Qularutigineqarsimappat Namminersorlutik Oqartussani massakkut qanoq pingaarnersiuisoqarsimanersoq, qinersisartut qularunnaarsimassajunnarsipput. Pingaarnersiuinerit sussaanngillat.
Timmisartunut mittarfiit akisoorsuit akissaqartippagut, kisianni napparsimasortatta ajorunnaarsinnissaannut akissaqanngilagut.
Napparsimasut, innarluutillit aamma tarnimikkut nappaatillit, utoqqaallu ikinngitsut nunarput qimallugu aallararput, tamannalu paasinarluinnarpoq.
Nunatsinni tamarmi nakorsat, peqqissaasut aamma sundhedsassistentit ulaperulupput ataasiakkaarlutik inuit arlallit suliassaat isumagisarlugit aamma ilungersoqaat. Eqqarsaatigilaarsiuk inunnik paaqqutarinnikkumallutik ilinniariarlutik napparsimasunut naaggaartortariaqarlersimasut. Inuit tamakkut toqqutigisarpaat.
Isumaqarpunga Naalakkersuisut akisariaqaraat kikkut napparsimasut – amerliartuinnartut – katsorsarneqarsinnaassannginnersut.
Inuit tarnimikkut napparsimasut aamma allat soorlu ADHD-ertut taamatullu utoqqaat nappaatillit aamma katsorsarneqarsinnaanngitsumik nappaatillit kiisalu napparsimasut sapigallit nunartik qimattariaqartarpaat iluamik ikiorneqarusullutik. PIngaarnersiuisoqartariaqarpoq. Inuit pillugit utoqqatsissutissarsiortoqassanngilaq, tutsuviginartunik akineqartariaqarput.
– Iluarsartuusseriaritsi, danskit nunat allamiullu napparsimavii suleqatigileriarsigit aamma peqqinnissaqarfitsinnut avataaniik suliartortut tikikkaangata pitsaasumik pineqartalerlik, immikkut aningaasaliiffigalugit. Tamakku tunngaviusussaapput – inuiaqatigiinni peqqissuni.
Angut utoqqaq avannaani illoqarfimmi pulaagara, inuunini tamaat ilungersorluni suliuarsimasoq, SANA-mi seeqquusalertissimavoq, piginnaanngorsaqqinneqarsinnaasimanngilarli. Suliunnaartariaqarsimavoq aamma massakkut pitsarluppoq, illuni paarisinnaajunnaarsimavaa ullunilu naliginnarni isumagisassani isumagisinnaajunnaarsimallugit. Pillorissarneqarsinnaanngimmat, utoqqalinersialittut inuulluataarnissaanik arsaarneqarpoq.
Allatut ajornartumik utoqqaat illuannut nuuttariaqarsimavoq, annermik aningaasartuutaasussanngorlugu uffa taamattariaqarsimanngikkaluartoq peqqinnissaqarfik iluarsiniarneqarsimasuuppat.
Assortorneqarsinnaanngilaq sulisussarsiorneq imaannaanngeqimmat. Tamannali nalunngilarput taamaat5tumik allannguinikkut nunat allamiut annermik suleqatigineqalertariaqaraluarput aamma Nunat Avannarliit saniatigut nunat allat, napparsimasortagut katsorsarsinnaajumallugit.
Angerlarsimaffeqanngitsortagut, meeqqat aamma inuusuttut, meeqqat atuarfiat taamatullu peqqinnissaqarfik ilungersorput taamaattumik kiffartuunneqarnerat ilanngarterivigineqassappat innuttaasut ajornerujussuarmik atungaqalissapput.
Taamaakkaluartoq mittarfiit allallu akissaqartippagut, allanik aningaasaleeqatissarsiunnguarata naak naatsorsuinermi tunngaviit pitsaasut piginngikkaluarigut.
Kanngunaqaaq napparsimasut katsorsarneqarsinnaanngimmata.
Peqqinnissaqarfik ilanngartuivigineqarsinnaanngilaq. Piiaaffigineqareerpoq.
Suliassat angisoorsuit akissaqartinngisagut pillugit pingaarnersiuisoqartariaqarpoq.