Ilumoorsinnaanngilaq ikinnerussuteqartunik Naalakkersuisoqaratta Tunumik qangatut ingerlatsilerusuttunik. Naalakkersuisut pilersaarutigaat ilinniarfiliornissaq taamaallaat ilinniartitsissutiginiarlugu Tunumiusut kalaallisuuliortarneq. Suliffissat, ilinniarfissat aamma aallarnisaasarnerit Tunumi inissaqartinneqanngillat.
Kultur piuinnassaaq, kisianni pingaarnerunngila isertitsissutaasinnaasunut nutaanut aningaasaliigaanni, sullivissanut ataavartunut aamma ilinniartitaanermut maannamut naleqqiullugu annermik?
Tunup pisariaqartippaa takornariartitsinerup iluanik nutaaliortoqarnissaa, aallarnisaasarneq aamma oqaatsinik ilinniartitsinerup nukittorsarnissaa, suliffissaqartuarsinnaaqqullugit. Taakkuupput Naalakkersuisut Tunumut angalanertik pillugu namminneq inerniliinerat. Inunnik isumaginninnerup, ilinniartitaanerup aamma aningaasarsiornerup siuarsarnissaat taama periarfissiissutaassaaq.
Ilinniartitaanermut takornariartitsinermullu taamatullu aallarnisaarsarnermut aningaasaliissutit aningaasaliinerussapput sullivinnut nutaanut taamaasillutillu Landskarsimut akileraarutinik nutaanik akiliisoqartalissammat.
Takornariaqarnermik siuarsaaniarlutik ilungersortut periarfissaat pitsaanerusariaqarput aamma nutaanik suliffiliorusuttut – aamma Tunumi.
Taamaatilaariarit, Vittus
Danmarkimiit bloktilskudinik pisarunnaarnissamut takorluukkanut meeqqat atuarfiini unammeqatigiinnerulernissamut eqqarsaatinik ilaartorneqarput – angusakilliortut ilanngartuuttalerniarlugit – taamaattoqarsinnaanngilaq. Peqataanik Naalakkersuisut Tunumiunut kalaallisuuliorfimmik pilersitsinissaq nipangersaatigaat. Kanngunaqaat.
Aningaasaqarnermut Naalakkersuisup eqqarsaatiginerusariaqarpai Danmarkimik suleqateqarnissarput nunatsinnut Tunumullu sutigut nukittorsaataasinnaassanersoq. Aamma naliginnaasumik meeqqat atuarfiat ingerlaqqiffiillu nukittorsartariaqarpai. Inuusuttagut allatullu pikkoritsigipput, taamaattumik piumasaqaatigut qasukkassanngilagut aamma meeqqat atuarfiini najoqqutassat, pilersinniartariaqarparpulli meeqqat atuarfiat annerusunik piumasaqaateqarsinnaasoq.
Tamanna Tunumiunut oqaloqatigiissutigisinnaavarput avinngarusimasumi meeqqat atuarfiat pitsanngorsarumallugu, sulinermi tunngavinngortussamik.
Oqaatsinik ilinniartitsineq nukittorsassavarput atuartuutigut nammineq oqaatsiminnut nukittuneruleqqullugit aamma danskisut tuluttullu. Inuiaqatigiit pilersittariaqarpagut oqaatsinik arlariinnik atuisinnaasut taamaattumik periarfissaqarnerusariaqarput suleqatigiinnermut niueqatigiinneq, takornariaqarneq, nunanillu allanik unammilleqateqarneq eqqarsaatigalugit.
Pingaarnersiuisinnaagutta sapinngilagut, assagummi sarliaannartussaanngilagut piniagassaqarlualernissaalu utaqqillugu. Massakkut iliuuseqartussaavugut qularnaarlugu ilinniarluartalernissarput aamma meeqqat inuusuttullu atugarissaarnerulernissaat.
Danskisut oqaasillit danskisut tuluttullu ilinniartitsisut Danmarkimeersut periarfissaapput, taakkulu tikilluaqqusariaqarpagut aamma ilinniarfinniituutitta pikkorinnerunissaat piumasaqaatigisinnaasariaqarparput.
Ilinniarneq innuttaasunut siunissaavoq.
Tunu asuli tusaqqusaarutinik nipangersarneqassanngilaq.
Meeqqat inuusuttullu periarfissaqartariaqarput siunissaqarnissaminnut, inuttut ajornartorsiutitik kalikkunnaarlugit aamma atuarfimmit artorsartumik ilinniartinnerlunneqaratik.
Nalunaaruteqartartut illersortariaqarput, suliffissat pilersittariaqarput aamma ataatsimut isigalugu meeqqat ilinniarfissaat isumannaatsuunissaallu qulakkeertariaqarput.
Aamma inuit najukkami najugallit eqiigasut aallarnisaanissaminnut periarfissinneqartariaqarput.
Piaarnerpaamik.