Aningaasaliissutaareersunut ilassutissanut inatsit, Aningaasanut Inatsimmi immikkut aningaasartuutinut, naleqqussaanernut aamma nussuinernut tunngasoq ullumi oqaluuserineqarmat Suleqatigiissitsisuni allarpassuarnut ilanngullugu paasivarput Inatsisartunut ilaasortanut illuliortoqalersoq 25-nik.
Maannakkut ileqqooreerpoq Naalakkersuisunut ilaasortat akikittuaqqamik illoqartinneqartarnerat naak nunami maani akissarsiat agguaqatigiisikkaanni Naalakkersuisuni ilaasortat akissarsiaqqortunerpaanut ilaagaluartut. Aamma Inatsisartut akuersinerisigut arlalinik illuliortitsisoqalerpoq.
Ilinniartunut inuusuttunut kollegiat, napparsimaviit allilernissaat kiisalu aamma atuarfiit inissialu naliginnaasumik attartortittakkat oquttorsuit suliarineqartariaqaraluartut kingulliunneqaqqipput Inatsisartunullu ilaasortanut 25-nik illuliornissaq imaaliallannerinnakkut akuerineqarluni. Piviusunngortinnissaa qularnaarneqarpoq naak innuttaasunut sammisunik sanaartortoqarnissaa pisariaqartinneqaraluartoq.
Tamanna isornarluinnarpoq manna aningaasaliissutaareersunut ilassutissatut inatsit aqqutigalugu ilaatigut Inatsisartunut illuliortitertoqalerpoq innuttaasulli iluamik ineqartinneqartariaqaraluarnerat sunnguamilluunniit eqqaaneqarani.
Politikerit imminuinnaq sullittutut isikkkoqarput. Aamma “ungasinnerusoq isigalugu qanorluunniit sipaartoqartigissagaluarpat” suliaq kingullinngorlugu inissinneqarsimasariaqaraluarpoq.
Tassa illut nutaat 25-t sanaartorneqarnissaat imaaliallannerinnakkut akuerineqarpoq kollegianili inissaaleqisut inissianilu naliginnaasumik attartortittakkani oquttorsuarni najugallit utaqqeqqittariaqarput.
Angerlarsimaffeqanngitsorpassuarnik aamma ulikkaarpoq aamma meeqqanut inuusuttunullu sakkortuumik sumiginnagaasimasunut, kinguaassiutitigut kanngutsaattuliorfigineqarsimasunut, persuttagaasimasunut aamma atornerluffiusuni angerlarsimaffeqartunut inissaqanngilaq, taamaakkaluartorli politikerit inissaqartinnissaat pingaarnerutinneqarpoq. Kanngunaqaat.