Suleqatigiissitsisuni qinigaatitatsinnut suliakkiissutiginiarparput Kalaallit Nunaata ilittalu qaninnerulernissaat, aamma Danmarkimut USA-mullu, nunatta iluani pissutsit eqqarsaatigalugit aamma Folketingimi.
Sunnguakkulluunniit akorngutissaaartinneqanngilaq nunanut allanut tunngasut pillugit Kalaallit Nunaata isumatigiinniarnernut akuusarnissaa, nunarput pineqartillugu.
Kalaallit Nunaata Danmarkip USA-llu 2004-mi Igalikumi isumaqatigiissut atsiorpaat qularnaarlugu Kalaallit Nunaata nunanut allanut politikkimut akuunerunissaa. Tamatuma saniatigut peqatigiilluta komitiliorpugut Permanent og Joint Committee, siunertaralugu arlalitsigut suleqatigiissuteqarnissarput ilaatigut takornariaqarnerup siuarsarnissaa pillugu, silaannaap pissusaanut ilisimatusarnissaq kiisalu Kalaallit Nunaanni silaannakkut assartuinerup ineriartortinissaa pilersaarusiornissaalu pillugit.
Suleqatigiinneq 2013-mili imaannaasimanngilaq tamannalu allanngortittariaqarpoq.
Kangerlussuup siunissaanut nalornineq takkuppoq Naalakkersuisut taakkulu amerlanerussusiisartuisa allanik suleqateqarsinnaannginnerat pissutaalluni kiisalu Nunanut allanut politikkimut malinnaanngippallaarnerat pissutaalluni. Qinikkat aqqutigalugit suleqatigiinneq tamanna qularnaartariaqarparput ilaatigut folketingimi ilaasortaatitagut atorlugit. Ulluminnut danskit sakkutooqarfiinit aamma qularnanngitsumik USA-mit tusartarparput Kangerlussuup ingerlaannarnissaa kissaatigineqartoq.
Kalaallit ilaasortaatitaat Folketingip Nunanut Allanut Kilitsissiaqarnermullu Ataatsimiititaliaani ataavartumik ilaasortaasariaqarput
Innuttaasut pisariaqartippaat siuttut aqqutissiuisinnaasut, angisuunik angusaqarsinnaasut, soorlu ullutsinnut naleqquttumik attaveqaateqarnissaq, peqqissumik aningaasaqarnissaq, tassa ilitta akornanni aningaasaleeqataasinnaasunik kusanartumik isumaqatigiinniarsinnaaneq.
Isumaqarpugut suleqatigiinnerlioqattaarnerit pinngitsoortinneqarsimasinnaagaluartut isumaqatigiinniarnerni pikkorinnerusartuugutta aamma qulaani taariikkatsinni komiténi. Qularutissaanngilaq nunarsuup sinneranut Kalaallit Nunaat pingaaruteqaraluttuinnarmat ukiuni makkunani aamma isumaqarpugut pisariaqartoq suleqatigiinnermik nukittorsaarusuttunik qinigaatitaqartariaqartugut, naalagaaffinngornianeersuniunngitsoq aamma partiit Kalaallit Nunaanni innuttaasunut ilisimasanik avitseqateqarusunngitsut issiatitaqartariaqanngillat.
Isumaqatigiinniartoqartariaqarpoq, nunatsinniittullu tamarmik paasissutissinneqartariaqarput
Soorunami ataatsimiititaliani pisanni marlunni isertuussanik suliaqartoqartarpoq, kisianni folketingimi ilaasortat suliassaasa akimanerpaartarissavaat qularnaassalugu Danmarkip Kalaallit Nunaanni Inatsisartunut Naalakkersuisunullu ilisimatitsisarnissaa pineqartillugit suliat isumannaatsuunissatsinnik ulorianartorsiortitsisut, IT pineqaraluarpat aamma qarasaasiakkut isumannaatsuunissaq imaluunniit killeqarfitta ulorianartorsiortinneqarnerat allatigulluunniit.
Pisariaqarpoq inersimasutut pissuseqarnissarput aamma qaninnerusumik oqaloqatigiittarnissaq ujarntortariaqarpoq taamatullu suleqatigiinnissaq, suliallu allaqqaataanili qularnaarniarneqassaaq Kalaallit Nunaata kusanartumik sunniuteqarsinnaanissaa, suleqatissasiornissaq, isumatuumik oqaloqateqartarnissaq nunanut allanut sillimanissamullu tunngasut pineqartillugit.
Folketingimut qinersineq qaangiupppat ataatsimiititaliami ataatsimi marlunniluunniit ilaasortaanissaq Folketingimi isumaqatigiinniutigineqartariaqarpoq. Aallarniutigisinnaavarput kalaallit qinikkat taaseqataasinnaanatik issiaqataasarnissaaq, oqaaseqarsinnaatitaallutilli, tamannalu nalilersoqqillugu ukiut marluk ingerlareerpata.
Kalaallit Nunaanni suleqatitsinnut paasissutissinneqartarnissaminnut pisariaqartitsisunut paasissutissiisarnissaq inerisarneqassaaq, partiip anguniagai tunngavigalugit Folketingimi politikkerneq pinaveersimatinniarlugu, paasissutissanilli Inatsisartut avitseqatigineqartassapput ataatsimiititaliani paasissutissiisarneq aqqutigalugu aamma Folketingip Inatsisartullu sukumiinerusumik suleqatigiinnissaat siunertaassaaq.
Taamaasilluta qularnaarsinnaavarput Issittup sakkutooqarnikkut uippajaarfigineqannginnissaa ilitta ikiortiginerisigut.
Suleqatigiissitsisuni kissaatigaarput Folketingimi silatuumik politikkernissarput, suleqatigiinneq inerisarumallugu aamma Kalaallit Nunaata isumaqatigiinniaqataasarnissaa – aamma qinikkat suleqataasillugit ullumikkutut Naalakkersuisut kisiisa aqqutiginagit.
