Tasiilami eqqaanilu kinguaassiutitigut kanngutsaattuliortartunik uikkaarpoq taamaattumik politiit pisariaqartinneqarluinnarput. Kommunefogedinilli politinillu imaaliallaannaq nunaqarfinni atorfinitsitsisoqarsinnaaneq ajorpoq sulinerminni atugaat akissarsiaallu ajorluinnarmata.
Nuannaarutigalugu Suleqatigiissitsisuni tusarparput Kalaallit Nunaat perngarluni Christiansborgimi aningaasanut inatsisissaq isumaqatigiinniutigineqalerpat toqqaannartumik peqataasussanngortoq.
Folketingimi ilaasortaatitatta periarfissiissutigineqartoq atorluartariaqarpaat qularnaarlugulu Kalaallit nunaanni politiit kommunefogedillu akissarsiarissaarnerulernissaat, Danmarkimut naleqqiullugu nunatsinni politiit sakkortunerujussuarnik nalaataqartarmata.
Meeqqanut inuusuttunulu kinguaassiutitigut kanngutsaattuliornerit tamarluinnarmik qisuarfigineqartalertariaqarput.
Taamaattumik sumiiffinni meeqqanut kanngutsaattuliornerit naliginnaaffiini politiit amerlisariaqarput.
Aamma sumiiffinni taamaattuni politiit sullissisullu inatsisitgut illersorneqarnerusariaqarput soorlu PTSD-qalernissaannut serniginiarlugit ungasinnerusoq isigalugu politiit sullissisullu kinguaassiutitigut kanngutsaattuliortarnernut akiuuteqataalluaqqullugit.
Kommunefogedit politiillu sulinermi atugaat akissarsiaallu folketingimut qineqqusaarnermi tusaqqusaarutigineqavissorput. Suleqatigiissitsisuni taamaattumik isumaqarpugut periarfissaqarallartillugu iluarsiisoqapallattariaqartoq qineqqusaarutigineqartullu piviusunngortillugit.