Kommune Kujallermi Suleqatigiissitsisut immikkoortortaqarfiata qaammani kingullerni arlalissuarni Kalaallit Nunaanni politikkikkut ineriartorneq ernummatigigaluttuinnarpaa.
Maanakkaut Naalakkersuisuusut meeqqat atugaannik pitsanngorsaaniarnermut kingaallassaapput. Partiit tamarmik Naalakkersuisut aamma Siumup talii qissallatsittariaqarnikuuaat akuerseqqullugit Danmarkip ikiortiseriniarnissaanut aamma aningaasanut inatsisiliarineqartartut siuliini takujuminaappoq sutigut meeqqat atugaat sukumiisumik pitsanngorsarniarneqarnersut. Aamma takusinnaavarput kommunit Namminersorlutik Oqartussanit annerusumik ikiorneqarnikuunngitsut meeqqat atguaat eqqarsaatigalugit. Meeqqat atugaasa oqallisigineqarneranni eqiigasuusaarneq allamik naliligassaanngilaq, partiit meeqqat atugaat pitsanngorsarniarlugit ilungersuuteqartut taasisissaannik arsaarinninniarnertut. Allatut oqaatigalugu pinngitsaalineqarlutik aatsaat pitsanngorsaatissanik aalajangiisarput, nammineq pineqartut pingaarnerutillannguarnagit.
Piviusulikkersaarummi “Illoqarfimmi meeqqat tammartarfianni” ajornartorsiut pioreersoq sammineqarpoq, meeqqat tujormisut aamma assigiinngitsutigut kanngutsaattuliorfigineqartartut.
Tassunga atatillugu maannakkut naalakkersuisuusut, uangut isumarput naapertorlugu ilungersunartut iluarsiniarnissaannut aaqqiissutissanik pitsaasunik saqqummiussisinnaasimanngillat paarlattuanillu avataaniik ikiuukkusuttunut kinguarsaapput. Taamaakkaluartoq naalakkersuisut suliarerusunneruaat sanaartugassarsuit tusaamaneqaatigilersinnaasatik soorlu timmisartorsuarnut mittarfiit – aningaasarsiornermut immikkut ilisimasallit naapertorlugit – qaqugumulluunniit sinneqartooruteqalinngisaannartussat. Mittarfissuit akissaat isertuunneqarpoq.
Kingullermik ukiuni kingullerni Naalakkersuisuni siulittaasuusimasoq Namminersorlutik Oqartussat Aningaasaqarnermut Ataatsimiititaliaanut aggersarneqaraluarami takkutinngilaq naak paaserusunneqaraluartoq Namminersorlutik Oqartussat Mittarfiliortiternissanut qanoq aningaasartuuteqassanersut. Tassuuna ajornartorsiutip tullia erserpoq tassalu ersarissumik ingerlatsisoqannginnera. Inuit tamat oqallinneranni nipangersaasoqanngisaannaassaaq – aamma Inatsisartut Naalakkersuisunut sulisitsisuupput. Inatsisartut naalakkersuisunik nakkutilliiniarneranni tamanna ajornartorsiutaavoq imaannaanngitsoq – aamma taamaasilluni demokratip nakkutiginiarneranut – naalakkeruisut aningaasaliissutinut taama amerlalluinnartigisunut piaaralutik paasissutissanik pingaaruteqarluinnartunik isertuussimmata.
Kommune Kujallermi innuttaasut sanngiitsut aamma meeqqat taamatullu ilaqutariit ulorianartorsiortut kiffartuunneqarnerat ajornartorsiutaavoq aamma ineriartorneq ilinniartitaanerlu siuariartorunnaarnikuupput – aamma tamatumani inunnik tungiuineq nakkariartorpoq ilaatigut peqqinnissaqarfiup kiffartuussinera eqqarsaatigalugu, meeqqat atuarfii ilungersoqaaq aamma inuussutissarsiortut sunaluunniit qujaruttarpaat ineriartorneq pilersikkusukkaluarlugu.
Nunarsuarmi nunat pinnernersaanni inuuvugut aamma nunap immikkoortua najugaqarfipput Kujalleq nunarsuarmi nunat pinnernerpaat ilagigunarpaat. Mittarfiup saniatigut aaqqiissutissat allat tikkuarsinnaavagut, Kujalliup ineriartorneranut uummarissaataasinnaasut. Kisianni siunissarput siulliullugu qularnaartariaqarparput; tassaappullu meeqqat, meeqqat atugaat aamma ilinniarnissaat.
Uangut Kim Kielsenimut Naalakkersuisunullu utaqqisinnaanerput tamaannga killeqarpoq aamma isumaqarpugut nutaanik Naalakkersuisortaartariaqartugut.
Kommune Kujallermi Suleqatigiissitsisut immikkoortortaqarfiata naalakkersuisoqatigiit meeqqat pisinnaatitaaffiinik pingaartitsisut aamma inuttut aningaasarsiornikkullu akisussaassuseqarlutik ingerlatsisut suleqatigerusuppai.
/ Kim Lyberth