Pilersaarutit sussaanngitsut ungasinngitsumi qaqinneqaqqammerput, tassanilu Søfartsstyrelsip, maannalu Fødevarestyrelsip tiguneqarnisaat.
Søfartsstyrelsip tigunissaanut sulinermut 35 mio. koruunit atorneqassapput ukiumut, suliamullu atatillugu ilisimaneqanngilaq tigusinissap suliassartaa qanoq sivisutigisumik ingerlanneqassanersoq; kiisalu saniatigut aamma ukiumut 25 millioner koruunit aningaasartuutigineqartassapput oqartussaaffimmi sullissinerup ingerlanneqarnissaannut.
Fødevarestyrelse EU inatsisiliarisimasaanniik aqunneqarluni suliaqartarpoq, uagut Danmarkilluunniit oqartussaaffiginngisaannik.
Suleqatigiissitsisuni isumaqarpugut allaffissornerup allisaqqinnissaa silatusaarnerunngitsoq.
Allaffissornitsinni amerlavallaartunik sulisoqareerpugut allaat Peqqinnissaqarfimmit sulisoqarnerulluta.
Oqartussaaffimmik tigusinerup kingunerikkajuttarpaa Namminersorlutik Oqartussat suli amerlanerusunik atorfinitsitsisariaqarnera soorlu aamma tigusinerup kinguneranik kingunerikkajuttaraa siunnersortilersornerujussuup atorneqalersarnera.
Oqartussaaffinnik tigusisarneq unitsilluinnartariaqarparput. Namminersorlutik Oqartussanut akitsortaavallaaqaaq, allaffissornerummi suli anginerulernera tamatigut kingunerisarpaa.
Aningaasaatigut silatuumik pisariaqartitsiffiusuni atoriartigit.
Aningaasat atorniartigit meeqqat kinguaassiutimikkut kanngutsaatuliorfigineqartarnerat pinaveersaartinniarlugu. Aningaasat atorniartigit inunnik isumaginnittariaatsitta kulturitsinnut ilinniarsimassutsitsinnullu tulluarsarnissaanut, inersimasunullu meeraanerminni kinguaassiutimikkut kannguttaattuliorfigineqarsimasunut maanna kinguneqapilutsitsisunut misissuinermut aningaasat atorniarlik.
Aningaasat aammattaaq atorneqarsinnaapput Namminersorlutik Oqartussat ingerlatsinerata ammasumik ingerlatsinerulernissaanut, takusinnaalerlugu immikkoortut suut millisarsinnaanerigut imaluunniit eqaannerusumik aqussinnaanerigut.
Naalakkersuisut ersarissuliortut aamma pinngitsoorneqarsinnaasussaanngillat allaffissornerup millisarnissaanut siunertaq anguneqassappat.
Meeqqat pisariaqartitaat politikkikkut suliniarfigissallugit salliutilerniarsigit. Ukioq kingulleq taamak iliussallusi neriorsuinikuuvusi!