Naalakkersuisut naggataasersorpat? – Suleqatigiissitsisut

Augustip uulluisa 13-ianni allataavoq, isumaqarpugulli suli oqallisissaalluartoq. Ajuusaarnarpoq Inatsisartut tusaaniarneqanngimmata. Neriuppugut nunarput patajaattumik aqunneqassasoq, politikkikkullu toqqissisimanartumik ingerlanneqaqqilissasugut

Suleqatigiissitsisuni isumaqarpugut Inatsisartut immikkut ataatsimiinnissaannut aggersaapallattoqartariaqartoq. Nunap inuisalu pisariaqartinngilaat Naalakkersuisuni Inatsisartunilu uivertoqalernera.

Mittarfiit, aningaasalersuineq Naalakkersuisullu pillugit immikkut Inatsisartut ataatsimiisinneqartariaqarput.

Naalakkersuisut immikkut ataatsimiittoqarnissaanut aggersaasariaqarput. Tamannalu pisariaqarpoq mittarfiit pillugit atsioqatigiittoqannginnerani.

Ataatsimiinnermi qulequttat marluinnaat oqaluuserineqartariaqarput:

Mittarfiliassat taakkulu aningaasalersornissaat

– Ilanngullugit Inatsisartut apeqqutigisinnaasaat ulloq mannamut akissutissarsineqarsimanngitsut pillugit.

Naalakkersuisut nutaat.

TV2-mi nutaarsiassat naapertorlugit Naalakkersuisup ataatsip Naalakkersuisut siulittaasuat akerlilersimavaa; tassalu Erik Jensenip. Taamaattumik Naalakkersuisut tamanna attassinnaanngilaat?

Peqataanik Siulittaasup tunuliaqutaasa siorasaarutigaat mittarfinnut tunngasut siulittaasup aningorsinnaanngikkai taamatullu Naalakkersuisut 16-nut kisitsisinnaajunnaartut taamaasillutilu amerlanerussutaarullutik (Inatsisartuni ilaasortat 31-iunerat aallaavigalugu). Aningaasaqarnermut Ataatsimiititaliap atsioqatigiittoqarnissaa unitseqquaat piumasaralugulu sukumiisumik ilisimatinneqarnissartik kiisalu Naalakkersuisut siulittaasuannik, Kim Kielsenimik isumasioqateqarnissartik piumasaralugu.

Kikkut tamarmik nipangersarneqarput
Suleqatigiissitsisuni Inimi Ataatsimiittarfimmi siorna ukiakkut ataatsimiinnermi saqqummiussinitsinni mianersoqqusivugut.

Pissutaalluni Inatsisartuni ilaasortat suliamut tunngasunik tamakkiisumik paasissutissinneqarsimannginnerat Aningaasanut Ataatsimiititaliami “Isertuussassatut” naqissuserneqarmata naak pineqaraluartoq Kalaallit Nunaata oqaluttuarisaanerani aningaasaliinerit annerpaartaat.

Inatsisartuni ilaasortat 31-t paasissutissanik tunineqanngillat aamma § 37 naapertorlugu apeqqutit akineqartarput suunngitsumik, avaqqutaaraluni ilaannikkullu qarluallattoqarnerluunniit ajorluni.

Aningaasalersorneqarnissaat peqataanik isornartorsiorparput naak toqqarlugu oqaatigisinnaanngikkaluarlugu suut pinerlutigit kiisalu aamma aningaasalersuinissap ataqatigiinnera apeqquserparput taamatullu aamma makku apeqqutit akineqannginnerat:

1. Mittarfiit pingasut taartigisinnaasaat. Tassa soorlu Kangerlussuarmi mittarfiup iluarsaannissaa, nunami atlantiku qulaallug mittarfiit imminut akilersinnaassusaat, sila ajortillugu periuserineqartartussat kiisalu mmittarfiit takissusaat – allinissat millinissaalluunniit – periarfissat allat.

Kalaallit Nunaanni namminersorlutik inuutissarsiortut qanoq periarfissaqartigippat suliat ilaannut neqerooqataasinnaanissaat aamma sanaartornerup nalaani inuutissarsiornikkut kissaatigisatsitut siuariartoqassava?
Innuttaasunut angalasartussanut angalaneq qanoq akisunerutigilissava – nuna tamakkerlugu – mittarfiliortiternerit naafferarnissaannut akissaqarumalluni?
Tungiuinermi kiffartuussinerit sorliit takusarunnaassavagut peqqinnissaqarfimmi, inunnik isumaginninneq, angerlarsimaffeqanngitsut inissaaleqisut eqqarsaatigalugit aamma piffissaq ungasinnerusoq isigalugu isertitassat iluarsartuussinerillu amingaataasut eqqarsaatigalugit?
Qanoq iliussaagut mittarfiit akilersornissaannut Naalakkersuisut amerlanerussusiisartullu naatsorsuutaat ajussagaluarpata? Kipusoortoqassappat taava qanoq iliortoqassava? Akiitsorfigummi pinngitsoorata akilersortussaavagut.

Isornarluinnaqqissaarpoq partiit marluk mittarfiliortiternissat akuerimmatigit aamma Inatsisartuni ilaasortat akisussaasut siusinnerusukkut qisuariarsimanngimmata aamma Naalakkersuisunut ilaasortaq ataaseq. Piffissaagallartillugu oqarnissaq ajunnginneruvoq kingorna tusaamanerlunneqalersinnaaneq pinngitsoortinniarlugu.

Peqataanik innuttaasut nunattalu pisariaqartinngilaat eqqarsaatigissallugu Naalakkersuisut ulluni makkunani iliuuseqarnersut piginnaatitaanatik – tassa tapersersorneqaratik.

Immikkut ataatsimiittoqartariaqarpoq imaluunniit allatut ajornartumik qinersisariaqarpugut.

Minnerpaamillu partiit taakku marluk amerlanerussusiisimasut takutittariaqarpaat uummamminni kikkut tamat oqartussaaqataanerat suli ataqqinerlugu. Paasiniarlugulu akunnerminni qanorpiaq ingerlasoqarnersoq.

Mittarfiit pillugit kanngunartuliat ersarissiartuinnarput. Sanaartornissarli pillugu atsioqatigiinneq naamik.

Uanga isumaqatigiissuteqartussaasuuguma mianersungaatsiartariaqarunaraluarpunga, ullumikkut politikkikkut tukattuliornerit iluamik paasisaqarfigitinnagit.

Tillie Martinussen

Mittarfiit pillugit Naalakkersuisunut apeqqutigut uani takusinnaavatit:
Danskisuui:
https://sulesam.gl/category/lufthavne/

Kalaallisuui:
https://sulesam.gl/kl/category/mittarfiit/