Innuttaasullu nunatsinnit qimarratsillugit. Inuusuttut siunissaarutsinneqarput. Naalakkersuisut aningaasaliinngippata, oqarlutilli ajornartorsiortugut, Aningaasanut inatsimmi KAIR-ikkut milliardikkaanik aningaasaleeqqinnissamut piginnaatitsisoqarnera takusinnaagatsigu tupinnarpoq. Taamatut ingasattuliornq qaqugu inatsinneqassava? Naalakkersuisut taamatut tulleriinnilersuinermikkut pisortanit ikiorserneqartartut amerliartortipiloorpaat.
Naalakkersuisut periusissiaminni illuatungaatigut allapput inuusuttut ilinniarnissaat pingaartuusoq, illuatungaatigut takuarput ”aningaasaliisoqannginnera” pissutigalugu ilinniartut holdit marluk NI-imi ilinniarnertik aallartissinnaanngikkaat. Naalakkersuisut tulleriinnilersuinerat Suleqatigiissitsisut kamaatigaat, tassami Nunat Tamat Akornanni Niuernermik Pilerisaarisarnermillu kiisalu Aningaasanik Isumalluutinillu Aqutsinermik ilinniarnernik salliutitsinatik Niuernermik Ilinniarfimmut aatsaat kingusissukkut nalunaaruteqarnerat ajorluinnartumik ingerlatsineruvoq.
”Pissutsinut takussutissaalluarpoq inuusuttut aningaasarnermik ilinniagaqartinnagit nunalluunniit tamalaat akornanni pissutsinik ilinniagaqartinnagit Majoriamut qinnuteqartunut aningaasartuuteqarpugut, pisortanit ikiorserneqartussaanngortippagut suliffissaaleqisunngortillugillu. Illoqarfimmut ilinniarfiusumut nuussinissap piareersarnera ilinniartullu inaannik pissarsinissaq ajornakusooreeraluaqisut sanaartornissaq Naalakkersuisut aamma pingaarnerutinngilaat”.
Naalakkersuisut inuuttaanik sullissinngilluinnarput namminnerli eqqaamaneqaatissaminnik imminuinnaq eqqarsaatigalutik pingaarnersiuillutik!
Ilinniarneq sorleq tullinngutissava? Ilinniartut aallartittussaagaluit sunik allanik periarfissaqarpat?
”Utoqqaat, angerlarsimaffeqanngitsumik, peqqissutsimik suliaqartut, SIK malillugu akissarsiallit, perorsaasut, isumaginninnermi perorsaasut, inuit atukkamikkut navianartumiittut maannakkullu inuusuttut ilinniagaqarniartut pingaarnerutinneqanngilluinnarput. Neriuppunga Kalaallit Nunaata eqqaamassagaat maannakkut naalakkersuisooqatigiit qanoq iliorfigineraatik”, Tillie Martinussen oqarpoq.
Aningaasanut Inatsisissatut siunnersuummi qupperneq 30-mi atuarneqarsinnaavoq Naalakkersuisut imminnut piginnaatittut; ”Kalaallit Airport Holding A/S-imut aningaasanngorlugit piginneqataassutinut aningaasaliinikkut Piffissamut Sivisuumut Aningaasaliissutinut Aningaasaateqarfimmut piginneqataassutinut aningaasalinissaq, annertunerpaamilli 1 mia. kr.”.
Aap, annertunerpaamik 1 mia. kr. Paasinarpoq 100.000-ikkaanik inuusuttunut pimoorissillutik ilinniagaqarusuttunut aningaasanik nassarsinnaanngippata. Isumaqarnarpoq KAIR Naalakkersuisunut frimærkimininnguanik atukkiisinnaassasoq, Naalakkersuisut taamaalillutik inuusuttunut ilinniagaqarnermik aallartittussaagaluanut utoqqatserlutik allagaqarsinnaaniassammata.
”Quujassuarusunnarpoq aningaasaqarnermut ilinniarnernut aningaasat pineqarmata. Nassaartoqarsinnaanngitsoq. Tamannami inuusuttunut inuunerisalu sinnerannut kingunerluttussaavoq. Pisortat pissutsinik ajortunngortitsilluinnassappata sooq suliniuteqartoqassava. Suliffeqarfiugaluarpat, ilinniarnerugaluarpat kigutinulluunniit narlorsaataagaluarpat Namminersorlutik Oqartussani napasuliani maannakkut politikkikkut aqutsisut naatsorsuutigisinnaanngilagut. Sangujoraartumik politikkeqartoqarpoq imminnullu assortuuttunik politikkeqartoqarluni. Ilinniarnerit salliutippagut salliutinngilagulluunniit”? Tillie naggasiivoq.
