Pilerisaariartortoqartillugu angalaqatigiinnut ilaatinneqartassapput
Danmarkimit tapiissutinik, Bloktilskudinik, ikinngitsunik pissarsisarpugut aamma tamatta kissaatigigunarparput aningaasarsiornikkut siuariartornissarput. Taamaattumik Naalagaaffeqatigiinneq iluaqutsiullugu inuutissarsiortut, takornariartitsisartut, eqqumiitsuliortut aamma timersortartut allallu nunarsuup sinneranut angalanerusalernissaat qularnaartigu.
Kalaallit Nunaata nunarsuup sinneranik suleqateqarnissaa kissaatigaarput, sualummik niuernerup avammullu tunisassiornerup iluani. Naalagaaffeqatigiit killeqarfiisa toqqissisimanartut iluini annerusumik suleqatigiittoqarnissaa kissaatigaarput niuerfiit nutaat takusinnaaleraangatsigit. Aalisarnerup issittumilu umiartornerup iluani immikkut pitsaanerpaanik ilisimasaqarpugut. Avammut nioqqutigisinnaasatsinnik, ineriartortissinnaasatsinnik aamma suli anginerusunik angusaqarfigisariaqakkatsinnik.
Inuutissarsiortut pilerisaariartorlutik nunanut allanut angalatillugit inuutissarsiortortagut, peqataanerusariaqarput, takornarialerisut inuppassuit pilerisaareqatigiinneranni peqataasariaqarput, imaluunniit inuiaqatigiit akiligaannik takornariartitsinermut pikkorissarsinnaasariaqarput, eqqumiitsuliortortagut timersortartullu nunarsuup sinnerani aamma nunani avannerlerni unammiuaarnernut peqataanerusinnaasariaqarput. Eqqaamasariaqarpagut aamma politikerit ungaqqullugit allanut unammiartoqqullugit qaaqqusaasarnissaat puigussanngilarput.
Tamakku Suleqatigiissitsisuni angorusuppagut aamma Folketingimi sassartitagut atortariaqarpagut programmnik pitsaasunik siunnerfilersueqataasillugit, inuutissarsiortunik suleqateqarnissamut, eqqumiitsuliortut peqatigiiffiinik, kommuninik, timersortartut kattuffiinik aamma nunatsinni nammineq piumassutsiminnik sullissisartut kattuffiinik, Folketingimi suleqatigiinneq aqqutigalugu.
Aallarnisaasareneq Danmarkip Savalimmiullu misilittagaqarfigineruaat tamanna nunatsinni aallarnisaasartunut iluaqutissanngortinniartariaqarparput. Peqataatitsisarluta pikkorissarnernut, nutaaliornernut aamma ineriartortitsivinnut isumassarsiornerni. Kingullermik takuagut kalaallit sullivii pikkorissut piginnaanngorsartut Naalagaaffeqatigiit aqqutigalugit soorlu Attavik aamma app-inik neriartortitsisartut inuusuttut, ajoraluartumilli ingerlaqqinngitsoortut Kalaallit Nunaat tassani immikkoortumi piginnaaneqanngimmat. Tamanna allanngortittariaqarparput.
Peqatigiilluta nassaareriartigu qanoq immitsinnut iluaqusersorsinnaanerluta.
Qularnaarsinnaavarput:
– Nutaaliortartut aamma aallarnisaasartut, sulliviit, nutaaliortarfiit Danmarkimut pikkorissariarsinnaalernissaat allatigullu suleqateqarnerulernissaat Nunatsinnit qinnuteqarneq tunngavigalugu, periarfissarlu taanna ammatinneqassaaq sullivinnut mikisunut aallarterlaanullu.
– Savalimmiuni Kalaallit Nunaannilu sulliviit assigiit attaveqatigiinnerulernissaat qularnaassavarput, suleqatigiinneq taakkununnga iluaqutaasussanngorlugu imaluunnit ilinniartuutinik paarlaasseqatigiittarnissaq aqqutissiuunneqarsinnaavoq.
– Inuutissarsiornermut Nutaaliornermullu aningaasaateqarfiit pillugit Kalaallt Nunaata Danmarkillu suleqatigiinnissaat ineriartortinneqassaaq eqqarsaatigalugit sulliviit akunnattumik angissusillit annerillu.
– Inatsisartut, soraarnerussutisiaqalernissamut aningaasaateqarfiit aamma namminersortut Kalaallit Nunaanni inissianut, attaveqaatinut il.il. iluanaarutaasumik aningaasaliisalernissaat ineriartortittariaqarpoq
Aamma isumaqarpugut Namminersorlutik Oqartussat attavinnut taakkununnga aningaasaliissuteqartariaqartut.
– Eqqumiitsuliortut filmiliortartullu nunarsuup sinnerani tunitsivissarsiornissaat eqqumaffigisariaqarparput.
– NGO’t, nammineq piumassutsiminnik sulisut ikiuiniaqatigiillu namminersortut taamatullu peqatigiiffiit nittarsaattariaqarpagut periarfissarsiuullugillu Danmarkimi Savalimmiunilu kattuffinnik suleqateqalernissaannut.
Tamatuma siuarsarnissaa Folketingimi sulissutigisariaqarparput aamma. NGO-t sulilluartorsuupput kisianni uummaarissut ikippallaarput taamaattumik kiserliorsinnaasarput. Attaviit amerlisarlugillu pitsanngorsaagutta nukittunerulissapput.