Tasiilaq pillugu piviusulersaarut
Sutigut tamatigut erserpoq uangut politikerit malinnaanngilluinnartugut, atuarsinnaagutsigu Meeqqanut, inuusuttunullu aamma inunnik isumaginninnermut Naalakkersuisoq Martha Abelsen, meeqqat inuusuttullu ikiorneqarnissaannut qujaannartoq.
Qanga kingullermik innuttaasunut, inoqatiminnut attaveqarpat – kamannarinerpaavarali:
– meeqqat inuusuttullu naalliuttut inunnik isumaginninnerup iluani ikiuisoqanngilluinnarnera kingunipilulimmik?
Sooq ikiorneqarsinnaagutta naaggaassaagut? SULIAQ AALLARTINNEQARIARLI MASSAKKORLUINNAQ!
Ilumoorsinnaanngilluinnarpoq meeqqat aamma inoqatigut inuttut ajornartorsiortunit erloqisinneqartut kingulliunneqartuarmata.
Oqaatigiuakkatsitut pissutaavoq immikkoortumut naammattunik aningaasaliisoqarneq ajornera. Misilinneqarnikuunngilaq periutsimik sananissaq ilinniarsimassutsitta qaffasissusaanut kulturitsinnullu tulluuttumik naak Suleqatigiissitsisuni tamanna siunnersuutigereernikuugaluaripput – malitseqartitsisoqarnissaa qularnaareerlugu.
Sulliviit assigiinngitsut peqataaffigisaannik suleqatigiisitaliortoqarnikuunngilaq, inuttaqartumik Namminersorlutik Oqartussaneersunik, kommunineersunik, ilisimatuunik aamma ilinniarsimasunik, naak tamanna siunnersuutigereernikuugaluaripput.
Tigussaasumik meeqqat inuusuttullu atugaat pitsanngorsarneqanngillat.
Naalakkersuisut innersuussutigiuarpaat “suliaq aallartinneqareersoq, misissuisoqartoq, paasiniaaqqissaartoqartoq imaluunniit nalunaarusiortoqartoq, pissutaasorli tassaavoq Naalakkersuisut paarlakaajaannerujussuat, tamannali pissutigalugu innuttaasut atungarliortinneqartariaqanngikkaluarput.
Naammaleqaaq!
Naalakkersuisut ikiuukkumasunut naagaartortuassappata aamma Inatsisartuni siunnersuutigineqartunut naaggaartortuassappata aamma ikiuinissaq NAMMINNEQ ilusilersungartik Inatsisartut ikiorsiulllugit piviusunngortissinnaanngippassuk, taava tunuaannartariaqanngikkaluarpat?
Piviusulersaarutip kikkut tamaasa qamuuna attorpai, kiisami, nuna tamakkerlugu.
KIISAMI ataatsimuulerpugut!
Taamaakkaluartorli Naalakkersuisut aporfilersuilerput?
Naak aningaasat, iliuusissat, pitsanngorsaatissat, suleqatigiinnissaq qineqqusaarnermilu neriorsuutigineqartut?
Puigorsiipput neriullutik suut tamarmik ullut 14-t ingerlanerini puigorneqarumaartut, kisianni taamaattoqanngisaannassaaq.
Meeqqat kingullersaat ikorneqarsiillugu nammineq pisinnaanngitsut sinnerugit ilungersortuassaagut. Taamaattumik Future Greenland ingerlanneqarmat ullumi akerliussutsimik takutitsivugut.
Taamaattumik isornartorsiuivugut, taamaattumik siunnersuuteqartarpugut.
Partiijarannguugaluarluta ikiortissaalitsisut, nukippassuit pineqartumut atorpagut.
Meeqqat massakkut peroriartortut siunissarissaarnissaat pillugu ikiorneqarusunnerluta apereqqinneqarnavianngilagut.
Massakkorluinnaq qujarussisariaqarpugut.
Ikiuerusuttut angerniakkit taamaanngippat tunuartariaqarputit, Martha.