Kalaallit Nunaat inuutissarsiornikkut pingaarutilimmut allorialeruttorpoq. Suut tamarmik aalassatsinneqarput Nuummi Ilulissanilu mittarfiit nutaat aallartinniarlugit. Pisortat ingerlatseqatigiiffiutaat sinneqartoorutaannik arsaartorneqarput mittarfiit akissaqartikkumallugit.
Politikkikkut aalajangerneq Kalaallit Nunaanni sunut tamanut kikkunnullu tamanut kinguneqartussaavoq.
Taamaattumik suliassarsuarnut tunngatillugu akisussaasutut pisussaaffeqarnermik misigisisimanissamut pisariaqartitsipput.
Akissaqartinneqartariaqarput aamma kalaallit inuiaqatigiit sanaartornerup ingerlanerani kingornalu ingerlasinnaasariaqarput. Taamaattumik Inatsisartut sualummillu Aningaasaqarnermut Ataatsimiititaliaq paasissutissanik tamakkiisunik tunineqartariaqarpoq taamattumik aamma Naalakkersuisoq kinaagaluartorluunniit isumasioqatiserineqaraangami orniguttartussaavoq.
Naalakkersuisut Siulittaasuannut isumaqasioqatiserineqarnini ilassinngilaa taamaasillunilu atorfini sumiginnarlugu, tamanna Suleqatigiissitsisuni atorfimmik paarsilluannginnertut, pimoorussunnginnertut kanngunartutullu isigaarput!
Naalakkersuisut paasissutissanik tamakkiisunik Inatsisartunut saqqummiussinngippata sualummik Aningaasaqarnermut Ataatsimiititaliamut taava Naalakkersuisut ataasiakkaat suliassat aningaasalersornerannut ataasiakkaarlutik akisussaatinneqartariaqarput.
Pilersaarut naatsorsuutigineqartunut naleqqiullugu 1 koruuninik, 1 million koruuninik imaluunniit 999 millioner koruuninik akisunerussavara, taamaassimappat Naalakkersuisuni ilaasortat aningaasaliissutit pillugit naatsorsuutinut ataasiakkaarlutik akisussaatinneqartariaqarput. Aningaasat inuiaqatigiit aningaasaatigaat aamma aningaasat inuiaqatigiinnut atorsimasinnaagaluarpaat, kiffartuussinerit akiisa appartinnissaannut atorsimasinnaagaluarpaat aamma tungiuinerup pitsaanerulersinnissaanut.
Naalakkersuisut Siulittaasuata Aningaasaqarnermut Ataatsimiititaliamik isumasioqateqarniarani qinerpaa. Tassa imaappoq piaaraluni paasissutissat Inatsisartunut apuutsaaliorpai.
Pisut naliginnaasuuppata naalakkersuisut politikkikkut tatigineqannginnerat nalunaarutigneqarsimassaglauarpoq kisianni suliaq una allanik aamma kinguneqartussaavoq politikkikkuinnaanngitsoq.
Suleqatigiissitsisuni taamaattumik piumasaraarput Naalakkersuisut ataasiakkaarlutik inuttut mittarfililortiternissanut aningaasaliissutit tutsuviginanngitsut akisussaaffigissagaat. Allatut pisoqassappat kanngunarpallaassaqaaq. Kikkut tamat oqartussaaqataanerat atorlugu ingerlatsigaluarpugut?
Inatsisartut Naalakkersuisunut sulisitsisuupput, demokrati taamaappoq. Kikkulluunniit pisortaminnut qaaqquneqareeraluarlutik takkutinngitsoortut, soraarsinneqartarput. Iliuuseq ajorluinnaqqeqqissaarpoq.