Qularutigineqassanngilaq ulluni makkunani aalassassimaartoqarmat Kommuneqarfik Sermersuumi innuttaasunik toqqissiviilliortitsisumik. Taamaattumik Inuit Ataqatigiit aamma Suleqatigiissitsisut Asii Chemnitz Narupip tunuarnerata kingorna suleqatigiinniarlutik politikkikkut isumaqatigiissuteqarput. Tamanna valgtekniskiusumik suleqatigiiffiussaaq.
Meeqqat pingaarnerpaatinneqarput aamma Inatsisartuni Danmarkip ikiortiserineqarnissaa pillugu Inatsisartut aalajangernerisa kingorna suliniutissat tigussaasut aallartinneqarput. Suliniutit aallartinneqareersut:
Meeqqat inuusuttullu ulorianartorsiortut suliniarfiginissaasa nukittorsarneqarnissaa, inunnik isumaginninnerup iluani pinaveersaartitsinikkullu suliniutit aamma meeqqanut inuusuttunullu neqeroorutit pitsaasut; ingerlatiinnarneqassapput.
Kommuneqarfik Sermersuup innuttaasullu kissaatigaat kommuni amerlasuunik pissusilik pilersinneqassasoq, tassani meeqqat inuusuttullu innarsinnaassapput toqqissisimallutik aamma ulloqartassapput nuannaarlutik.
– Borgmesteri IA-meersoq toqqassavarput 2017-mi qinersinermi qinersisartut aalajangiinerat ataqqigatsigu aamma amerlanerussuteqarluartut tassani kissaatigimmassuk Asii borgmesteriussasoq kommunimilu siuttuulluni. Uggoreqaarput tunoqqutaarisoqarmat aamma appisaluussisaqattaarnerit initoqimmata naak uangut kommunit innuttaqarnissaanni innuttaasugut ataatsimoortariaqaraluartugut meeqqat inuusuttullu pillugit aamma kommunalbestyrelsimi suleqatigiinneq initunerusariaqaraluarpoq ataatsimoorlutalu anguniagaqarsimasariaqaraluarpugut avissaartuunnata.
Innuttaasut pillugit aaqqiissutissat pitsaanerpaat nassaarerusuppagut eqqarsaatigalugit meeqqeriviit, angerlarsimaffeqanngitsut, meeqqat aamma inuusuttut tujormisut, sanaartorneq aamma innuttaasorpassuarnut kommunip illoqarfiini najugaqartunut aaqqiissutissat pitsaanerpaat nassaarisariaqarpagut, taama oqarpoq Michael Rosing.
– Immikkoortortaqarfitta aamma nuna tamakkerlugu kattuffiup aalajangernerput tamakkiisumik tapersersorpaat. Innuttaasut pitsaanerpaamik sullinneqarnissaat kissaatigaarput aamma eqqissilluta sulerusuppugut sullisserusullutalu avissaartuunnata. Meeqqat inuusuttullu ikiorneqarnissartik pisariaqartippaat, pisaaneqarniunngineq atorfissaqartinngilaat. Taamatut pissusilersornissamut massakkut piffissaanniglaq, taamaattumik nutaamik borgmesterertaarnissatta sukkanerpaamik pinissaa kissaatigaarput suliat nanginniassagatsigit. Suliassat imaannaanngitsut amerlaqaat massakkut iluarsissagutsigit ataatsimoortariaqarpugut, tapersiilluni oqarpoq Louis Sigurdsen, Suleqatigiissitsisut Sermersuumi immikkoortortaani siulittaasuusoq.
-Inuit Ataqatigiinniik nuannaarutigaarput politikkikkut suleqatigiiffissaqarnerput, takusinnaagatsigu suleqatigiinniarnermi suliniutigerusutagut amerlasuutigut assigiissuteqartut. Taamaalilluta suleqatigiinnissamut pingaartitassat sorliit salliutinneqassanersut piffissap sivikittuinnaap iluani nassaarisinnaasimavagut.
Akisussaaffik tiguarput, suliallu annertuut aallartissimasagut nangeqqissavagut, nuannaarutigeqaarpullu taamak iliorsinnaagatta Suleqatigiissitsisut peqatigalugit, taamatut oqaaseqarpoq Charlotte Ludvigsen.
IA-p aamma SA-p isumaqatigiissutaanut aammattaaq ilaapput Naalakkersuisut suleqatigineqarnissaat aamma dansksit Justitsministereqarfiat taamatullu politiit aamma peqqinnissaqarfik meeqqanut inuusuttunullu suliniutit nukittorsarumallugit. Suleqatigiilluta illoqarfinni nunaqarfinnilu inissaqarniarneq pitsanngorsassavarput ilaatillugu Siorarsiorfik. Tamatuma saniatigut angerlarsimaffeqanngitsut pillugit annertuumik suliniartoqassaaq.
Takornariaqarneq ineriartortinneqassaaq siunertaralugu takornariaqarnerup piujuaannartitsinissamik tunngaveqarnissaa taamatullu aamma sulisartut amerlisarumallugit suliniutit assigiinngitsut arlallit aallartisarneqassapput. Kingulleq suliarissavarput Danmarkimi ilinniarfiit assigiinngitsut suleqatigalugit.
Sulinitigineqassaaq Tasiilarmiut kiffaanngissuseqarnerunissaa, kommuni nutaaliorluni suliniarfittut ingerlanissaa pillugu.
Manna iluatsillugu Borgmester Asii Chemnitz Narup qutsavigerusupparut sulilluarsimanera pillugu aamma qinersinermi qinersisartut qinnutigigaluarpaat siuttoriumallugu, inuit 2.259-t borgmesterissatut qinermassuk. Tunuarniarnerali tusaatissatut tiguarput kissaapparpullu siunissamik iluanaarnartumik pilluarnartumillu.
Charlotte Ludvigsen – Bormesteri, Kommuneqarfik Sermersooq
Louis Sigurdsen – Siulittaasoq, Suleqatigiissitsisut Sermersooq
Michael Rosing – kommunalbestyrelsemi ilaasortaq, Suleqatigiissitsisut