Suleqatigiissitsisunut pingaaruteqarpoq sillimanissaq, tassunga ilanngullugu hackerit saassussisarnerat il.il. pillugit paasissutissat Inatsisartuni ilaasortanut tamanut anngunneqartalernissaat.
Isumaqarpugut misilittariaqaripput Kalaallit Folketingimi ilaasortaatitaasa Folketingip Nunanut Allanut Kilitsissiaqarnermullu Ataatsimiititaliaani ilaasortanngortinniarneqarnissaat.
Atlantip avannaani qinikkat suleqatigiinnissartik isumaqatigiissutigisinnaappassuk, taamaaliornikkut qularnaarneqarsinnaavoq sillimanissaq pillugu paasissutissat ilaasortanut anngunneqatalernissaat aamma suleqatigiinnerminni paarlaasseqatigiittalernissaat paasissutissanik.
Tamanna ajornarpat Danmark isumaqatiginiarneqarsinnaavoq kalaallit ilaasortaatitaasa ataatsimiititaliani ilaasortanngornissaat pillugu. Aamma illuantungaanut paasissutissiilluartarnissat pisinnaappata soorunami qujarutissavagut.
Suleqatigiissitsisunut pingaaruteqarpoq Kalaallit Nunaata sillimanissakkut ulorinaartorsiortinneqarsinnaanera, IT-mi isumannaallisaaneq aamma imartatsinni silaannartatsinnilu killeqarfiit pillugit paasissutissinneqartarnissaa.
Aamma nunatsinni nammineq oqallinnermut qaffassaataassaaq taamaattoqartalerpat Inatsisartut ataatsimoorlutik nunanut allanut tunngasut pillugit ilisimatinneqartalissammata.
Taamaasippat pitsaanerusumik tunngaveqarluta avataaniit aningaasaleerusuttut pillugit aalajangiisalissagaluarpugut aamma qinikkatut tunngavissaqalissagatta ilisimatinneqarnitsinnut atatillugu apersorsinnaanissatsinnut siunnersorneqarnissarput pillugu.
Uangutsinnut pingaaruteqarpoq ineriartortitsinissarput Naalagaaffeqatigiinneq aserorternagu. Qularutissaanngilarmi nunatta nunarsuarmi inissisimanerata pingaaruteqassusia ukiuni makkunani alliartortuartoq taamaattumik aamma pingaaruteqarpoq uangutsinnut Kalaallit Nunaata ilisimatilluarneqartarnissaa.
Ullumikkut ilisimatitsisarneq Naalakkersuisutigoorpoq Suleqatigiissitsisunulli pingaaruteqarpoq Kalaallit Folketingimi ilaasortaatitaasa qinikkatut sulinermut attuumassutillit pillugit ilisimasaqarnerulernissaat.
Piffissaq qaninnerusoq isigalugu Inatsisartuni ataatsimiititaliat Danmarkimilu ataatsimiititaliat akornanni suleqatigiinneq pitsanngorsarneqassaaq.
Isumaqarpugut Folketingimut isertitsinissarput pingaaruteqartoq suleqatigiinneq nukittorsarneqassappat, namminersulivinniat alarlugit naalagaaffeqatiginnerup nukittorsarnissaa taakku naaggaarmassuk.
Pingaaruteqarpoq Folketingimut isertut partiinik allanik ilisimasaminnik avitseqateqartarnissaat Kalaallit Nunaannullu tamarmut sinniisutut sulisarnissaat.
Paarlattuanik pisariaqarpoq uangut inerisimanerulluta suleqataalernissarput oqaloqatigiillaqqinnerulernissaq suleqatigiillaqqinnerulernissarlu anguniarlugit aamma aallartissallugu Kalaallit Nunaata pitsaasumik sunniuteqarsinnaanngornissaa.