Ernumanarluinnarpoq Naalakkersuisut takusinnaanngimmassuk nunatsinni meeqqat tujormeqisut pillugit suleqatigiittoqartariaqartoq.
Folketingip assamminik isaassilluni suleqatiserinninneranut Naalakkersuisut folketingimilu ilaasortaatitagut marluk naaggaartorniaasaartut meeqqat suli amerlanerusut nappaatipalaanik tunillanneqarput aamma suli amerlanerusut imminut toqunniarlutik eqqarsarparput.
Naammaleqaaq. Unitsittariaqarpoq. Allatut iliuuseqartariaqalerpugut.
Suleqatigiissitsisuni suleqatigiinnissaq angerparput.
Danmarki nukissarpassuaqarpoq nunatsinni amingaatigilluinnaqissaakkatsinnik aamma Danmarkip suleqatiserigaluarpaatigut. Oqaatigeerpaat uteqattaarlugulu suli.
Ilassiuartariaqaraluarparput.
Takorloorparput soorlu ukiorpaalunnguit matuma siorna eqqartuussiveqarfitta ikiorneqarneratut iliortoqarsinnaasoq, suliat immikkoortiterneqarnissaannut, sulisunik piginnaanngorsaanissamut, katsorsaanermut ikiuunnissamut, ilaqutariit erloqisut nukittorsarnissaannut, kinguaassiutitigut kanngutsaattuliorfigineqarsimasut pisariaqartitaannik misissuinissamut aamma katsorsarneqarnissaannut nukiit pisariaqartippagut.
Imaluunniit kalaallit nunaanni inunnik isumaginninnikkut pisariaqartitsineq tunngavigineqarsinnaavoq aamma suleqatigiiffissatut isumaqatigiissutigisinnaasagut aallartiffiusinnaapput, allanimmi ikiorneqarnissarput pisariaqarteqaarput.
Sulisut aningaasallu siunertamut pinngitsooratik qilersorneqarnissaasa saniatigut pinaveersaartitsinermut Danmarkip ilisimasai atorluarsinnaavagut, soorlu Janus Centerimi misilittakkat, tassani meeqqat inuusuttullu kinguaassiutitigut kanngutsaattuliorfigineqarsimasut pisariaqartitaat paasiniarneqartarput taamatullu katsorsarneqarnissaannut neqeroortoqartarluni.
Kalaallit Nunaat Danmarkilu ataatsimoorlutik akisussaaqatigiippput. Tunngaviusumik inatsimmi inuttut kiffaanngissuseqarluta isumagilluarneqarnissatta siunertaraa meeqqat inuusuttullu ulorianartorsiortut qularnaariffigineqarnissaat. Piffissanngorpoq suleqatigiinnikkut taakku piviusunngortinneqarnissaat.
Neriuut ikinneqarli, ataatsimoorluta nukittunerusarpugut.