut pillugit, immikkoortuni assigiinngitsuni sulisoqarnerulernissarput qinnutigisariaqarparput, tassani Suleqatigiissitsisuni isumaqarpugut sulisut taakku nammineq akilertariaqarigut.
Kisianni tassanngaanniik isumaqassalluni USA-mit bloktilskudit; imaluunniit nuna allamit tassaasussaavoq “uukapaatitaaneq”; matumani akigissagatsigit nuna, aatsitassat, aatsitassat qaqutigoortut aamma illersornissakkut nunatta inissisimalluarnera, taamaaliussagutta uukapaatikkuminarpallaassaqaagut innuttaasullu ulorianartumut inissillugit.
Qanga USA-mi indianerit imigassamik akilerlugit pisiarineqarput imaluunniit uukapaatitaapput nunaminnillu arsaagaallutik.
Taamaattumik Kalaallit Nunaata USA-mut tuniniarsarinera; qanorluunniit taaguusersorneqaraluarpat, tassaaginnarpoq “Kalaallit Nunaannik uukapaatitsiniarneq”.
Tungiuineq ilinniartitaanerlu salliutinneqarlik
Innuttaasunut ukiuni 40-ni akisussaanikuuvugut. Aallarniutigalugu akisussaanerput nassuerutigisigu allanullu tunniuteqqinnagu. Piulluanngitsuliornitsinnut nammineq pisuuvugut.
Tungiuineq, ilinniartitaaneq ataqatigiinnerpullu ulorianartorsiortinneqarput.
Akisariaqarparput ilisimasat sakkugalugit, Aningaasanut Inatsimmi iluarsartuussinissat pingaarnerutittariaqarpagut, taamatullu tungiuineq aamma sumiiffinni sapinngisamik amerlanerpaani aningaasarsiorneq nungukkiartuutaanngitsoq.
Avissartuukkutta allat periarfissarissaarnerulissapput atornerlunnissatsinnut.
Nunat allat eqqarsaatigalugit Naalagaaffeqatigiinni ataatsimoortariaqarpugut aamma nunatsinni innuttaasut ajornartorsiutaat eqqarsaatigalugit ataatsimoortariaqarpugut.