Qineqqusaarnerup ataatsip nalaani Naalagaaffeqatigiinnermut angertuunerup nittarsaannissaa piffissatsialaasimasorinarpoq. Sualummik Atassummut.
Taamatut periuseqarneq inuutissarsiutigalugu politikerinit atorneqakkajuttarpoq. Qineqqusaariarluni oqariarluni kingorna allarluinnarmik iliuuseqartarluni.
Nikolaj Rosingimmi parteeqatai Siumut siuttuuffigisaani naalakkersuisoqatigiinni toqqissillutik akuusarnikuupput anguniaralugu Naalagaaffeqatigiinnerup kipitinnissaa. Atassutimmi sulissutigaa oqartussaaffiit tigoorarneqarnissaat kiisalu tunngaviusumik inatsisissaq pillugu isumalioqatigiisitaliornissaq uffa taakkorpiaat Kalaallit Nunaata Naalagaaffeqatigiinniit kaanngarnissaanut tunngaviusussaasut.
Peqataanik Atassutip ukiorpassuarni qaangiuttuni Aningaasanut Inatsisissanut akuerseqataalluni taasisarnikuuvoq naalakkersuisoqatigiinnut akuttunngitsumik peqataasarneq pissutaalluni.
Taamaasillutik sulianut makkununnga akuerseqataasarnikuupput: Danmarkimiit Kalaallit Nunaannut suliartorusuttunik killilersuinissamut aamma Nunani Avannarlerniik Kalaallit Nunaannut suliartorusuttunik. Nunatsinnut nunasisut qinersinernut peqataanissaminnut ajornerusumik atugaqartinnissaannut, naak soorlu Danmarkimut nuuttut kalaallit taamatut pineqanngisaannaraluartut.
Arlalinnik aamma Atassut malittarisassioqataanikuuvoq kalaallit ilinniartut nunaminnut uteraangamik takornartatut pineqartartussanngorlugit aamma Atassutip Namminersorluni Oqartussaanerup eqqunneqarnissaa akuerseqataaffiginikuuaa naak assersuutigalugu Bloktilskudi pillugu isumaqatigiissutit sussaanngikkaluartut.
Allanik assersuutissarpassuaqarpoq taamaakkaluartoq uteqattaalerpaat Naalagaaffeqatigiinnermut angertuullutik, taamaaliorpulli qinersisiminnik annaasaqarumanatik.
Allatut oqaatigalugu; Ukiorpassuit ingerlaneranni Naalakkersuisoqatigiit atortussanngortissimasaat torinngitsorpassuit Atassutip akuerseqataaffiginikuuai.
Tassa iliuuseqartarput oqaatsimik akerlerluinnaanik.
Nunatsinni politikki pineqarpat imaluunniit Folketingimi politikki – isuma ataaseq atorlugu pisoqartariaqarpoq – qinersisartut ilisimasariaqarmassuk suna qinernerlugu krydsiliingaangamik.